رواية رجل المهام الصعبة الحلقة السادسة عشر 16 | روايات ندى محسن

  نقدم اليوم احداث رواية رجل المهام الصعبة الحلقة السادس عشر من روايات ندى محسن . والتى تندرج تحت تصنيف روايات رومانسية ، تعد الرواية  واحدة من اجمل الروايات رومانسية  والتى نالت اعجاب القراء على الموقع ، لـ قراءة احداث رواية رجل المهام الصعبة كاملة بقلم ندى محسن من خلال اللينك السابق ، أو تنزيل رواية رجل المهام الصعبة pdf كاملة  من خلال موقعنا .


رواية رجل المهام الصعبة الحلقة 16 | روايات ندى محسن



رجل المهام الصعبة الفصل السادس عشر

رواية_رجل_المهام_الصعبة
الحلقة16
بقلم/ندى محسن♕Noody♕
#Nada_Mohsen

اوتار بغضب واستغراب: افندم؟؟
ليلى بإستغراب: انتي مين! وازاي تردي على تليفونه
اوتار بغيظ وعينها بقت تغمق: اولآ انا اوتار مراته ثانيآ هو اللي قالي ردي ثالثآ بقى ودا الأهم مش صح وحرام لما تتصلي بواحد وتقولي كلام زي دا عيب اوي في حقك يا انسة
ليلى بغيظ قفلت السكة والدموع اتجمعت في عينها: مراته مراته ينهار اسود
اوتار حست بضيق بس ابتسمت: هو قالي ردي اكيد مفيش حاجة من ناحيته
ابتسمت بثقه: عز بيحبني انا بيحب مراته وبس
عز حضانها وهي اتخضت وغمضت عينها بإبتسامه وهو وراها: مين قالك انه بيحب مراته وبس دا بيموت فيها بيعشقها حاجة كدا اتخطت كل حدودها
اوتار لفت وحضنته
عز: ايه قالتلك ايه ليلى
اوتار بغيظ بعدت وبصتله: قفلت السكة في وشي
عز كتم ضحكته على اسلوبها : ودا ليه؟؟
اوتار بغيظ: عشان قولتلها اني مراتك يا عز وهي كانت بتقولك حبيبي وانت عارف انت عندي إيه ايه الكلام دا وازاي تسمح لنفسها وازاي باباها مش همه كدا
عز ضحك: لا باباها لارچ خالص عودهم على كدا وبقى مش عاجبه بقولك ايه سيبك منها هما كانوا منمرين انهم يجوزونا لبعض
اوتار بغيظ: كمان كمان يا عز انت ناوي تجيبلي جلطة كمان
عز ضحك بهزار: الله وانا مالي بس بقولك انا هموت من الجوع ومش هعرف اكل طول ما العيون دي موجودة هاتيلي البنفسج اللي بحبه
اوتار ضحكت وهو ابتسم وقعدها جمبه وهي لازقة فيه بصتله بإستغراب: انا مش عارفة ليه تضايق نفسك والمكان بسم الله ما شاء الله واسع
عز: انا بحبك جمبي كدا وبحب ءأكلك بحب كل حاجة فيكي يا نور عيني وقلبي وروحي وعقلي
اوتار ضحكت:من امتى الرومانسية دي بس...وبعدين عندك شغل المفروض تروح
عز:مش النهاردا انا عريس جديد
اوتار ابتسمت وقعدو يتكلموا كتير في اي حاجة تيجي على بالهم وهو كان بيسمعها بإبتسامة وشويه وتليفونه رن بصتله وبصت للتليفون اللي جمبها وضيقت عيونها بغيظ:ليلى...
عز ضحك:هاتيه
اوتار ادتهوله بضيق بس دارت مشاعرها وهو رد
عز:الو يا قمر
اوتار بصتله واسلوبه ضايقها وطريقته معاها عصبتها
ليلى بتتكلم
عز ابتسم وليلى بتكلمه وهو بيرد واوتار عايزة تعرف هي بتقوله ايه:واللهي انا كويس متقلقيش...اه دي اوتار....... اه..... ايوا صح..... اكيد هشوفك....تمام....سلام
قفل واوتار بصاله
عز بص للتليفون شويه ووقف:هروح مشوار وجاي
اوتار:انت هتقابلها!
عز ابتسم بإستغراب:واقابلها ليه؟
اوتار بصتله وسكتت وهو فهم انها متضايقة مش مجرد غيرة وبس
عز:في ايه
اوتار شافت ان دا مش وقته تعاتبه على طريقته وهو مش ناقص حط ايده على شعرها بحنان:ايه يا اوتاري
اوتار ابتسمت بإصطناع:مفيش تيجي بالسلامة
غير هدومه ونزل واوتار مخنوقه وحبت تشغل نفسها قامت وبصت للنيش الإزاز اللي مليان بأزايز الخمرة:انا بيتي ميبقاش فيه الحاجات المقرفة دي...يا رب كرهه فيها وكرهه في كل حاجة وحشة يا رب وفي كل الستات بالمرة الا انا طبعآ وعيلته بس محدش يشغله ابدآ تاني
خدت الازايز بقرف ودلقتهم في الحمام وحطتهم في شنطة لبست الأسدال بتاعها وفتحت الباب عشان تحطهم في السلة برا وهنا شافت سامر اتجاهلته بس هو اتكلم:صباح الخير
اوتار برسمية :صباح الخير
سامر:انتي كويسة انتي امبارح حاجة وبسم الله ما شاء الله النهاردا حاجة تانية حاجة كدا قمر
اوتار فهمت انه عايز يجر كلام معاها وبرسمية اتكلمت وهي مش بصاله:بعد اذنك
سامر:ا....اتفضلي
دخلت وقفلت وهو ابتسم بإستغراب ونزل

#رواية_رجل_المهام_الصعبة
للكاتبة/ندى محسن ♕Noody♕
متابعة لصفحتي هنا 👇
#Nada_Mohsen

زياد رن على تالين وهي ردت:نازلة
زياد:انا ورا البيت
تالين:وليه مجتش تحت
زياد:باباكي موجود شوفت عربيته يلا بس
تالين:حاضر نازلة
نزلت وملقتش حد قاعد جت تخرج حست بإيد على كتفها:على فين
تالين اتخضت ولفت نفخت:انت
حسام:على فين يا هربان يا صغير
تالين:رايحة لعز
حسام:انتي مش قولتي اتجوز يا بت هتروحي النهاردا تعملي ايه
تالين:انت هتعمل زي زياد يلا بقى جاي ولا مش جاي
حسام:جاي طبعآ انا وحشني اووي وكانه غاب سنين تعرفي يا تالي انه مفرقش معايا انه اخويا او متبني وان معزته واحترامه وحبه متهزوش حتى انا بحبه اكتر واحد في اخواتي بأمانه يعني
تالين:ومين سمعك يلا بقى الواد هيخلل
حسام مشي معاها:واد مين بس؟
تالين:زياد
حسام:وانتي مالك بزياد
تالين:هو ايه اللي مالي بزياد جاي معانا
حسام:وانتي كنتي رايحة معاه لوحدك يعني لما اديكي بالبوكس في وشك هيبقى الوضع حلو وبعدين كنتي بتزعقي امبارح مع بابا ليه
تالين شافت زياد وسكتت
حسام:متتكلمي
زياد بخيبة امل:منور
حسام بإستفزاز:بنورك يا حلو كنت عايز تستفرد بالبنيه الغلبانه المسكينه
زياد:ايه اللي جابه السئيل دا بس يلا
حسام:يلا
زياد:انا واخد عربيه امجد بالعافيه فنخرج بعد منروح لعز
تالين:هيكون الوقت اخر اوي
زياد ضحك:انتي ناوية تباتي هناك ولا ايه
حسام:حبيبتي دول عرسان لازم يقعدو سوا يتكلمو يدردشو منبقاش وقفنلهم زي اللقمة في الزور كدا
تالين:طيب سوق بس ويلا
زياد ساق ومشي بالعربيه ومن وقت للتاني بيبص في المراية لتالين
حسام:تالي مكملتيش ليه بابا اتخانق معاكي
تالين بصتله بضيق انه اتكلم قصاد زياد بس قررت تشوف ردت فعله:عايزني اتجوز سالم ابن عمي
زياد فرمل العربيه بسرعه لدرجة انهم اتخبطوا فيها
حسام:اااه زياد في ايه بص قدامك ايه الجنان دا
زياد:تتجوزي ايه
تالين ابتسمت بغموض:ابن عمي
حسام هز راسه بنفي:ابن عمك دا انتي مشوفتيهوش من زمن؟؟ازاي يعني وبعدين تتجوزي ايه دلوقتي وانتي لسه صغيرة يعني اكيد عمي سليم بيهزر
تالين بضيق:منا كنت بتخانق ليه؟
زياد حس بخيبة امل كانت واضحة جدا على وشه وتالين لاحظتها ونوعآ ما اتولد امل جواها.....
وصلوا عند بيت عز وطلعو خبطوا اوتار: مين؟
زياد: زياد وحسام وتالين
اوتار ضحكت ولبست بسرعة الفستان بتاعها وفتحت تالين حضنتها وهي فرحانه وبتدندن: مبروووك يا توتا مبروك يا روحي مبروك
اوتار ابتسمت بفرح وبصت لزياد وزياد ابتسم: مبروك يا احلا اخت
حسام: مبروك يا توتا اومال فين الباشا
اوتار: اتفضلوا ادخلوا
بعدت وهما دخلوا
حسام: مردتيش بردو فين عز وبعدين مش هتعملوا فرح ولا ايه
تالين بصتلها
زياد: اوتار انتي كويسة
اوتار هزت راسها بإيجاب: انا كويسة... عز نزل راح مشوار وجاي مش هيتأخر
حسام: مشوار وفي يوم زي دا؟
تالين: ايه يعني المفروض يتحبس هنا
زياد: عايزك تعالي
اوتار هزت راسها بإيجاب وراحت معاه بتردد: ايه
زياد: انتي متضايقة في ايه هو زعلك وايه اللي خلاكي تتجوزي فجأة كدا اوتار انتي حيرتيني معاكي
اوتار: انا بحبه بس حاسة اني متضايقة
زياد: من ايه
اوتار حست انها مينفعش تقول لزياد خصوصآ على اي حاجة بينها وبين عز
زياد: ايه يا توتا
اوتار: طنط اماني عاملة ايه
زياد: مش عايزة تقوليلي
اوتار: معلش يا زياد انا بس متضايقة ان كل حاجة جت بسرعة انه مش معايا ونزل بس والله انا تمام
زياد اتنهد: ماشي يا اوتار بس وقت متحبي تتكلمي انا موجود
اوتار ابتسمت: وانا عارفة...
عز دخل لقى تالين وحسام وابتسم بتلقائية
تالين جريت واترمت في حضنه وحسام ابتسم وقرب حضنه: وحشتنا يا نمس انت نسيبك يوم نرج نلقيك متجوز
اوتار: اكيد عز جه يلا ندخل
دخلوا وعز اتضايق ان زياد كان مع اوتار لوحدهم
تالين: عز انت عامل ايه
عز حاوط وشها وابتسم: بخير بعد مشوفتك يا قلبي انتي
حسام: وانا عادي امشي يعني
عز حضنه وابتسم: انت اخر العنقود
حسام ابتسم
اوتار دخلت المطبخ جابتلهم حاجة يشربوها وعز عينه عليها وزياد مهتم بيها زيادة
عز اتنهد بضيق ونفخ:يا رب نخلص من الأڤورة دي
زياد: حبيبتي انا عايز اقولك حاجة
تالين وعز بصوله
زياد: ممكن تيجي معايا ثواني
اوتار هزت راسها بإيجاب : حاضر
وقفت وعز مسك ايدها قعدها: في ايه ملو في حاجة قولها قدامنا دي بقت مراتي على فكرآ
زياد: واختي على فكرا وبعدين انا طول عمري معاها في ايه؟
عز: زياد قصر ملكش دعوة بيها من بعد النهاردا
اوتار بصتله بصدمه: عز في ايه
عز: مفيش لو في حاجة يقولها قدامنا لاما ملوش لزوم يخدك على جنب يعني
زياد اتحرج خصوصآ قدام تالين وحس بضيق: بعد اذنكوا
مشي واوتار هتقف عز مسك ايدها جامد لدرجة حست انه هيكسرها فبطلت تقاوم
حسام: عز انت زودتها دي زي اخته يلا يا تالي نلحقه
نزله بسرعه واوتار بعدت ايده بغضب: هو في ايه لزمته ايه اللي عملته دا الموضوع كان يتاخد بهدوأ هو كان عايز يقولي حاجه وشكله كان متضايق يبقى في حاجه وكان لازم اسمعه احنا مكنش لينا غير بعض وباباه بعد عنهم ودا بسببي انا بسببي وانت بكل برود بتقوله ملوش اي علاقة بيا
عز مسك التليفون وبيحاول ميتعصبش عليها: انتي عارفة ان مينفعش يختلي بيكي مش انا اللي هقولك حرام مش كدا ولا انا غلطان وحياتك خربانة بسبب ابوه فبلاش التعاطف اللي مش في محله
اوتار: كنا هنبقى هنا وفي مسافة بينا كنا هنقف هنا واظن انت عارف اني مبعملش حاجة غلط واني مبخبيش حاجة ولا حد بيتصل بيا يقولي حبيبتي فانزل جري
عز: لا ثواني كدا تقصدي ايه؟
اوتار بضيق: اللي انت فهمته بعد اذنك
دخلت الاوضة قلعت الفستان وبضيق قعدت على السرير وهو خبط ودخل مدلها الشنط: خدي جبتلك هدوم
اوتار: مش عايزة حاجة منك
عز: افهم في ايه مالك ملوية ليه
اوتار: ملوية لا انا مش ملوية انا متضايقة من تصرفاتك هو في ايه يا عز انت شايف اني غلطانه انت واحدة اتصلت بيك نزلت جري تقابلها ومعملتليش اي اعتبار ولا اهمية وعشان زياد كان عايز يقولي حاجة قلبت الدنيا وانت عارف انا بالنسبة ليه ايه
عز بغضب: انا جيت لقتكوا خارجين من الڤرندا ولوحدكو واتجاهلت بس هو زودها اوي لازم يفهم خلاص محدش ليه الحق يقرب منك وانتي بس ليا وبتاعتي
اوتار بإستغراب: انت اول مرة تتكلم باللهجة دي... دي نفس طريقة سراج...
عز بصلها واتنهد بعمق وبيحاول يداري غضبه قرب وبحنان حاوط وشها: اولآ مقبلتش ليلى ومتحطيهاش في دماغك ثانيآ لو طريقتي ضايقتك اعرفي اني تعبت عقبال متكتب كتابنا واني بحبك واني مليش غيرك انا مليش غيرك وعندي ميت حاجة بدور على اصلي بشوف ليه سراج عمل كدا ويا ترى ليه علاقة بالموضوع ميت حاجة وحاجة في دماغي انتي مش عارفة انا جوايا حرب انا خسرت كل حاجة فجاة وبحاول انقذ اكبر قدر اوتار انا دلوقتي نكرة انا مش عارف اهلي انا متسجل على عيلة المنشاوي بس انا مش عارف اهلي الحقيقين فين
اوتار: وانا متفهماك يا عز ومعاك ومش هسيبك
عز ابتسم وحضانها:متعرفيش كنت هتجنن لما الواد دا كان مهتم بيكي كنت عايز البسله الصنيه في وشه اعمل ايه بس بغير على البنفسج بتاعي انا
اوتار ضحكت وهو ضحك على ضحكها وقرب ايده بيلمس وشها وباس خدها بإبتسامه
عز:الجميل مش جعان
اوتار:هحضرلك الاكل الاول
عز:تعالي الاول بس
قعدها وقعد جمبها مسك ايدها واتنهد:انا قابلت بابا.....سليم....
اوتار ابتسمت بحنان:انا فهماك هو باباك يا عز
عز:عرفت منه الملجأ وروحت....وعرفت اللي.جابني...ومكنش صعب اعرف عنوانه
اوتار ماسكة في ايده:وبعدين
عز:روحت عرفت انه جابني فعلاً الملجأ بس...عشان فعلآ لقاني قدام بيته...يعني لولا انهم جم الملجأ كنت هبقى تربية ملجأ او مشرد....
اوتار حضنته بحنان:انا بحبك يا عز وهفضل جمبك دا وعد مني اني هفضل طول عمري معاك مهما يحصل ومهما يكون انا معاك
عز هز راسه بإيجاب وباس ايدها وهي ابتسمت وهو بصلها:يلا بقى غيري هدومك
فتحت الشنطة وخرجت اللي فيها وضربت كتفه بكسوف
عز ضحك:طب انتي شوفتي كله ليه مسكتي ف دا لو كان عليا عايز اشوفك بيه وعادي يا يا روحي ممكن تلبسيه قبل متنامي مش هو قميص للنوم والباقي كام ترنج وبكرا هجيبلك هدومك من عند سراج واقعد معاه شوية كدا
اوتار:بلاش يا عز....
عز:ليه
اوتار:كفاية مشاكل خلينا في حالنا
عز:كنا في حالنا والمشاكل هي اللي جتلنا يا اوتار انا لازم افهم في ايه على الأقل وليه عمل كدا؟
اوتار بصتله:هو بيغير منك وبيحقد عليك لأبعد مما تتصور
عز بغضب اتنرفز:ليه انا عمري معملتله حاجة وحشة ولا عاملته وحش عمري متأخرت عنه في حاجه
اوتار:دي الفكرة انك عندك كل حاجة وانك احسن منه في كل حاجة
عز غمض عينه بضيق
اوتار بصاله وكانت عايزة تقوله على سبب اصابته وانه هو اللي غدر بيه وكانت عايزة تقوله على اللي شافته في شقته وعلى ليالي وتقى بس خافت الامور تسوء مقدرتش تنطق وقررت تعتبر اللي تعرفه دا ورقة رابحة تقدر تلاعب بيها سراج انه يبعد عن عز ويبعد عن حياتهم
عز تليفونه رن وكانت ليلى بص لأوتار اللي مخدتش بالها ورد:الو
ليلى بتتكلم:انت قولت هتيجي عز انت ليه مش فاهم انا محتاجة اتكلم معاك
عز:حاضر
ليلى:الوقت ماخرش الساعه لسة 7تعالى
عز:مش هينفع صعب النهاردا
ليلى:مستنينك يا عز متتاخرش البس وتعالى
بص لأوتار وابتسم:ماشي جاي
قفل واوتار بصتله وبان عليها الحزن:هو انت هتسيبني تاني....عز انا خايفة انا قعدت كتير كدا لوحدي عند سراج....وغصب عني بخاف...
عز:مين قال اني خارج لوحدي هتيجي معايا البسي الفستان دا ويلا ونعدي على سراج بالمرة لو في وقت
اوتار عينها بقت ازرق فاتح
عز حط ايده على وشها:مالك خايفة ليه كدا
اوتار:بلاش بلاش نروح...بلاش
عز:انتي خايفة من ايه انا معاكي اهدي يا اوتاري
اوتار:ربنا يستر...هصلي الأول..
عز:ماشي
اوتار:مش هتصلي
عز:بعدين
اوتار:عز صلي معايا ارجع قرب من ربنا
عز:هو انا كنت قريب من ربنا عشان ارجع انا تايهه
اوتار:عشان كدا لازم تقرب من ربنا عشان التوهان دا يروح احساس وانت ساجد لا يعادله اي شعور تحس انك رميت حمل كبير من على ضهرك
عز:طيب صلي وتعالي
اوتار بصتله واتضايقت وراحت صلت واول مخلصت لبست وخرجت لقته قاعد بغضب:في ايه يا عز مالك
عز كلمها بنظرة حادة وغضب :فين الازايز اللي هنا
اوتار:ازايز ايه؟
عز:الخمرة
اوتار بقرف:رمتها
عز مسك دراعها بعنف:وترميها ليه انتي قولتيلي شاورتيني
اوتار بصت لأيده بصدمه:عز...
عز بيجمد ايده:مرة تانية حاجة زي كدا تستأذنيني فاهمة
اوتار افتكرت
Flash back
سراج ماسك دراعها بعنف وبيضغط عليها:انتي ايه مبتمليش
اوتار بدموع والم:انت سكران انت شارب
سراج:ملكيش دعوة المهم تعالي في حضني
اوتار زأته وهو لوى دراعها ودفن راسه في رقبتها:حبيبتي متستفزنيش بصي اهدي خالص استرخي وسيبيني استمتع شوية
اوتار زاته وهو بيضغط اكتر على دراعها وهي صوتت بالم
Back
اوتار زأت عز وقعدت على الكرسي اللي وراها مخبيه وشها بخوف وجسمها بيرتجف
عز اتصدم ولعن نفسه انه كان قاسي عليها قرب منها بعد ايدها عن وشها لقاها اتخضت وبقت تبعد عنه بخوف والدموع في عينها وهو ابتسم بحنان وقلق:حبيبتي انتي خايفة مني متخافيش تعالي اوتار انا اسف اني اندفعت كدا بس انا فعلآ اتضايقت انا اسف
اوتار كانها مغيبة مش سامعه حاجة غير صوت سراج مش شايفة قدامها غير سراج حست انها في كابوس وبقت تعيط:ابعد عني ابعد عني
عز قرب سحبها في حضنه وبيهديها:بس اهدي بس استرخي يا روحي بس اهدي بس انا اسف انا اسف خلاص اوتار
اوتار بتحاول تبعده: ابعد عني هصوت سيبني ابعد عني هصوت لو مسبتنيش
عز فضل ماسكها ومصدوم من اللي بيحصلها وفهم ان كل اللي حصلها بيأثر عليها ولسه مش عارف ممكن توصل لأيه بقى خايف عليها اكتر وهي بقت تضرب فيه لحد مصرخ فيها وخوفه بيزيد عليها : اوووتار فوقي
اوتار اتخضت وبصتله وكانها بتتحقق من ملامحه: انت.... ازاي انا هنا... ازاي انا....
اتنهدت وبصتله بدموع: انا اسفة... انا مش عارفة في ايه واللهي مش عارفة ازاي حصل دا وانا.... معرفش
عز: اعدلي طرحتك ويلا
سابها وخرج من الشقه وهي عيطت وبتعدل طرحتها وحست انها جرحته وهو متضايق انها معاه وسراج مسببلها الخوف دا وعد نفسه انه هيخليه يندم اشد الندم وانه مش هيخليها تتعرض لحاجة زي دي مرة تانية
خرجت وابتسمت بحزن لما شافته:افتكرتك نزلت
عز مدلها ايده وهو مبتسملها بحنان وحب: يلا
اوتار مسكت ايده ونزلت ركبت العربيه ووصلوا وهي مستغربة رايحين فين خبط على الباب
ليلى فتحت الباب وابتسمت وحضنته:انت وحشتني جدا
اوتار اتصدمت وشدت عز لورا
ليلى اتضايقت:اه انتي اوتار اهلا (بصت لعز بإبتسامه)اتفضل
عز مسك ايد اوتار ودخلوا واوتار عينها بتغمق بغضب عز ملاحظ وبص لليلى:فين باباكي
ليلى:مسافر
عز اتنهد بضيق: طب مقولتليش ليه قبل ماجي يا ليلى
سلمى جت ابتسمت وحضنت عز:وحشتني حبيبي عامل ايه
عز ابتسم وحضانها:بخير يا قمر
سلمى بصت لاوتار وابتسمت وحضنتها:ليلى قالتلي انكوا اتجوزتوا بسم الله زي القمر يا اوتار
اوتار ابتسمت بأصطناع:شكرا
اوتار حست بأرتياح لسلمى بس اتضايقت انها حضنت عز
عز حاوط كتف اوتار وابتسملها بحنان وهي ابتسمت وعينها اتحولت للبنفسجي
ليلى بغيظ:طمني عليك
عز:انتي مصرة اني فيا حاجة انا كويس وهي معايا ازاي مش هكون كويس؟
ليلى اتعصبت بس ابتسمت بتكلف:عز ممكن تيجي ثواني عيزاك
عز معرفش يرفض وهز راسه بإيجاب
ليلى فتحت اوضتها واوتار وقفت بضيق ومسكت ايد عز:انا مراته واللي هتقوليه قوليه قدامنا وبعدين انتي مالك بيه اصلا وايه القرابة اللي تربطكوا وبعدين انتي ابوكي مش هنا بتاع ايه تطلبي انه يجي انتي معندكيش حاجة اسمها حرام وحلام
ليلى ضحكت بإستفزاز:ايه يا شيخة احنا متعودين على كدا ايه الحرام اللي عملناه
اوتار:بلاش حرام اللي هتضايقكوا دي بلاش عيب عيب اوي انك تدخلي مع راجل ميقربلكيش اي حاجة مكان مقفول لوحدكوا
عز باصصلها ومتابع بأبتسامه
ليلى اتعصبت:عز انت ساكتلها عجبك كدا
عز ابتسم:غيرانه
ليلى اتعصبت من عز وسلمى اتضايقت من ليلى:ليلى بس كفاية
ليلى:ملكيش دعوة انتي وشكرا اوي يا عز على التهزيق دا انا كنت قلقانه عليك مش اكتر
اوتار بغضب عينها بتغمض:مراته معاه ومش هتسيبه يعاني وشكرا لمشاعرك اللي مش محتاجينها
مسكت ايد عز وعز بص لسلمى غمزتله وهي مبتسمة وشاورتله على اوتار انها جميلة
اوتار بصتله وهو فتح العربية وركبت وهو ركب وهي مبصتلوش وهو كل شوية يبصلها
اوتار بتفكير:انت زعلان مني
عز ابتسم:لاء ابدآ
اوتار:انا مكنش قصدي بس دا غلط وانا مبعرفش اسكت عن حاجه غلط
عز ابتسم:انتي غيرانه ومكنش ينفع اني اتعصب عليكي ولا انتي واخدة عني انهي فكرة
اوتار:اتضايقت منك قبلهم
عز:ليه طيب
اوتار:انت حضنتهم وسيبك من غيرتي دا حرام يا عز مينفعش اللي انت بتعمله دا غلط وهما غلطانين المفروض الواحدة تحافظ على نفسها عشان متتأذيش
عز:منتي محفظة على نفسك وايه اللي حصل جلال وبعدين امجد وبعدين سراج التلاتة بصولك
اوتار:معاك حق يا عز بس لولا اني فعلاً ربنا كان معايا كنت ضعت كان زماني هلكت معاهم
عز بصلها وبص قدامه بيسوق
اوتار:تخيل لو دول اتحطوا في الوضع اللي انا اتحطيت فيه تفتكر هيبقى ايه موقفهم
عز سكت
اوتار:اللي مع ربنا مبيغلبش يا عز بس يكون مع ربنا بقلبه الدين ميتحولش عنده من عبادة لعادة ياما ناس بتصلي وقلبها بعيد عن ربنا وانا نفسي تقتنع بحاجة زي كدا...
عز ساكت ووصلوا اوتار نزلت وهو قفل العربية ونزل طلعوا وهي دخلت اوضتها بضيق غيرت هدومها وصلت ودعت ربها كتير يهديلها عز ويقربه منه وفضلت قاعدة في الاوضة وهو دخل غير هدومه وهي مش بصاله قعد جمبها وابتسم
اوتار بصتله
عز ابتسم ومسك ايدها قربها من شفايفه وباسها
اوتار بعدت عنيها عنه
عز:الجميلة زعلانه بردو
اوتار بصاله ومتضايقة
عز:في ايه يا روحي بس
اوتار:يا عز انا نفسي تتغير انا عمري مشوفتك كدا بقيت تشرب كتير....
عز:منتي دلقتيهم
اوتار:لو عايز تشرب هتشرب
عز حضانها:انا ناوي اتغير فعلاً يا اوتاري
اوتار:يا رب
عز:بتعملي ايه دلوقتي
اوتار:عايزة اقرأ قرءان
عز ابتسم وهز راسه بإيجاب:وانا هقرأ معاكي
اوتار ابتسمت:بجد يا عز
عز ابتسم:بجد يا نور عين عز
اوتار:طيب انا بحب سورة البقرة نقرأ فيها وايه رايك نحفظ ونتسابق ونشوف مين هيداوم
عز ضحك:حيلك حيلك ايه الحماس دا كله
اوتار:عز انا كان نفسي اوي نحفظ سوا من ساعة مشوفتك في اوضة الصلاة نفسي اووي نعمل واحدة هنا يا عز
عز ابتسم:دا بيتك وهيحصل اللي انتي عيزاه الشقة كبيرة وتقدري تختاري اوضة من الاربعة وتعمليها
اوتار ابتسمت:طيب نحفظ ونشوف ديكورات على النت ونشوف سوا
عز:حاضر من عنيا

#رواية_رجل_المهام_الصعبة
للكاتبة/ندى محسن ♕Noody♕
#Nada_Mohsen

عشق قاعدة بتتخانق مع هاشم وبتزعقله
هاشم بضيق:يا بت انتي بطلي زن بقى اكتمي
عشق بغضب:انا لازم اروح فاهم
هاشم:لا مش لازم بكرا مفيش شغل وهتفضلي معايا هنا وانا مش رايح في حته هناكل سوا ونتفاهم وايان لو خرج برا الاوضة انا هضربه ضربت موت امممم زي المرة اللي فاتت دي فاكرة
عشق بصتله بغضب وعايزة تدخل وهو رافض وقاعد بيشرب سجاير وخمرة وهي قرفانه وخايفة منه بس بتداري
هاشم بصلها وابتسم:انا بتضايق لما بشوفك بعيدة تعالي جمبي يلا
عشق جسمها تلج والخوف اتملكها
هاشم:تعالي يا عشق
عشق:انا هسكت بس عايزة انام خليني ادخل لأيان
هاشم:لاء يعني لاء
عشق بصاله بغضب وضيق
هاشم قرب وهو مش متزن وكان هيقع اكتر من مرة وهي عرفت انه سكر بعدت عنه بقلق ومسكت الكوباية: يلا قرب بقى عشان تتنقل على المستشفى تاني
هاشم: تؤتؤ شوشو حبيبتي تعالي انتي حلوة اوي انا عايزك في حضني يا روحي
عشق زأته بعنف وضربته بالألم وهو وقع واتألم وايان خرج بقلق وهي دخلت بسرعه ودخلته وقفلت الباب وابتسموا
ايان: مش هتروحي الشغل بكرا
عشق: هروح هو مش هيفوق بدري وبكرا اجتماع مهم جدا جدا جدا يا ايان لو مروحتش ممكن عمران بيه يتضايق والحمد لله انه متكلمش لما انت نمت في اوضته وطلع انسان شهم
ايان بحزن: مش هتاخديني بردو
عشق بحزن: صعب
ايان ابتسم بأمل: عندي فكرة
عشق: قول
ايان: حطيني في شنطة كبيرة وخوديني معاكي
عشق ضحكت: وهاخد شنطة كبيرة ليه (باست خده وحضنته جامد وهي بتزغزغه) واخدك في شنطة يا لهوي ونفسك يضيق مش مستغنيه عنك انا يا جميل يا صغنن انت
ايان ضحك وبيحاول يفلت منها وهي سابته وهي بتضحك على ضحكه
ايان فجأة ملامحه بقت حزينه وعينه دمعت
عشق بذهول: ايه يا حبيبي مالك
ايان دموعه نزلت واتكلم بصوت كله عياط: هو انا وحش
عشق هزت راسها بنفي والدموع في عينها وكأنها متعلقة بيه بضحكه بتضحك واول ملمحت الدموع في عينه عينها دمعت: ليه بتقول كدا
ايان بدموع: كنت بلعب مع اسلام صاحبي وبعدين ابوه جه وجابله حاجات حلوة وباسه وبقى يضحك معاها واسلام جه يديني باباه بصلي وحش وانا خفت وقولتله مش عايز عشان انا كان معايا وبعدين اسلام هزر معايا وبقى يرخم عليا ويشد شعري وانا بهزر معاه وزأيته وهو بعد وضحك وانا ضحكت بس باباه زعقلي وراح زأني جامد وخد اسلام قاله ميلعبش معايا واني واحد من الشارع
عشق بصاله بذهول ازاي في ناس لسه عقلها محدود للدرجة دي حست بالغضب ومسحت دموع ايان وابتسمت بحب وحنان جابت المرايا: بص بقى انت اد ايه جميل من غير متكلم
ايان: بس انا وحيد
عشق: يمكن جمالك في وحدتك
ايان مسح دموعه
عشق قربت مسكت ايده: بص يا سيدي انت جميل ومختلف والناس بتكرهه المختلف عنهم مش هقولك كلهم بس معظمهم وانت مختلف واحلا ولد في العالم كله ودا مش صح مش اسلام بيلعب في الشارع؟
ايان هز راسه بإيجاب
عشق: هل كدا اقول عليه من الشارع
ايان هز راسه بنفي
عشق ابتسمت: شوفت اننا مختلفين بقى
ايان: هو انا ليه معنديش بابا وماما زي اسلام
عشق بدموع بتمسحها وابتسامه بتحاول تظهرها: هما عند ربنا بابا كان جميل وكان بيحبنا اوووي اوووي
ايان: وماما كانت وحشة
عشق بصتله: ليه بتقول كدا
ايان: عشان نسيت بابا الجميل واتجوزت هاشم الوحش
عشق: ربنا يرحمها
غمضت عينها وهي بتكلم نفسها: مش عارفة ازاي قبلت بكدا قبلت تتجوزه للدرجة دي كلمتين حلوين يخلوها تستسلم وتوافق تتجوزه وتقعده هنا ... ربنا يسامحك ويرحمك...
ايان: عشق
عشق فاقت وبصتله: نعم يا عيون عشق
ايان: هو انا ينفع اكلم عمران بيه دا
عشق بصتله: ليه؟
ايان: اقوله اني هاجي اقعد في مكتبه مش هو قال اننا صحاب
عشق ضحكت غصب عنها: ازاي يعني
ايان: ايوا احنا صحاب خليني اكلمه بس
عشق: لا يا ايان مش هينفع طبعا
ايان كشر: لاء خليني اكلمه
عشق اتنهدت: حبيبي مينفعش والساعه دلوقتي داخلة على 12
ايان: اديني بس انا اكلمه
عشق بأستسلام: لو اترفدت هاخدك ونشحت سوا
ايان ضحك وخد التليفون: اتصلي
عشق اتصلت وفتحت الأسبيكر وادتله التليفون
عمران استغرب انها بتتصل بيه ورد: الو
ايان: مساء الخير
عمران بص للتليفون بإستغراب
ايان: الو
عمران: مين معايا
ايان: انا ايان اخو عشق السكرتيرة بتاعتك
عمران ابتسم: اه اه افتكرتك ازيك يا جميل
ايان ابتسم: انا كويس يا صاحبي
عشق حطت ايدها على بؤها وهي بتكتم ضحكتها
عمران ضحك: ايه بقى ي صاحبي عايز ايه
ايان: عايز اقعد في مكتبك بكرا عشان تعبت من الشارع
عشق بصتله بصدمة وبسرعة خدت منه التليفون: ايااان بس
قفلت السكه وحست بضيق: ازاي تقوله كدا شارع ايه انت عارف ممكن يفكر في ايه دي شركة وهو بيفكر في شكل الموظفين بتوعه وبالذات السكرتيرة بتاعته
ايان: منتي بتسيبيني في الشارع
عشق بغضب ودموع زعقت: وعشان ايه بسيبك عشان مسيبكش معاه يأذيك ولا تشوف حاجات منه ولا يبوظك انت تعرف ان الشارع دا ارحم عليك منه انا مش رايحة شغل انا تعبت انا خلاص تعبت بقى
خرجت دخلت الحمام وهاشم مازال نايم في الأرض سكران ومن غضبها ضربته في رجله
عمران استغرب واتصل وايان رد: الو
عمران: الو حبيبي انت كويس
ايان: ا.. اه... انا اسف انا كنت بهزر معاك
عمران استغرب وبحنان كلمه: هي عشق زعقتلك فين هي؟
ايان: عيطت ودخلت الحمام...
عمران: طب في ايه هي اتضايقت انك كلمتني
ايان: اه
عمران: انت بتقعد في الشارع ليه بقى
ايان: قولت كنت بهزر
عمران: طب انا هستناك بكرا تيجي وتقعد معايا
ايان ابتسم: بجد
عمران ابتسم: اه انت دمك زي العسل وانا حبيتك بتفكرني بواحد عندي هنا بس هو على اطول واعرض واكبر كدا
ايان ضحك: مين
عمران: فكرك هقولك انه حسام اخويا لا طبعاً مش هيحصل
ايان ضحك: منت قولتلي
عمران ضحك: لا محصلش ولا هيحصل نام بقى يا بطل وهستناك بكرا
ايان ابتسم:تصبح على خير
عمران:وانت من اهله يا عسل
قفل وابتسم وايان اتنطت بفرح
عشق دخلت وقفلت الباب بالقفل واستغربت:دا ايه دا
ايان حضانها وباس خدها بوسة طويييلة:اسف
عشق ابتسمت وحضنته:على ايه بقى
ايان:عشان ضايقتك بس هو اتصل وانا قولتله اني بهزر بس هو ضحك معايا وقال انه هيستناني بكرا
عشق اتنهدت:حبيبي...مش هينفع
ايان:بس هو قالي واللهي اتصلك بيه؟
عشق حضنته:انا مصدقاك بس
ايان باصصلها بحزن وهي ابتسمت وباست خده:حاضر هصحيك بدري فيلا نوم
ايان ضحك وبقى يتنطت

#رواية_رجل_المهام_الصعبة
للكاتبة/ندى محسن ♕Noody♕
#Nada_Mohsen

عز: مش يلا بقى
اوتار قاعدة بتلعب على تليفونه: مش عايزة انام
عز نام على رجليها: وهتعوزي امتى
اوتار: مش عارفة بقى نام انت
عز: من غيرك لا
اوتار مركزة في اللعبة وهو مبتسم وقرب باس خدها وبيقربها ليه
اوتار كشرت بطفولية: عز هخسر بس بقى
عز ضحك بغلب: للدرجة دي متجوز طفلة انا
اوتار هزت راسها بإيجاب: اه بس بقى
عز ابتسم وملاحظ تعبيرات وشها
وهنا في رسالة واتس اب اتبعتت لعز بأسم ميمي واوتار قرأتها من فوق: على فكرآ وحشتني انت كمان سألت مالك عنك بس قالي انك جاي وبعدين قالي حصلت ظروف ايه يا عز فينك
اوتار بصت لعز
عز بيهزر: ايه خسرتي ولا ايه
اوتار بصتله وحس بيها مصدومه: في ايه يا اوتار
اوتار مدتله التليفون: رسالة.... انت سايب النت مفتوح....
خد التليفون وفهم سبب تغيرها ودخل اوضته وهي اتضايقت اكتر وافتكرت كلام امجد عن عز بس عز قال وقتها انه اتغير....
عز شوية وخرج مدلها التليفون: خدي كملي
اوتار بصتله ومستغربة ملامحه الخاليه من اي تعبير ولا كأن في حاجة وقفت وهزت راسها بنفي: مش عايزة حاجة انا هنام
دخلت وقفلت الباب من جوا وهو قرب بيفتح لقى الباب مقفول اتنهد: هي متضايقة مش هتفهم ان خلاص مبقاش في حاجه دا كله ماضي وانا قولتلها من الأول انا بالنسبة ليا عادي مبتأثرش واني اخترتها اتنهد ولقى دينا بتتصل رد: نعم هو انا مش قولتلك مش عايزك تكلميني مرة تانية
دينا: في ايه يا عز انا قريت الأخبار واللي اتنشر عنك بس مفرقش معايا
عز: اللي اتقال ملوش اي علاقة بمكلمتي معاكي انا اتجوزت انسي
دينا: نعععم دا امتى وازاي
عز: زي الناس مش عايز اشوف رقمك على تليفوني
قفل واتنهد بضيق: يا ريت تفضلي تثقي فيا يا اوتار
اوتار بتصلي وبتدعي ربنا يهديه وبتعيط هي حاسة بخنقة ومش عارفة في ايه ايه اللي حصل هو عز كان كدا دايمآ ولا ايه اللي اتغير ...
قعدت تعيط بصمت وتدعي وحست ان وجودها مع عز مش كل حاجة وان جوازها من عز حسسها بأفتقاد لحاجات كتير
عز خبط: اوتار
اوتار بصت للباب ومسحت دموعها: نعم
عز: افتحي
اوتار: عز معلش انا محتاجه ابقى لوحدي شوية
عز: عشان خاطري افتحي
اوتار اتنهدت: عز
عز: افتحي بس عايز اكلمك
اوتار قامت وفتحت وهو ابتسمت
عز: حبيبتي انا معرفش ازاي بعتت رسالة انا مكلمتهاش من اخر مرة خرجت مع مالك وسيف ودا كان من فترة
اوتار ساكتة
عز: انتي ساكتة ليه مهو انا مش هسيبك تنامي زعلانة وبعدين من اول متجوزنا واحنا في مشاكل حبيبتي افهميني
اوتار بصاله بضيق: عز انت بتتكلم في ايه افهم ايه انت بتتحايل عليا ولا على ربنا اللي بيحصل دا حرام اي واحدة تاخدها في حضنك اي واحدة تبوسها وهي مش من محارمك انا مكنتش بلاحظ كدا وكنت بتضايق من معاملتك مع تقى
عز بضيق: انا لا بتحايل عليكي ولا على ربنا دا طبعي
اوتار بغضب: دا حرام ومينفعش
عز اتنهد خد نفس عميق بسرعة وخرجه بنفس السرعة ومسك ايدها وهي بصاله وهو باس ايدها:بحبك
اوتار عينها اتحولت للبنفسي وبصتله بمكابرة:مش كفاية
عز:لاء كفاية انا بحبك وعشان بحبك هغير حاجات كتيرة وحشة ومش هتقدري تتعايشي معاها عشان بحبك ههتم بيكي عشان بحبك هراعي ربنا فيكي وعشان بحبك هخليكي تاخدي بإيدي دا مش كفاية
اوتار هديت من طريقة كلامه الدافية وبصتله
عز ابتسم:عرفتي ان الحب بالنسبة لعز كفاية عشان حب عز مختلف بذمتك في راجل بيعمل كدا الأيام دي
اوتار:اه فيه
عز عض شفته بغيرة واضحة:مين يا مدام عز
اوتار ابتسمت:اللي يعرف ربنا صح طبيعي هيراعي ربنا في مراته في شريكته في نصه التاني اللي ربنا ادهوله مش كدا
عز ابتسم:كدا
اوتار ابتسمت وهو حضانها وباس جبينها براحة وهي اتطمنت اكتر هو معندش معاها وخلاص هو اتقبل كلامها وهيدي لنفسه فرص يبقى صح وهي هتبقى معاه ومتطمنة ليه

#رواية_رجل_المهام_الصعبة
للكاتبة/ندى محسن ♕Noody♕
#Nada_Mohsen

عمران في المكتب والباب خبط: ادخل
ايان دخل وهو سعيد ومبتسم وعشق وراه
عمران وقف وسلم عليه وشاله: هووبااا ايه الجمال دا
عشق بإحراج: انا مكنتش هجيبه بس هو صمم انك قولتله...
عمران: طبعآ واي وقت يحب يجي فيه تمام يجي احنا اصحاب
ايان بص لعشق: شوفتي بقى مش قولتلك وانتي مسمعتيش الكلام
عشق: طيب يلا سيبه يشتغل
عمران: هو مش معطلني هو هيقعد هنا ياكل الحاجات اللي جبتهاله وبعدين لو صاحي بدري ينام على الكنبه وانا مش مستني حد فعادي
عشق: لا ملوش لزوم انا هخليه يقعد برا ومش هيشغلني
ايان كشر
عمران ضحك: شوفتي سيبيه بقى
عشق بصت لايان لقيته راضي فابتسمت وخرجت
ايان: هو انت بجد فرحان
عمران: وهزعل ليه بس حد يطول يقعد مع القمر الصغنن دا
ايان ابتسم بفرح
عمران: انا بقى عندي شوية شغل هتقعد سياتك هنا تاكل الشيكولاته والحاجات الحلوة دي لحد مخلص بقى ولو زهقت قولي
ايان ابتسم وهز راسه بإيجاب

#رواية_رجل_المهام_الصعبة
للكاتبة/ندى محسن ♕Noody♕
#Nada_Mohsen

اوتار صحيت ملقتش عز اتنهدت وقامت صلت الصبح وقعت تسبح وقامت دخلت المطبخ لقت ورقه على التلاجة قرأتها: انا سايبلك اي حاجة ممكن تحتاجيها هجيب اكل وانا جاي متتعبيش نفسك واسف اني مصحتكيش بس انتي سهرتي معايا امبارح وكنتي محتاجة ترتاحي وعارف انك مش واخدة على الصحيان بدري بس خلي بالك بقى يا مدام عز هنمشي على نظام جديد من النهاردا عشان تبقي معايا في كل لحظة ولحد مروح الشغل والنهاردا هاجي اخدك ونخرج يا اجمل زوجة في الدنيا.....زوجك وقرة عينك عز
اوتار ضحكت بحب وهي حاسة بالنشاط ومش عارفة تعمل ايه اكل ليه هي حابة تطبخله بإيدها فكرت في غدا رومانسي ولقت الشموع وبصت للزرع والورد اللي في البلكونه قربت تقطع منه بس اتراجعت وهزت راسها بنفي:لاء حرام هتصعب عليا مش لازم ورد كفاية الأضاءة
عز دخل الجهاز وحاسس بحركة غريبة وهما بيبصوله بشيئ من الأستحقار.....

#استودعكم_الله ♥
يا ريت الكل يعمل متابعة لصفحتي بينزل عليها الرواية بدري 👇
Nada Mohsen


اسئلة الحلقة:-
سراج ممكن يعمل ايه هو وتقى؟سارة هتستسلم للي بيحصل؟حياة اوتار وعز ممكن تتأثر بيهم؟ايه اللي ممكن يحصل في شغل عز؟!

الاكثر قراءة هذا الشهر :
رواية رجل المهام الصعبة كاملة 
رواية غروب الروح كاملة 
رواية هنا التقينا كاملة 
رواية عاشقان الروح كاملة 

موعد الحلقة الجديدة الساعة  10 م  يوميا ان شاء الله .

هنا تنتهى احداث رواية رجل المهام الصعبة الحلقة السادسة عشر ، يمكنكم اكمال باقى احداث رواية رجل المهام الصعبة الحلقة السابعة عشر  أوقراءة المزيد من الروايات المكتملة فى قسم روايات كاملة .

نأمل أن تكونوا قد استمتعتم بـ رواية رجل المهام الصعبة ، والى اللقاء فى حلقة قادمة بإذن الله ، لمزيد من الروايات يمكنكم متابعتنا على الموقع أو فيس بوك ، كما يمكنكم طلب رواياتكم المفضلة وسنقوم بوضعها كاملة على الموقع .
تعليقات



حجم الخط
+
16
-
تباعد السطور
+
2
-