رواية هكذا يكون الحب الحلقة الحادية عشر 11 - روايات ايمان جمال

  نقدم اليوم احداث رواية هكذا يكون الحب الحلقة الحادية عشر من روايات ايمان جمال . والتى تندرج تحت تصنيف روايات رومانسية ، تعد الرواية واحدة من اجمل الروايات رومانسية  والتى نالت اعجاب القراء على الموقع ، لـ قراءة احداث رواية لقاء الروح كاملة بقلم يمني الباسل من خلال اللينك السابق ، أو تنزيل رواية لقاء الروح pdf كاملة  من خلال موقعنا .


رواية هكذا يكون الحب الحلقة 11 - روايات ايمان جمال



روايه هكذا يكون الحب الفصل الحادى عشر 

الحلقة_الحادية_عشر
هكذا_يكون_الحب❤
بقلم_ايمان_جمال❤
_____________________________

فيروز في اجتماع مع عبدالحميد، ومهاب وصل الشركة وسأل عليهم وعرف انهم في اجتماع ودخل الاجتماع والكل اتفاجئ بيه
عبدالحميد: تعالى يامهاب
مهاب قعد: اسف ان دخلت كدا
عبدالحميد: ولا يهمك ياحبيبي دي شركتك
مهاب عينه على فيروز اللي بتهرب من عنيه ومش عارفة تركز في الاجتماع وفؤاد مركز معاهم وقلبه بيوجعه وعبدالحميد واخد باله وابتسم على حفيده
عاصم: دلوقتي احنا جاهزين للمشروع الجديد
عبدالحميد: دلوقتي ناقص دراسة الجدوى اللي عاوزينها من فيروز وفؤاد
فؤاد: واحنا جاهزين ناقص بس اننا نراجع الملف كويس اوي سوا
فيروز: ماتقلقش يافندم كل حاجة هتكون كويسة وجاهزين للمشروع
عبدالحميد بص لمهاب اللي متابع الكلام: تمام والتصاميم الباشمهندس مهاب مجهزها
فيروز بصت لمهاب اللي عنيه عليها ومبتسم: التصاميم جاهزة فعلا
عبدالحميد: يبقى كدا تمام، تقدروا تتفضلوا
الكل خرج وفضل مهاب وفيروز وعبدالحميد
عبدالحميد وقف: يالا عشان نرجع سوا الڤيلا
مهاب مسك ايدين فيروز اللي بتهرب منه: اسبقنا انت ياجدو وانا هاجي انا وفيروز سوا
عبدالحميد بإبتسامة: ماشي ياحبيبي
عبدالحميد مشي وفيروز هتموت وتهرب من ادام مهاب.........مهاب: عاوزة تهربي تروحي فين؟
فيروز: مش بهرب
مهاب: طب يالا قوليلي قولتي ايه لما كنا بنتكلم في التليفون
فيروز بخجل: انت سمعتها مرتين
مهاب قرب منها: عاوزة اسمعها وانتي ادامي
فيروز بتوتر: مش هعرف
مهاب بيقرب اكتر: لا هتعرفي
فيروز متوترة بسبب قربه دا ومش عارفة تقول اي حاجة ولا تعمل حاجة وساكتة
مهاب بيهمس جمب ودانها: يالا قوليها
فيروز بخجل وبصوت هامس اوي: بحبك
مهاب سمع بس بيستعبط: ماسمعتش
فيروز: لا انت سمعت
مهاب: اسمعها تاني وتالت ورابع
فيروز بخجل: تؤ خلاص
مهاب بيقرب منها عشان يبوسها وفجأة الباب اتفتح وكان فؤاد وفيروز بعدت بسرعة عن مهاب
فؤاد بأسف: ماكنتش اعرف ان انتم هنا
مهاب بغضب: في باب تخبط عليه
فؤاد: ماكنتش اعرف والله ان حضــ........
مهاب قاطعه: كنت جاي ليه؟
فؤاد: نسيت الملف الخاص بالمشروع
مهاب مسك الملف من على ترابيزة الاجتماع وسلمهوله: اتفضل
فؤاد اخد الملف وخرج وباردوا قلبه بيوجعه
فيروز بعتاب لمهاب: ليه زعقتله يامهاب كدا
مهاب بصلها: زعلانة اني زعقلتوا؟
فيروز: بصراحة اه
مهاب زعل لانه غيران عليها: تمام يالا عشان نروح
فيروز حست ان مهاب اضايق ودا ضايقها اوي بس مشيت معاه من غير كلام وطول الطريق مهاب ساكت، وبعد شوية وصلوا الڤيلا وقبل مافيروز تنزل بصتله: مهاب
مهاب بيبص ادامه وماردش عليها
فيروز: ممكن ترد عليا
مهاب اتكلم من غير مايبصلها: انزلي
فيروز بعند: لا
مهاب بصلها: يبقى انا اللي هنزل
مهاب نزل وسابها في العربية ودخل جوا وهي زعلت اوي ودمعة من عنيها نزلت ومسحتها ودخلت وراه
عبدالحميد شافهم داخلين بس كل واحد لوحده وباين عليهم زعلانين، مهاب دخل وقعد معاه وفيروز قعدت معاهم باردوا
باسم بيبصلهم: في ايه مالكم؟
مهاب بغضب: مافيش
عبدالحميد بشك: الواضح ان فيه حاجة
مهاب سابهم وطلع مضايق
عبدالحميد بص لفيروز: في ايه يافيروز؟
فيروز بدموع: مافيش ياجدو
سراج: خلاص يابابا سيبهم براحتهم
فيروز طلعت اوضتها وبتعيط
باسم لخلود وشروق: اطلعوا شوفوا مالها وانا هطلع اشوف الاستاذ دا
البنات طلعت لفيروز وباسم طلع لمهاب
باسم: ايه يا استاذ انت مالك؟
مهاب بغضب: باسم مش ناقصك
باسم قعد: طب قول مالك
مهاب حكاله انه غيران عليها
باسم ضحك اوي ومش قادر يتكلم ومهاب اضايق ومسك المخدة وخبطها فيه
باسم وهو بيضحك: خلاص خلاص
مهاب: قوم من ادامي
باسم: يعني زعلان منها اوي كدا عشان غيران عليها وقالت انها زعلانة انك زعقتله
مهاب: يعني اللي حصل مش مستاهل اني اضايق؟
باسم: لا ياسيدي يستاهل........سكت شوية وكمل بخبث: بس انت زعلان انه دخل المكتب من غير مايخبط ليه هو انتوا كنتوا بتعملوا ايه؟
مهاب بغضب: اطلع بارة ياباسم
باسم طلع بارة وبيضحك اوي
عند البنات بيضحكوا هما كمان عاللي حصل
فيروز بغضب: اطلعوا بارة يارخمين
دخلت عليهم صافي: بتضحكوا على ايه ضحكوني معاكم
فيروز بغضب وصوت عالي: اطلعوا بارة
البنات طلعوا بيجروا
شوية والكل اتجمع عالسفرة ومهاب مركز في الأكل ومش بيبص لفيروز وهي زعلانة اوي من كدا واللي مزعلها وقالقها اكتر ان زعله دا مجرد غيرة فياترى لو عرف اللي حصل معاها هيعمل ايه وفضلت قلقانة اوي ومتوترة
عبدالحميد: مهاب، بالليل في عشا عمل وبعد اذنك هاخد فيروز معايا
مهاب بصله وبصلها وهي مستنية تسمع رده: مين هيكون معاكم؟
عبدالحميد: عاصم وفؤاد
مهاب اول ماسمع اسم فؤاد: وانا هاجي ياجدو معاكم
عبدالحميد بفرحة: انا كنت عاوز اقولك بس خفت تقول لا
مهاب وهو باصص على فيروز: لا ياجدو هاجي معاكم
عبدالحميد: ماشي ياحبيبي
باسم بيضحك ومش عارف ياكل......مهاب بصله بغضب: براحة لتشرق
باسم ضحك اوووووي وقام بسرعة من على السفرة قبل ما مهاب يخنقه
مهاب قام وبص لوفاء: فوفا خليهم يجيبولي القهوة في الجنينة
وفاء: ماشي ياحبيبي
مهاب خرج وقعد لوحده وفيروز خرجتله بالقهوة
مهاب بصلها وهي واقفة ماسكة القهوة
فيروز: انا اللي عملتهالك
مهاب بيبصلها وساكت واخد منها القهوة وباردوا ساكت
فيروز قعدت جمبه: انا اسفة
مهاب من غير مايبصلها: على ايه؟
فيروز: عشان انا قولتلك اني زعلانة عشان زعقت لفؤاد
مهاب بصلها: يعني عارفة انك غلطانة؟
فيروز بصت في الأرض: انت اللي شايف كدا مش انا
مهاب بغضب: طلاما مش شايفة نفسك غلطانة بتتأسفي ليه؟
فيروز: عشان انت زعلان مني
مهاب بغضب: سبيني لوحدي
فيروز بعند: لا
مهاب قام: خليكي وانا اللي هدخل
فيروز وقفت ومسكت ايده لدرجة ان القهوة وقعت وهي حطت ايديها على بوقها: انا اسفة
مهاب بغضب قرب منها وبيبص في عنيها وشايف خوفها وسابها ودخل
فيروز لنفسها: ياربي بقى
فيروز دخلت عملت قهوة جديدة وطلعتله فوق وخبطت ودخلت وهو كان قاعد في بلكونة اوضته
مهاب بصلها: ايه ناوية توقعيها هي كمان
فيروز قعدت جمبه: لا
مهاب اخد منها القهوة وبدأ يشرب فيها وفعلا طلعت حلوة ومظبوطة
فيروز قربت منه وباسته من خده وبسرعة قامت من جمبه بس ايديه كانت اسرع منها ومسكها
مهاب: اللي حصل دلوقتي دا؟
فيروز بخجل وبتهرب بعنيها عنه: مافيش
مهاب بيقربلها: مافيش ازاي؟
فيروز: خلاص يامهاب ابعد
مهاب بخبث: لا
فيروز بخجل: ماتزعلش مني
مهاب بهدوء: انا بغيير عليكي وزعلت منك بجد لما قولتي كدا
فيروز بصتله: انا مش قصدي اني بدافع عنه انا بس اضايقت لما اتحرج عشان حطيت نفسي مكانه
مهاب قرب منها اوي: طب سيبك من الموضوع دا وقوليلي انتي عملتي ايه الوقتي
فيروز بخجل بصت في الأرض وسكتت
مهاب رفع وشها: بحب اشوف عيونك
فيروز بخجل: طب ابعد
مهاب: تؤ
فيروز بتوتر: ممكن اسألك سؤال؟
مهاب: اكيد
فيروز: ايه ممكن يزعلك مني ويبعدك عني؟
مهاب بصلها اوي: ليه بتسألي السؤال دا؟
فيروز بتوتر: ها...لا ابدا بس حبيت اسأله
مهاب: اللي يخليني ابعد عن روحي فعلا هي انك تكدبي عليا في حاجة كبيرة او تخونيني
فيروز قلبها دق اوي وبان عليها انها خايفة بس مهاب ماركزش وما اخدش باله من توترها
فيروز بخوف: ماشي
مهاب: ها ماقولتليش ايه اللي حصل من شوية
فيروز ابتسمت: انت لسة فاكر؟
مهاب قرب اوي: قولي بقى انك بتهربي
فيروز بتبعد عنه: انسى انا كنت بس بصالحك وبعدين قربك ليا دا غلط
مهاب: عادي كلها شهرين ونعمل الخطوبة واكتب كتابي عليكي
فيروز خوفها زاد اوي: طب مانخلي كتب كتابنا قبل فرحنا
مهاب بيقرب منها وبيهمس: ماهو فرحنا مش هيبقى بعيد اوي يعني بعد خطوبتنا بشهر واحد
فيروز: ها.....بتقول ايه؟
مهاب باسها من خدها برقة: فرحنا بعد تلات شهور من دلوقتي
مهاب سابها ودخل حمام اوضته وهي دموعها نزلت اوي منها وخايفة وبترتعش جامد وسابت الاوضة وراحت اوضتها

في المساء، في ڤيلا مهاب العمري، مهاب(الصغير) وصل ودخل وابوه ومرات ابوه وريماس بنتها قاعدين
مهاب(الصغير): مساء الخير
الكل: مساء النور
فايز: اخليهم يحضروا ليك العشا ياحبيبي؟
مهاب(الصغير): لا يابابا انا هتعشى مع جدي عبدالحميد......سكت شوية وبص حواليه: امال فين مهاب؟
ناني: في اوضته فوق اصله تعبان شوية
مهاب بقلق بص لأبوه: ماله يابابا؟
فايز: دوخة بس بسيطة وقولتله يكشف مش راضي يسمع الكلام
مهاب طلع لأوضة جده وخبط ودخل ومهاب(الجد) كان صاحي: تعالى ياحبيبي
مهاب(الصغير) قعد وبصله: مالك؟
مهاب(الجد) بتعب: تعبان بس شوية
مهاب(الصغير): ليه ماكلمتش الدكتور بتاعك؟
مهاب(الجد): هيقولي ايه يعني؟ اكيد ذي كل مرة اني ارتاح وبعدين خلاص هي شكلها النهاية
مهاب(الصغير) رد بسرعة: بعد الشر عنك
مهاب(الجد) فرح اوي: خايف عليا؟
مهاب(الصغير) بصله وساكت
مهاب(الجد) بتعب: عاوز انام يامهاب
مهاب(الصغير) بسرعة قام وظبطله المخدة ورا دماغه وقلبه واجعه على جده وخايف عليه وباس دماغه ولسة هيتحرك جده مسك ايده: بطلب منك في آخر ايامي انك ماتخبيش حبك ليا يامهاب
مهاب غصب عنه دمعة نزلت من عنيه وبصله: انت اللي عملت كدا
مهاب خرج وساب جده زعلان على حال حفيدع بس اقسم بينه وبين نفسه انه يقربه منه
مهاب دخل اوضته اخد دش ولبس بدلة شيك ونزل ركب عربيته وراح ڤيلا جده عبدالحميد
فيروز بتجهز عشان عشا العمل ولبست دريس شكله حلو جدااا لونه كاشمير وعليه حجاب افوايت وكوتشي ابيض ووضعت القليل من احفر الشفاه، جهزت ونزلت تحت
عبدالحميد: انا جاهز، مهاب لسة مجاش؟
مهاب دخل: انا جيت ياجدو
عبدالحميد: طب يالا هنتحرك بعربيتك
مهاب: ماشي.....وبص على فيروز وقرب منها: ايه الحلاوة دي
فيروز بصت للأرض بخجل ومهاب قرب من ودانها وهمس: ايه اللي على شفايفك دا
فيروز بتوتر: روچ
مهاب: وحطاه ليه؟
فيروز بصتله: حبيت احطه
مهاب قرب اكتر: لو متشالش دلوقتي حالا هشيله انا
فيرود بصتله بغض وخدودها اتلونت بلون الخجل من كلامه وهو ضحك عليها وخرج يستناها في العربية
شروق قربت منها: في ايه مالك واقفة ليه؟
فيروز: مافيش، هاتيلي منديل
شروق: ليه؟
فيروز: عشان ابن عمتك عاوزني اشيل الروچ
شروق ضحكت: انا لو منك ماتشيلهوش، وخليه هو يشيله....وغمزتلها
فيروز بغضب: شرووووووق هاتي منديل
شروق جابت المندي وفيروز مسحت الروچ وخرجت
مهاب شافها: ايوا كدا شفايفك احلى
فيروز بصتله بغضب وركبت في الكرسي الخلفي لان عبدالحميد جمب مهاب في الكرسي الامامي، مهاب اتحرك للمطعم اللي هيكون فيه عشا العمل
في الطريق:
مهاب: خالو سراج وخالو ايمن ماجوش معانا ليه؟
عبدالحميد: هيجوا ورانا
مهاب: ماشي
مهاب بيبص على فيروز في المرايا وبيغمزلها وهي اتكسفت وبصت في الأرض
وبعد شوية وصلوا المطعم واول مافيروز نزلت مهاب مسك ايديها
فيروز: سيب ايدي
مهاب بهمس: لا كدا حلو
فيروز بخجل: وحياتي يامهاب
مهاب: حياتك اغلى ماعندي بس انا عاوز الكل يعرف انك ليا
فيروز بصتله بحب ودخلت وايديها في ايديه
عبدالحميد وصل لترابيزة العشا: مساء الخير
الكل اللي قاعدين: مساء النور
الترابيزة كان عليها مدير شركة ضياء الخاص بفرع مصر (عامر) ومدير الحسابات الخاص بشركته وكان زميل ضياء في الشغل في مصر (عادل) ومدير شركة تانية باردوا تبع الهندسة وكان اسمه (عاطف) ومدير حساباته (تامر) ومدير الشئون القانونية (علي) واللي كانوا موجودين من شركة عبدالحميد فؤاد وهدى وطبعا فيروز
مهاب وفيروز قعدوا جمب بعض وفؤاد مش قادر يشيل عينه من عليهم ودا مضايق مهاب اوي
فيروز حست ان مهاب مضايق: حبيبي مالك
مهاب بصلها: وربنا لو ماشال عينه من علينا هقوم امسك فيه
فيروز ابتسمت على غيرته: ممكن نركز بس في اللي جايين عشانه وبعد كدا نشوف هنعمل ايه
مهاب بضيق: طيب
وشوية وسراج وايمن وصلوا وانضموا ليهم
عبدالحميد اللي بدأ بالكلام: دلوقتي احنا التلات شركات هنكون موجودين مع بعض في مشروع واحد وعاوزين شغل كويس
عامر: ماتقلقش ياعبدالحميد كل حاجة هتمشي صح.......وبص لفيروز: مش انتي خطيبة ضياء؟
مهاب بصلها وهي اتوترت وخافت وردت: لا كنا جيران
مهاب رد عليه: دي خطيبتي انا
عامر: اصل شفت ليها صورة مع ضياء مرة على الواتس اب ولما سألته قالي خطيبتي
مهاب اضايق اوي وبيحاول يتحكم في اعصابه وفيروز اتوترت وماردتش على عامر
وعبدالحميد رد: دي فيروز سكرتيرتي الخاصة وبعتبرها حفيدة من احفادي وتبقى خطيبة مهاب حفيدي
عامر لمهاب: الف مبروك
مهاب: الله يبارك فيك
شوية والعشا نزل على الترابيزة وفيروز معدتش عارفة تاكل ومهاب على اخره
مهاب بص لجده: جدو حضرتك لسة محتاجنا في حاجة؟
عبدالحميد بإستغراب: ليه في ايه؟
مهاب بهدوء: لا ابدا بس حابب اني امشي انا وفيروز
عبدالحميد بص لفيروز اللي باين عليها الخوف: لا خليكم معانا كملوا العشا
فيروز بصوت واطي: معلش ياجدو احنا هنسبق حضرتك على الڤيلا وحضرتك تيجي مع عمو سراج وعمو ايمن
عبدالحميد بص لمهاب وهمسله: وربنا لو زعلتها يامهاب لهزعل منك زعل جامد
مهاب بصله وابتسم ابتسامة كأنه مش عاجبه الكلام 😏: تمام
مهاب مسك ايديها وخرجوا وهو مضايق وركبوا العربية من غير ولا كلمة وسايق بسرعة كبيرة
فيروز بخوف: مهاب هدي السرعة شوية
مهاب مش بيرد عليها وسايق بسرعة
فيروز بدموع: مهاب كفاية
مهاب وقف العربية بسرعة لدرجة ان عجل العربية عمل صوت وفيروز اتخبطت في الازاز
مهاب بغضب: تقدري تفهميني ايه اللي حصل دا
فيروز بألم ماسكة دماغها وبتبصله: انا عاوزة اروح
مهاب بصلها بغضب: مش هتحرك من هنا غير لما تفهيني
فيروز بدموع وعياط بسبب دماغها اللي اتخبطت حكتله كل حاجة تخص ضياء ماعدا اللي حصل بينهم: دا كل اللي حصل
مهاب بغضب: وانتي حضرتك مقضياها صور معاه، وكنتي معايا مش سامحة ليا حتى اقولك وحشتيني
فيروز بصتله بصدمة ورجعت بصت ادامها بتوهان: روحني يامهاب لو سمحت
مهاب مضايق انه قالها كدا بس هو فعلا زعلان وشغل العربية واتحرك بيها وبعد شوية وصلوا الڤيلا وفيروز دخلت وطلعت على اوضتها بسرعة والكل مستغرب انهم رجعوا بدري
باسم لمهاب: ايه اللي رجعكوا بدري كدا ؟
مهاب بغضب: مافيش
شروق بشك: حصل ايه يامهاب؟
مهاب بغضب: في ايه ماقولت مافيش
باسم إتأكد ان اكيد في حاجة طلاما مهاب متعصب كدا ومضايق
خلود لشروق: تعالي نشوفها في ايه
باسم للبنات: وجهزوا ليها العشا لان اكيد طلاما رجعوا بدري يبقى هي ماتعشتش
خلود وشروق طلعوا فوق ليها وباسم واقف يبص لمهاب وعاوز يفهم في ايه
مهاب: هتفضل واقف باصصلي كدا كتير؟
باسم واقف ومربع ايده عند صدره: مستني حضرتك تقولي حصل ايه
مهاب بضيق: مافيش ياباسم
باسم بغضب: انجز وانطق وادامي على الجنينة عشان تحكي
باسم ومهاب خرجوا الجنينة، والبنات فوق بيحاول يهدوها
شروق: ممكن تهدي وتبطلي عياط
فيروز بصوت مبحوح وماسكة دماغها: شروق هاتيلي تلج
خلود بقلق: في ايه مالك؟
فيروز بعياط: اتخبط في دماغي في العربية وبتوجعني اوي
شروق نزلت بسرعة تجيب تلج وصافي عرفت ان فيروز زعلانة وراحت تقعد معاهم
شروق دخلت بالتلج: خدي ياحبيبتي
صافي: في ايه مالها؟
خلود: دماغها اتخبط ووارم
شروق بتحطلها التلج على دماغها وهي بتعيط وبس
تحت عند مهاب وباسم
باسم بهدوء بعد ماسمع اللي حصل: انت غلطان يامهاب
مهاب بغضب: عارف اني متنيل غلطان بس اعمل ايه انا اضايقت ياباسم حط نفسك مكاني
باسم بهدوء: لو انا حطيت نفسي مكانك هتعامل بالعقل يامهاب مش هقول اللي انت قولته دا
مهاب: اهو اللي حصل بقى
باسم: اتفضل اطلع صالحها
مهاب: لا
باسم: هو انت يابني آدم انت مش لسة قايل ان جدك قالك لو زعلتها هيزعل منك
مهاب: مش هصالح حد
باسم: هي باقت حد يامهاب؟
مهاب بصله وسابه وخرج من الڤيلا كلها
البنات نزلوا من عند فيروز وسابوها تنام
وفاء: هي عاملة ايه؟
شروق: تعبانة ياماما
باسم: هي نامت ولا؟
خلود: نامت ياحبيبي بس دماغها وارمة مكان الخبطة
باسم: خبطة ايه؟
صافي: اصلها بتقول انها اتخبطت في العربية
باسم بإستغراب: ازاي؟!
شروق: اصل مهاب كان سايق بسرعة ووقف فجأة فدماغها اتخبطت
شروق وهي بتتكلم دخل جدهم عبدالحميد وسمع كل حاجة واتكلم بغضب: باسم كلمه خليه يجي حالا
باسم مسك تليفونه وبيرن على مهاب وتليفونه مقفول: قافل تليفونه ياجدو
عبدالحميد بغضب: تفضل وراه لحد مايفتحه
عبدالحميد طلع لأوضة فيروز وخبط ودخل وهي كانت نايمة بس هو عرف انها بتحاول تهرب في نومها وباين عليها
عبدالحميد وقف ادامها: عارف انك صاحية
فيروز فتحت عنيها وبصتله وقامت: انا فعلا صاحية ياجدو
عبدالحميد قعد جمبها: احكيلي ايه اللي حصل من مهاب؟
فيروز بدموع: اقولك حاجة وماتزعلش مني؟
عبدالحميد: اكيد مش هزعل
فيروز:مش عاوزة احكي حاجة بيني وبينه عاوزة مشاكلنا ماتخرجش
عبدالحميد بإبتسامة: عارفة كل يوم بتثبتيلي اني فعلا كان عندي حق لما فكرت انك تكوني حفيدتي في اول يوم شفتك فيه
فيروز حضنته اوي وعيطت: جدو انا تعبانة اوي
عبدالحميد بيحضنها بحنان: مالك ياقلب جدو
فيروز: الدنيا جايا عليا اوي، خوفي بيذيد كل مامهاب بيزعل مني على اي حاجة خايفة يجي اليوم اللي يبعد عني فيه عشان يكون زعلان مني في حاجة او يزهق مني
عبدالحميد بصلها: مهاب بيحبك رغم اني مضايق منه بس والله بيحبك
فيروز: عارفة ياجدو بس انا بجد خايفة اوي
عبدالحميد: ماتخافيش خالص طول ما انا جمبك
فيروز: ربنا يخليك ليا ياجدو
عبدالحميد بيبص على دماغها: بتوجعك؟
فيروز: مش اصعب من وجع قلبي ياجدو
عبدالحميد: سلامة قلبك من الوجع، يالا ننزل عشان تتعشي عشان انا ما أكلتش كويس في المطعم وناكل سوا
فيروز ابتسمت ونزلت معاه تحت وهما نازلين كان مهاب داخل الڤيلا
عبدالحميد بغضب: اهلا بالباشا
مهاب وقف بيبص لجده ولفيروز: اهلا ياجدو
عبدالحميد بغضب: مهاب مش عاوز اشوفك ادامي
مهاب بغضب وبيبص لفيروز: هي لحقت تحكيلك
عبدالحميد قرب من مهاب وبغضب: لأول مرة احس ازعل منك اوي كدا
مهاب اضايق عشان فعلا دي اول مرة جده يزعل منه اوي كدا: انا معملتش اي حاجة عشان حضرتك تزعل مني
عبدالحميد بصوت كله غضب: لما تزعلها دا مايزعلنيش لما تتسبب في خبطها في دماغها بسبب سواقتك اللي بسرعة دا مايزعلنيش
مهاب بص على فيروز وعلى دماغها وهي لابسة حجابها بس باين انه وارم وفي مقدمة دماغها حمرا اوي وقلبه وجعه اوي وبص لجده: انا ماكنتش اقصد اني اخبطها وبعدين ماحضرتك عارف كل حاجة اهو ماهي حكت لحضرتك اهي
عبدالحميد بغضب: عارف بقى هي قالتلي ايه؟
فيروز قاطعته: بعذ اذن حضترك ياجدو ماتقولش حاجة وخليه هو فاهم غلط
مهاب بصلها: انا من حقي افهم
فيروز وقفت ادامه وبتحدي: لا يامهاب مش من حقك تفهم اي حاجة
فيروز سابتهم وطلعت اوضتها وبتعيط جامد
عبدالحميد: عاجبك كدا
مهاب اضايق اوي عشانها وعارف انه غلط في حقها وقرر يطلع وراها بس عبدالحميد وقفه
عبدالحميد: ماتطلعش وراها يامهاب سيبها تهدى
مهاب: لا لازم اطلع واتكلم معاها
شروق: لا يامهاب بعد اللي هي قالته دا الأحسن انك تسيبها تهدى
مهاب سابهم وخرج بارة الجنينة وكان مضايق اوي

تاني يوم الصبح البنات صحيت وخرجوا بدري عشان عندهم محاضرة الساعة ٨ ورغم ان فيروز تعبانة جدا بس ماحبتش تضيع المحاضرة ولا حتى شروق تحضرها مكانها، بعد شوية وصلوا الجامعة وفيروز باين عليها التعب
شروق بقلق: لسة حاسة بتعب؟
فيروز: شوية واللي مضايقني اكتر ان التعب في دماغي وبطني
شروق بتفهم: طب وجع بطنك وعرفنا سببه لكن الخبطة عاوزاكي نروح للدكتور يشوفك عشان لو كانت صعبة وخصوصا انها بتوجعك اوي
فيروز: لا هي هتخف لوحدها
شروق بيأس: طيب يافيروز

في الڤيلا مهاب صحي وراح اوضة فيروز بس مكانتش موجودة واستغرب بس قال ممكن تكون تحت ونزل بس باردوا ماكنتش موجودة
مهاب: فين فيروز؟
ليلى: خرجت هي وشروق بدري عشان عندهم محاضرة الساعة ٨
مهاب قعد على الفطار معاهم وجده زعلان منه عشان زعل فيروز: هتفضل زعلان مني كدا؟
عبدالحميد بصله: زعلان عشان اتصرفت غلط
مهاب بزعل: غصب عني ياجدو
عبدالحميد: اتكلم معاها
مهاب: حاضر
باسم بص لخلود: يالا عشان اوصلك الجامعة
خلود: ماشي يالا
باسم وخلود خرجوا ومهاب لسة في الڤيلا
صافي: أبيه ممكن توصلني الدرس؟
مهاب بإبتسامة: اكيد طبعا، يالا تعالي
صافي خرجت مع اخوها وفي الطريق اتكلمت معاه انه يصالح فيروز
مهاب: بصي ياقلبي انا مش زعلان منها انا زعلان اني زعلتها مني واوي كمان وهي رافضة تتكلم معايا
صافي: معلش يا أبيه عشان بس انت زعلتها فلازم تستحمل
مهاب ابتسم: ماشي ياشقية
بعد شوية صافي وصلت مكان الدرس ومهال راح شركة جده مهاب، مهاب وصل بهيبته اللي بتجذب اي حد ودخل مكتبه وقلع چاكيت بدلته وقعد يشوف شغله وبعد شوية دخلت السكرتيرة
اسماء: مستر مهاب، بعد نص ساعة في اجتماع مهم
مهاب بإستغراب: اجتماع ايه؟!
اسماء: جد حضرتك طلب انه يعمل اجتماع عشان في حاجة مهمة حابب الكل يعرفها
مهاب: تمام يا اسماء روحي انتي وهاتيلي قهوتي
اسماء: حاضر
اسماء خرجت ومهاب قاعد يفكر في الاجتماع اللي جده عامله دا وعشان ايه اصلا وخرج وراح مكتب جده وخبط ودخل وابوه كان جوا
مهاب: انت هنا يابابا
فايز: اه ياحبيبي تعالى
مهاب قعد وبص لجده: حضرتك عامل اجتماع ليه؟
مهاب(الجد): هتعرف كمان شوية
مهاب سكت وباردوا مستغرب، بعد شوية جه وقت الإجتماع والكل قاعد مستني يسمع قرار مهاب العمري
مهاب(الجد): طبعا كلكم مستغربين انا ليه عملت الاجتماع المفاجئ دا وكمان ان الشركة كلها سمعانا في السماعات اللي بارة انا قررت قرار وحبيت ابلغكم بيه
الكل ساكت ومستني
مهاب(الجد): انا قررت ان اسلم الشركة كلها لحفيدي مهاب
مهاب اتفاجئ بقرار جده: ازاي ياجدو؟
مهاب(الجد) فرحان بكلمة جدو: كدا ياحبيب جدك، انا خلاص تعبت من الشغل وهسيبلك الشغل ليك انت وابوك وتشوف الشركة ماشية ازاي
مهاب(الصغير): بس ياجدو دي مسئوليّة كبيرة اوي
مهاب(الجد): وانت اداها يامهاب
الكل فرحان بمهاب الصغير وخلاص الإجتماع خلص ومهاب الصغير وجده وابوه لسة قاعدين، ومهاب الصغير بيبص لجده وساكت خالص
مهاب(الجد): مبروك يامهاب
مهاب(الصغير): ليه عملت كدا؟
مهاب(الجد): انا خلاص تعبت ومش قادر اكمل الشغل كمله انت وابوك وانا هرتاح في البيت خلاص جه وقتكم
فايز: احنا كلنا تحت امرك يابابا
مهاب(الجد): عاوز اسمع ردك يامهاب
مهاب(الصغير): حاضر
مهاب(الجد): حاضر يا أيه؟
مهاب(الصغير) بصله وابتسم: حاضر ياجدو مهاب(الجد) فتح ايده: تعالى في حضن جدك ياحبيب جدو
مهاب(الصغير) جري على حضن جده وعيط جامد وكأنه كان مستني حضن عشان يخرج كل اللي جواه
مهاب(الجد): حقك عليا اسف انك زعلان مني جامد بس والله كان غصب عني
مهاب(الصغير) بدموع: خلاص ياجدو انا نسيت اللي فات
مهاب(الجد): هنبدأ من جديد ونكون سوا، وكمان هروح لعبدالحميد النهاردة كفاية بعد بقى
مهاب(الصغير) بصله اوي: بجد انا مش مصدق ان حضرتك اتغيرت كدا
مهاب(الجد): العمري معتش فيه حاجة يامهاب وانا خلاص الأيام اللي فاضلالي هعيشها ليك ولأختك وبس
مهاب(الصغير): يعني صدقت انها اختي وانها بنت ابنك؟
مهاب(الجد): ايوا ياحبيبي وحقك عليا على اي حاجة حصلت مني وزعلتك
مهاب(الصغير) حضن على جده اوي وفرحان بس لسة قلبه زعلان عشان فيروز، وفجأة قام
مهاب(الجد): رايح فين؟
مهاب(الصغير): ورايا مشوار هخلصه ونتقابل في ڤيلا جدو عبدالحميد
مهاب(الجد): ماشي ياحبيبي
مهاب الصغير نزل وركب عربيته وراح شركة جده لان اكيد فيروز شوية وتوصل الشركة

في الجامعة، البنات خلصت محاضرات وخلاص هيروحوا
فيروز بتعب واضح: انا هروح الشركة
شروق: بلاش شغل النهاردة وانتي تعبانة كدا
فيروز: لا ياحبيبتي انا كويسة وبعدين فيه شغل مهم الفترة دي
شروق بيأس: طيب، ويالا هوصلك بعربيتي
شروق وصلت فيروز للشركة، فيروز دخلت الشركة واتفاجأت باللي شافته

**************

الحلقة خلصت
ياترى ايه اللي شافته فيروز؟
ضياء ناوي على ايه لما ينزل مصر؟
مهاب هيعمل ايه لما يعرف اللي مخبياه فيروز هل هيسامح ولا هيبعد عنها؟
احمد هيبعد بهدوء ولا هيفضل يهددها بكلامه؟


موعد الحلقة الجديدة الساعة  6 م  يوميا ان شاء الله .

هنا تنتهى احداث رواية هكذا يكون الحب الحلقة الحادية عشر ، يمكنكم قراءة احداث رواية هكذا يكون الحب الحلقة الثانية عشر أوقراءة المزيد من الروايات المكتملة فى قسم روايات كاملة .

نأمل أن تكونوا قد استمتعتم بـ رواية هكذا يكون الحب ، والى اللقاء فى حلقة قادمة بإذن الله ، لمزيد من الروايات يمكنكم متابعتنا على الموقع أو فيس بوك ، كما يمكنكم طلب رواياتكم المفضلة وسنقوم بوضعها كاملة على الموقع .
تعليقات



حجم الخط
+
16
-
تباعد السطور
+
2
-