رواية جريمة عشق الجزء الخامس الفصل الثاني والاربعون 42 | روايات مريم نصار

    نقدم اليوم احداث رواية جريمة عشق الجزء الخامس مملكة ميراث العشق الفصل 42 من روايات مريم نصار . والتى تندرج تحت تصنيف روايات رومانسية ، تعد الرواية  واحدة من اجمل الروايات رومانسية  والتى نالت اعجاب القراء على الموقع ، لـ قراءة احداث رواية اسيرة العادات والتقاليد كاملة بقلم مريم نصار من خلال اللينك السابق ، أو تنزيل رواية جريمة عشق 4 pdf كاملة  من خلال موقعنا .


رواية جريمة عشق الجزء الخامس الحلقة 42 | روايات مريم نصار



 مملكة ميراث العشق الفصل الثاني والاربعين


فصل ٢٢ ج 1

رواية جريمة عشق 5

(مملكة ميراث العشق)

لأنه هو اللہ .. رحمته فوق المدى ؛
فوق التّخيل ؛ و فوق الحدود
فالخير قادم .. وأكثر مما نريد

================================

بسم الله نبدأ.

أسم الكاتبة الحقيقي : شريهان ابراهيم.
الإسم الحركي للكاتبة : مريم نصار.

فيلا مصطفى عزيز..

مصطفى : في الفون لسعيد.. خلاص بقى ياعم سعيد متزعلش..

سعيد : لأ ازعل طبعاً..لما الاقيك منزل أستوري إنك خطبت..!! وفاجأة كدا يبقى أزعل..

مصطفى : منا قولتلك ياسعيد هي حاجه على الضيق كدا..

سعيد : بعتاب.. حاجه ع الضيق؟ أنت بتهزر يامصطفى؟

مصطفى : يابني هو أنت مش عارف إن عندهم حالة وفاه..؟
وجدي وبابا قالوا قراية فاتحه بس..عشان مشاعر معرفش مين..بقولك ايه. أنت بس متزعلش.. وليك عليا في الفرح أنت هتكون أول واحد يعرف.. وهنخربها يازميلي..

سعيد : ماشي ياعم.. وألف مبروك. أنا افرح أنك هتعقل وتتلم..

مصطفى : بتريقه.. أعقل؟ هو لسه الجنان ظهر.. دا انتوا داخلين على أيام مش واضحه من جنان مصطفى عزيز.. يلا على الله حكايتكم..

سعيد : أبو جنانك يا أخي. فقدت الامل فيك..

مصطفى : بسخريه.. أمل حياتي هو الجواز فيه عقل؟ ده تكفير ذنوب يبني.
المهم ياعم الزعلان.. كوكي عامله ايه؟

سعيد : ههههه كوكي؟ لأ كوكي تمام..لما اروح اقولها بقى.. ياكوثر مصطفى حبيبك ارتبط بواحده تانيه غيرك..

مصطفى : مصمم تكسر قلبها..؟ أنا بحب كوثر برضه لكن چيناتا غير متوافقه..هي قرده وانا مصطفى..ومينفعش..!!لكن هنعمل ايه؟ ما باليد حيلة..ربنا معاها بقى..وهي أكيد هتعزرني..

سعيد : بدهشه..ولا يامصطفى أنا مش عايز جنان بجد..هو برج واحد إللي فاضل في نفوخي..

مصطفى : طيب سلام أنت بقى عشان معايا مكالمه على الويتنج.وهنتقابل بكره.. وقفل ورد..

مصطفى : بنرفزه.. الو نعم..!!!

چود : بضحكه..الو. اذيك يا تيفا..!!

مصطفى : بتحذير..تيفا؟ إيه تيفا دي كمان؟ أسمي مصطفى عزيز. فاهمه..

چود : عوجت بوقها..اه مصطفى عزيز..

مصطفى : اه يختي مش عاجبك ولا ايه؟ وبعدين انتى متصله ليه؟ ليكي عين تكلميني بعد عملتك المهببه..؟

چود : ههههه اهدا بس ع نفسك ياوحش الكون.. والله أنت إبن حلال وتستاهل.. ده انا كنت لسه بفكر إني....!!!

مصطفى : بغيظ .بتفكري في إيه؟ عايزه تعملي فيا إيه تاني؟
متجيبي صباره وترشقيها في دماغي. عشان تستريحي. يابت متخلنيش احطك في دماغي..

چود : بتريقه.. لأ بليز بليز حطني في دماغك..
هتعمل ايه يعني ياسي مصطفى عزيز باشا..؟

مصطفى : بمكر.. إللي بيعمل مابيقولش يابنت رودي.. بس عليا النعمه..لاتشوفي بعد كتب الكتاب أيام عنب..

چود : بتحدي أكبر.. وحيات أمي وأمك ولا تقدر تعمل حاجه..
يبني أنت ناسي شكلك والشطه في بوقك.. هههههههه يلهوي ياجدعان. دانت كنت بتعيط.. والعيله.فكرت إنك بتعيط من الفرحه.هههههه

مصطفى : رفع حاجبه وقال.. وماله اضحكي اضحكي..
أنا عايزك كدا تضحكي ليوم كتب الكتاب.. وتبقى على ذمتي.. دي كوثر هتفرح بيكي أوووي..!!

چود : رغم قلقها منه .لكن قالت بغيره..
كوثر مين دي إن شاء الله؟ دي مش أول مرة تقولي على الإسم ده. أسمع يالا انت..؟
أقسم بالله العظيم..لو الحوار فيه واحده ست.. لاخليك تقضي طول عمرك في المستشفى أنت وست كوثر بتاعتك دي..

مصطفى : رقص حواجبه وقال..الهوي اجودعان.. الهوي عليك يابطل وأنت غيران على حبيبك..
عتلاق ولا حريم الدنيا تساوي رمشه من عينك ياتراب القمر اعسل أنت..!!!

چود : غيرتها بدأت تهدا.وقلبها مبسوط.لكن قالت بتوتر.. وبعدين بقى معاك..هو أنت كل مانتكلم لازم تقول الكلام ده.؟ مش هينفع كدا..

مصطفى : يابت هو انا قولت حاجه.. ده انا مستني لكتب الكتاب..

چود : بتحذير..ولااا أنت تقصد إيه بالظبط؟

مصطفى : قصدي كل خير يختي..هو أنتي أصلا بتعرفي تقولي كلمتين حلوين على بعض؟

چود : ولما أنت عارف بقى؟ بتتكلم ليه يعسل؟

مصطفى : نفخ بنفاذ صبر.. ماشي ياسكر.. سيبي كل حاجه لوقتها. أصلا أنا اتفقت مع بابا يكلم جدو طارق عشان يقرب ميعاد الفرح..

چود : بصدمه..فرح إيه؟ وفرح مين؟

مصطفى : من بين أسنانه فرح كوثر ياچود..
أنتي هتستهبلي.؟
.فرحنا أنا وأنتي..هنتجوز قبل الدراسه..عشان نروح الجامعه مع بعض..

چود : بلعت ريقها بصعوبه وقالت.. لأ مش هينفع..

مصطفى : بسخريه..ليه. مش هتقدري تجيبي طقم الصيني؟
بقولك ايه كلها يومين وجدو وبابا يتكلموا مع عيلتك..ولو متكلموش أنا هتكلم. أنا عايز اتجوز واخلص بقى..!!

چود : هزت راسها يخربيت جنانك يا مصطفى.. أنت طلعت بح مفيش مخ خالص...!!

مصطفى : بتريقه..مخ؟ وانتي تعرفي حاجه عن المخ؟ المهم اخوكي چواد نجح ولا زي كل سنه..

چود : هيهي خفه.. لأ زي كل سنه..

مصطفى : بضحكه.. لأ ده كدا بقى نيجي ونبارك لچواد وحلاوة چواد وجمال چواد وا......

چود : بصوت عالى ماخلاص ياعم المسمسم.. هتقضيها حوارات ومعرفش إيه؟

مصطفى : روحي ياشيخه ربنا يسد نفسك..

چود : آمين.. يلا بقى سلام علشان رايحه اتغدا..

مصطفى : كلي يختي كلي.. أنا عايز فستان الفرح مايدخلش فيكي أشطا؟

چود : ببرود من عونيا.. أنت تؤمر..يلا سي يو.. وقفلت..

مصطفى : بص للفون..وقال..سي يو ليتر.. يا بنت رودي..!!!

------------------بقلمي مريم نصار.

فيلا العدوي.. في جناح آدم..

آدم : واقف قدام المرايا بيسرح ..

مريم : دخلت في صمت... وشافت آدم..وقعدت على الكنبه. مخنوقه وبتستغفر..

آدم : كشر عينيه وقال بإستفهام.. مالك ياروحي؟

مريم : بتنهيدة تعب.. آدم حفيدك يا آدم..!!

آدم : هز راسه.. أممم.. لأ واضح أنه مضايقك..
واللي يضايق أميرتي.. يبقى في تصرف تاني.. وقعد جمبها.. وقال..عمل ايه حفيدك؟

مريم : بزعل حقيقي.. حفيدك عصبي جداً..ولازم يتحكم في تصرفاته..
تخيل يا آدم.. أنه أهان كرامة آرين؟ وفي وجود آريان وكريم..!!!

آدم : كشر عينيه وقال بتعجب.. أهان كرامتها؟ لأ احكيلي بقى؟ إلا احفادي البنات.. قوليلي عمل ايه؟

مريم : إللي حصل....................!!! وحكت كل إللي حصل واللي هي قالته لأدم..

آدم : أبتسم.. وقال.. أنتي علمتي حفيدك درس مش هينساه طول العمر..
أما بقى من ناحية تصرفه..فهو غلطان أكيد.. بس الغيره يا أميرتي.. الغيره والحب والخوف يعملوا أكتر من كدا..

مريم : بتعجب .الحب يهين الكرامه يا آدم؟ يقولها أمشي من قدامي؟وهي معملتش حاجه كبيره..!!!

آدم : بنفي. لأ طبعاً.. الحب بيرفع من مقام الطرفين.. لكن في بعض التصرفات وقت الغيره..بتخلي العاشق أعمى..لكن لما يهدا هيعرف غلطه.. وأنا ليا حساب مع حفيدي..

مريم : شهقت.. لأ لأ يا آدم. أنت عايز حفيدي يقول إني قولتلك..؟ أنا بفضفض معاك لاني ماليش غيرك. وأنت سري. وأماني..

آدم : ضحك بصمت..خايفه على زعل حفيدك يا اميرة آدم..!!!

مريم : أبتسمت بتنهيده.. طبعاً ده الغالي إبن الغالي..

آدم : مسد ع ضهرها..وقال.. متقلقيش حفيدي أخد منك درس هيفوقه أكيد..!!

مريم : إن شاء الله..
إنما قولي يا آدم..أنا سمعتك بتتكلم مع حد الصبح في الموبيل..وبتقول خليك وراه لحد ما تعرفلي كل حاجه.. مين ده؟

آدم : أبتسم.. وقال.. ده شغل خاص.. وانا مش عايز أميرتي الجميلة تشغل تفكيرها بأي حاجه..
المهم بقى.. إن حفيدتي تالين نجحت.. نفكر ليها ف هديه تليق بيكي وانتي بتقدميها ياروحي..!!

مريم : بضحكه صافيه.. أيوه فعلاً تالين تستاهل كل خير.. والحمدلله على نجاحها..وكمان عايزين نطمن ع باقي أحفاد العيله ونبارك ليهم..

آدم : أبتسم..وأمبراطور قلبك هيطمنك..
حياة وچواد نجحوا في آخر سنه..وكارما نجحت في تانيه.
ورعد لسه بقى هتصل عليه اطمن على بنته هي تقريباً في تالته ثانوي..!!

مريم : بفرحه.. مبارك علينا وعليهم..

Автор: Меріам Насар

عند رينو..

رينو : بضحكه...أستنى بقى يا آيو ألبس الجاكت ده عشان متبردش..
أنا مصدقت خفيت من البرد.. ويلا بقى عشان ننزل نطمن على ناناه.. وتالين..!!

آيان : هز راسه ليها وبيلاغي. ومش عايز يلبس..

رينو : ضحكت..وقالت اااه لو بابي فهد هنا. كان هو أتصرف معاك..مش عارفه بيقنعك إزاي..هو و آرين..

آيان : مش فاهم حاجه وبيلاغي..

رينو : ضحكت..طيب يلا بقى هات إيدك القمر دي..

آيان : صرخ ومش عايز...!

جرس الباب رن..

آيان : سمع الجرس..وسقف وزحف بسرعه عايز يخرج من الاوضه..وقعد ورا الباب وبص ل لارين..!!

رينو : ضحكت.. وشالته.. وقالت..تعالى نشوف مين؟ مش معقول يكون آركان لأنه عند بابا طارق..معرفش بيختفي ليه كتير الفتره دي..
ومش ممكن يكون بابي فهد..!! وفتحت الباب..

آرين : واقفه قدام الباب..وعينيها حمرا من العياط.. ودخلت.في صمت..

رينو : فتحت عينيها بدهشه..وهمست آرين؟ وقفلت الباب بسرعه..ونزلت آيان. وقالت. آرين ياحبيبتى أنتي معيطه ليه؟

آرين : بعياط مكتوم..مفيش حاجه يامامي أنا كويسه.. ودموعها نزلت ومسحتها بسرعه..

آيان : مسك فستان آرين وبيرفع أيد وعايزها تشيلو..

آرين : شالته.. وباسته من خدو..وساكته..

آيان : ضحك ليها..وباسها. وسقف..

رينو : بغموض..!! مالك يا آرين؟

آرين : هزت راسها بزعل..وقالت..مفيش حاجه صدقيني يامامي.. أنزلي حضرتك..وسيبي آيان معايا.انا مش هنزل.

رينو : مسكتها من دراعها..وقالت بهدوء..تعالى اقعدي. عايزه اتكلم معاكي شويه..

آرين : قعدت.. وآيان في حضنها..وقالت بحزن..نعم يا مامي..!!

رينو : بجمود في كلامها.. أنا ممكن انزل دلوقتي. وأسأل العيله إيه إللي حصل.؟ علشان بنتي تطلعلي معيطه بالشكل ده؟
ووقتها معرفش ايه إللي ممكن يحصل.. أو أبوكي لو عرف بحاجه زي كدا.هيعمل ايه..!!!

آرين : هزت راسها وعيطت بصوت عالى.. لأ يامااامي لأ محدش من العيله زعلني أو حتى ضايقني..
كل ده بسبب آدم.. أنا مش هتكلم معاه تاني.. ارجوكي يا مامي.. أنا عايزه أرجع شقتنا القديمه..

رينو ؛ بقلق..طيب أهدى ومتعيطيش.. احكيلي حصل إيه من آدم؟ وايه اللي يوصلك للعياط بالشكل ده؟

آرين : بشهقات..حا...حاضر هقولك على كل حاجه.. إللي حصل إني.................!!! وحكت كل حاجه...

آيان : بيسمع آرين..وبيلاغي بصوت عالى ومتنرفز عشان آرين بتعيط..

رينو : أبتسمت..

آرين : مسحت دموعها وقالت بتعجب..حضرتك بتضحكي يامامي؟

رينو : بضحكه رقيقه..قالت.. طبعآ أضحك.. لأنك بتعيطي من غير سبب..!!!

آرين : بزهول..كل ده وبتقولي من غير سبب؟ ده قالي أمشي من قدامي وزعقلي..ده طردني يامامي؟

رينو : بنفي.. لأ أبدا ياحبيبتى.. آدم مايقصدش أنه يطردك..
أنتي لو فكرتي بهدوء..ف تصرف آدم تجاهك..
هتلاقيه غيران عليكي.. وحبا فيكي أتصرف بالشكل ده..
هي أيوه الطريقه غلط لكن مش مقصوده.. الغيره في حد ذاتها شيء جميل..
ومعاكي لو زادت عن حدها بتقلب لمشاكل كبيره. لكن آدم غير فهد..
فهد غيرته محتومه مافيش فيها رجوع.. لكن آدم بيتنرفز..وبعدها يهدا ويفكر..
آرين ياحبيبتى.. أنا اكتر واحده مجربه الغيره من باباكي.. هي حب. وعشق كبير..
وأنا حاولت كتير إني أغير من فهد بخصوص الغيره لكن فشلت..
لأنه طبع..وديما يقولي أنا كدا..ربنا خلقني كدا..

آرين : بدموع..بس آدم أحرجني اوي يامامي.. وأنا معملتش حاجه غلط..

رينو : بتنهيده.. طيب انا هسألك.. أنتي شايفه تصرف آدم تجاهك حب ولا كره؟

آرين : خرجت منها تنهيده... وساكته...

رينو : أبتسمت..وقالت.. أنا عارفه إجابتك..هي حب.. ومش حب وبس..
آدم معندوش حد غالي قدك يا آرين.. ومتأكده إنك لايمكن تهوني عليه..

آرين : هزت راسها..وقالت بحزن.. إن شاء الله..

رينو : طيب أنا عايزاكي تفكي التكشيره دي.و يلا قومي اغسلي وشك.. علشان ننزل للعيله..مامي أكيد منتظرانا..

آرين : هزت راسها برفض.. لأ سوري يا مامي. أنا مش هنزل أنهردا ممكن؟

رينو : مسدت على خدها..ممكن ياروح قلبي.. تعالى يسي آيان..

آيان : خبى وشه في حضن آرين..ومش عايز يسيبها..

آرين : أبتسمت بحب كبير.. وضمت آيان لحضنها..وقالت.. سيبي آيو معايا يامامي..

رينو : قامت..طيب امسكي لبسيه الچاكيت ده.. علشان تعبني معاه..وهيسمع كلامك..
وأنتي روقي ياروحي. علشان بابي لو شافك كدا؟ اليوم مش هيعدي على خير..

آرين : هزت راسها حاضر.. أتفضلي انتي ومتقلقيش عليا.. وارجوكي متقوليش لادم أي حاجه..

رينو : حاضر ياحبيبتى..و ودعتها.. وخرجت..

آرين : بتلبس آيان الچاكيت..واتكلمت بدموع..وقالت.. طيب قولي أنت يا آيان..
أنا عملت ايه لكل ده؟ وليه ديما بيتعصب عليا.. ودلوقتي يقولي أمشي من قدامي ويحرجني قدام العيله؟
لأ لأ أنا لايمكن اسامحه المرادي.. أنا مش هتكلم معاه تاني بجد ي آيان..

------------------بقلمي مريم نصار.

ف الجهاز..

مراد : تمام يافندم..

المدير : تمام ياسيادة العقيد. أنت والعقيد فهد.. تتحركوا للمهمة دي بليل.
وهترجعوا خلال يومين تلاته بالكتير. والعربية الخاصه هتكون موجوده الساعه ٩ مساءاً في المكان المحدد..

مراد : تحت امرك يافندم.. ولكن بعد إذنك هنرجع البيت نجهز لكل حاجه..وهنتحرك على الميعاد..

المدير : هز راسه وهو كذلك..

Автор: Меріам Насар

فيلا العدوي..

آدم نزل مع اميرته.. والعيله بدأت تتجمع.. ويباركوا ل تالين..

زينب : جابت شربات ووزعت ع الكل..

آدم : أبتسم.. ألف مبروك نجاح ولادك يازينب..

زينب : بسعاده.. إلهي يبارك ف عمرك ياسي آدم بيه. ياكُبارة ياسيد الناس..
والله..والله يسي آدم بيه لولاك أنت وست الكل. ماكنا وصلنا للفرحه الكبيره دي..

آدم : أستغفر الله..متقوليش الكلام ده تاني يازينب.. كل ده بفضل الله..
وتعب ومجهود أحمد أبنك.. الولد ده انا متوقعله مستقبل أفضل في الهندسه..هي حلم عمره..وهيحققه إن شاء الله..
ومش عايزك تحملي هم أي مصاريف.. احمد زي ما قولتلك قبل كدا..
وهقولهالك تاني . أحمد ودعاء..زي احفادي.. ومسؤولين مني لحد ماجوزهم إن شاء الله..

زينب : عيطت بفرحه وأمتنان..وقالت..
..طيب أدعي ليك واقول ايه ولا ايه.. والله العظيم ياست مريم.. أنا كل صلاه وانا ساجده بدعي ليكي أنتي وسي آدم بيه.. يرزقكم بركة في العمر وزيادة في الرزق.. وسعادة الدارين.. بدعي زي ما بسمعك بتدعي ياست الكل يانوارة الدنيا كلها..مش المملكة وبس.. ربنا يجبر بخاطركم زي ما تجبرو بخاطر ناس كتير أوي..

مريم : عيونها لمعت. وضحكت. وقالت.. وبعدين معاكي يازينب..هتخليني أبكي ليه؟ يلا هاتي الشربات بقى.. وهدية دعاء عندي..بس بكره إن شاء الله..

زينب : بسعاده..من عينيا أحلا كوباية شربات لست الكل وسيد الناس. اتفضلوا.وحطت الشربات..واتحركت بسرعه وبتزغرد..

آدم : ضحك بصمت..وقال برضو مصممه..

مريم : بابتسامة..زينب كلامها على الفطره ودي حاجه جميله فيها..
المهم ياحبيبى..حفيدك مش موجود؟ ياترى راح فين.؟

آدم : بهدوء.. هنعرف دلوقتي.. وشاور ل تالين..

تالين : قعدت جمبه وقالت بابتسامه رقيقه..نعم يا جدو..

آدم : ربت ع ضهرها.وقال عيون جدو ياتالين.. ألف مبروك ياروحي.

تالين : الله يبارك ف حضرتك..

آدم : قوليلي بقى..نفسك في إيه؟

تالين : بحرج.. حضرتك وبابا مش حرمني من أي حاجه..هعوز إيه غير سلامتكم..

آدم : مسد ع حجابها بابتسامه وقال.. وده واجبنا ياحبيبة جدك.. إحنا معملناش أي حاجه زياده عن حقوقكم..
المهم بقى إنك أصغر حفيدة للعيله..وانهردا يوم نجاحك ونجاحنا كلنا..ولازم يكون ليكي هدية. و تيتة مريم هي بنفسها إللي هتقدمهالك..ودي فرصه..اختاري وقولي..

تالين : بابتسامة..حضرتك بجد أنا مش ناقصني حاجه..
ولا محتاجه لحاجه.. الحمدلله انا عندي كل حاجه..الصحه والستر. وأهل مفيش منهم. والعيلة الجميله. اللي كلها حب ودفا..هحتاج لايه تاني..

آدم : أبتسم بحب كبير. وباس راسها..وقال.
تعرفي ياتالين.. أنتي بتفكريني بأجمل ايام عمري.. لما قابلت جدتك..فيكي كتير جدا منها..ونفس الرضا والقناعه..

تالين : بضحكه صافيه..ياااه ياجدو.. أنا بشبه أميرتك معقول؟

آدم : بمكر..هو مفيش حد زي أميرة آدم..لكن نقول فيكي كتير جدا منها. لكن مش كلها...
وضحك

تالين : ضحكت..طبعا.. وربنا يبارك ف عمرها وعمر حضرتك..

آدم : آمين..اومال أخوكي آدم فين؟

تالين : بإستفهام.. انا نزلت لأبيه آدم. وبارك ليا.. وراح على صالة التدريب بتاعته..وقال مش عايز حد يزعجه..

آدم : هز راسه.أممم.. تمام..تمام..

رينو : ألف مبروك يافريحه.. أنتي تستاهلي كل خير..

فريحه : بسعاده..الله يبارك فيكي يارينو ياحبيبتي..

رينو : أبيه مراد عرف بنجاح توتا..؟

فريحه : بضحكه.. لأ لسه..بتصل عليه وكنسل عليا. وبعتلي رساله أنه داخل على إجتماع مهم..

رينو : ربنا معاهم..

مريم : هي آرين منزلتش معاكي ليه يارينو يابنتي.؟

رينو : بتوتر.. أحم. أبدآ يامامي.. قالت إنها هتقعد فوق مع آيان.

آدم : أنا هتصل عليها تنزل وهتتغدا معايا.وهتسمع كلام جدها..

رينو : أبتسمت.. أكيد هتسمع كلام حضرتك..

نور : وصلت وباركت للكل..

زين وريتال.. وصلوا..وسلموا على العيله..وباركوا ل تالين..

زين : ألف مليون مبروك ياقلب عمك.. ومن بكره أحلا هديه فيكي يامصر هتكون لتالين حبيبتي..

تالين : ميرسي جدا ياعمو..ربنا يبارك ف حضرتك..

ريتال : زين.. انا كنت واعده ليليان بهديه بس انشغلت الفتره دي..إيه رأيك ناخد توتا وليليان عند الجواهرجي.. ويختاروا اللي هما عايزينوا..

زين : ويرحوا ويتعبوا نفسهم ليه؟ بكره كل حاجه تكون قداهم ويختاروا برحتهم..
وبص لامه..وقال..وست الكل كمان تختار اغلا واجمل حاجه..

مريم : بابتسامة..ربنا يكرمك بكرمه يازين يابن قلبي وروحي..

آدم : بص ل زين وشاور بعينيه على تمارا..

زين : فهم..وقال..وكمان تمارا مرات أبني حبيبتي..تختار أحسن حاجه..

تمارا : بفرحه..ميرسي جدا يا بابا..فرحت جدآ لاهتمامك. لكن مالوش داعي... خير ربنا كتير وعندي..

زين : ابتسم بحب..وفهم قصد أبوه..وقال. وانا عندي كام مرات إبن..وبعدين ياتيما انتي وليليان بنتي واحد.. وزيك زيها بالظبط.. أنتي أم حفيدي العسل ده.. تعالى لجدو ياواد يامحمد..

تمارا : قامت بفرحه..وحطت محمد بين ايديه..

زين : بابتسامه..باسه من خدو.. وقال..واد يامودي..لما تكبر هتقولي جدو ولا بابا زين؟ ها..

محمد. : فاتح عينيه وباصص لزين..

زين : بضحكه.. أنا لسه صغير.. أنت تقولي يا أبيه زين ايه رايك؟

الكل ضحك..

زين : قام وقعد جمب آدم.. وبيلاعب محمد.. وقال بهمس..شكرا ياحج..

آدم : بنفس الهمس.. أوعى في يوم تفرق بين بنتك ومرات إبنك.. أوعى تفتح باب للشيطان إسمه التفرقه يازين يابني..

زين : بنفي.. لأ والله مش كدا خالص ياحج..وأنا مش مقصر خالص..ومش قصدي..
وتمارا بنتي وبنت أختي قبل ما تكون مرات أبني آريان..

آدم : حتى لو غربيه..خلي بالك من النقطه دي كويس جدا.
حتى لو مش معاك ومش مقتدر...وقدرتها وجبرت بخاطرها..مش هتنسى ليك الموقف ده..وديما هتحس أنها زيها زي اي حد موجود..

أنت عايش معانا وشايف معاملتنا مع فريحه وريتال.زيهم زي نور و لارين مفيش فرق بينهم..

جنس حوا حساس جداً يابني وأي كلمه وموقف يأثر فيهم..
هتجيب لليليان؟ يبقى تجيب لتمارا..ولو مش مقتدر.. تجيب أن شاله هدية بسيطه.. المهم إنك تعدل.. العدل أساس الملك.. وطول مافي عدل.. استحاله هتلاقي ضغينه أو فتنه..فهمت يابن العدوي..؟

زين : أبتسم بحب وقال .فهمت..فهمت يا أمبراطور..!!

في صالة التدريب..

آدم مراد : بيضرب كيس الملاكمه كأنه عدو واقف قدامه.. ومتنرفز جدآ. علشان آرين..

وقال لنفسه بغضب..مكنش ينفع تجرحها وتحرجها قدام أي حد يا آدم..مكنش ينفع..!!!

أنت اييييه؟ نسيت كلام الإمبراطور بالسرعه دي؟

ومسك كيس الملاكمه وبينهج..وقال بخنقه. أنا مش عارف أنا بيكي رايح فين يا آرين ياعدوي..!!!

------------------بقلمي مريم نصار.

بعد شويه..

مراد وفهد رجعوا البيت..

مراد : بفرحه..ضمها لحضنه .ألف مبروك ياتوتا.. ألف مليون مبروك ياحبيبتى..

تالين : بفرحه..الله يبارك ف عمر حضرتك يابابا..

فهد : مبروك يا تالين.. فرحتلك اوي ياحبيبتى.

تالين : ميرسي جدا ياخالو..

فهد : بص حواليه..وقال فين آرين و آركان و آيان؟

رينو ؛ بإبتسامة.. آرين نازله حالا ياحبيبى..ليليان وتمارا راحوا يجيبوها هي و آيان..

أما آركان بقى قال إنه هيقضى اليوم عند جدو طارق..وبتصل عليه مردش..

آدم : بهدوء.. أنا إللي طلبت من آركان أنه يقضي اليوم مع جدو..وكمان طلبت منه كذا حاجه كدا.. متقلقوش عليه..!!!

فهد : هز راسه وقعد. وبص ل مراد ف اشاره معناها اتكلم أنت..!!

مراد : مسح ع شعرو بتوتر وهز راسه ليه..تمام.. وقال. أحم.. فريحه ..

فريحه : بابتسامة..نعم يا مراد..

مراد : عايزك تجهزي شنطة سفر صغيره كدا ليومين.. هنتحرك انهردا الساعه تسعه..!!

فريحه : فتحت عينيها بصدمه..وقالت ايييه؟ هتسافر؟

والكل انتبه..

مراد : ضحك..وقال. لأ مش هسافر في أي مكان.. لكن طالع مهمه هنا في مصر يومين تلاته بالكتير انا وفهد..
وقبل ما حد يقول حاجه..هي مهمه خفيفه عاديه يعني..وهتصل وهتكلم معاكم عادي في أي وقت..يعني حاجه خفيفه وحلوه..

آدم : بص ل مراد بقلق..

مراد : بضحكه.. متقلقش ياحج..ده جمع شوية معلومات ع السريع كدا.. زي مهمة الصيف اللي فات...

آدم : هز راسه.. تمام ربنا معاكم..

رينو : بصت لفهد..بخوف..

فهد : هز راسه ليها..وقال..مهمة سهله جدا..وكل شويه هتصل عليكي..متقلقيش..!!

رينو : اتنهدت بإستسلام..وقالت ربنا معاكم..

فريحه : هزت راسها بحزن . وقالت..ربنا يحفظكم.. بس آدم أبني مش هيطلع معاكم صح؟

مراد : هز راسه لأ... آدم أجازه..

فهد : نفخ بخنقه ومسح وشه وشعرو بايدو..

آدم مراد : واقف ع السلم.. وسمع كل حاجه. وأبتسم بخبث..!!! ورجع على اوضته تاني..

مريم : دعت لأولادها من قلبها. واتمنت ليهم السلامه..

آرين : داخله البيت ومحرجه..وعينيها في الأرض. ومدورتش ع المرعب كالعادة..

فهد : أبتسم.. آيان حبيب فهد..تعالى.

آيان : نزل وزحف بسرعه لفهد..

فهد : شاله..وباسه. وقال بضحكه..عامل ايه دلوقتي.. أخيرا البرد اختفى.

رينو : الحمدلله.. بقى احسن بكتير..

فهد ؛ شاور ل آرين..تعالي ياقلب بابي..

آرين : قعدت جمب فهد.. وقالت.. حمدالله على سلامتك يا بابي

فهد : باس جبينها..الله يسلمك يا روحي..عامله ايه انهردا..

آرين : بتمثيل.. أنا كويسه أوي أوي.. وغصب عنها رفعت عينيها لكن مكنش موجود.. وأول مره تستريح لعدم وجوده..

Автор: Меріам Насар
وقت الغدا.

الكل أتجمع.. وآدم مراد بيتغدا في صمت تام.. وبيفكر إزاي يصالح ضيه..

بعد فتره..

فهد : نازل الاسانسير مع رينو..وقال بغيره.. أنا عايزك انتي و آركان و آرين.. ترجعوا على شقتنا القديمه..

رينو : بتعجب..غريبه..!!
أنت طول عمرك تقولي أفضل هنا عشان خوفك علينا.. دلوقتي بتطلب العكس؟ ممكن أفهم..؟

فهد : بخنقه..هو انا كل حاجه هقولها هقدم ليها تفسير.. هو مش ده طلب آركان ولا أنا غلطان؟..

رينو : بزعل.. لأ مش غلطان يافهد. ومش لازم تقدم تفسير.. أنا أسفه. هعمل إللي أنت عايزو..

فهد : مسح وشه وشعرو بنرفزه..ومسك ايديها وقال.. اسف..مش قصدي.. لكن صدقيني انا بعمل كدا لمصلحة آرين..!!

وغمض عينيه..وافتكر حريق الشقه..ونفخ بخنقه كبيره وقال..
لكن مش هينفع برضه ترجعوا الشقه القديمه..

رينو : بعدم فهم.. إيه التناقض ده؟ مالك يافهد.. أنت بقالك فتره مش عجبني..

الاسانسير فتح وخرجوا..

فهد : وقف قدامها.. وقال..مش تناقض ولا حاجه يا لارين..
انا فعلاً عايزكم تروحوا الشقه..لكن افتكرت الخطر إللي ممكن تكونوا فيه.
وخصوصاً إننا لسه منعرفش مين إللي حرقها او اتحرقت إزاي؟ وأنا مقدرش إجازف بأي حد من عيلتي..وبرضه.هنا انا...!!!!

رينو : بتنهيده.. هنا آدم مراد مش كدا يافهد؟

فهد ؛ بص بعيد ومردش.

رينو : لفت وشه ليها وقالت..مشكلتك إنك بتحب آدم جدآ..وشايف فيه نفسك..
وكمان آدم إبن أخويا عمره ما اتعدى حدوده مع اي حد موجود في العيله سواء بنات أو شباب.

إبن أخويا بيتصرف بعقلانية يافهد.. والمفروض تبقى واثق فيه أكتر من كدا..

وكمان تبقى واثق فيا.. لأني مش هتهاون مع بنتي يا فهد..!!!

فهد : بنفي.. لأ.. أنا مقولتش انك بتتهاوني يا لارين ارجوكي افهمي كلامي كويس.. وأنتي عارفه طبعي.
وكل تصرفاتي دي بعيده عن الثقه..
أنا مليون مرة بقولك إن ثقتي فيكي أكبر من العالم..لكن...!!!

واتنهد وسكت..ومش عايز يقولها إن آدم اتقدم لبنته..

رينو : بتكشيره..لكن ايه يا فهد..؟

فهد : أخد نفس عميق..وحط ايدو ع خدها. وقال بتمني..
مفيش حاجه يالارين..وانا واثق فيكي وف بنتي.. ارجوكي خلي بالك منها.. وشهادتها بكره..ياريت تطمنيني..

رينو : حطت ايدها ع أيدو..وقالت بابتسامه..حاضر ياحبيبي..
أول ما تيم يجيب النتيجه..هتصل عليك فوراً.. المهم انت خلي بالك من نفسك..ارجعلي..

فهد : باس جبينها وغمض عينيه بتنهيده.. وبعد عنها.. وأبتسم. وقال.. لا اله إلا الله يانجمتي..

رينو : بدموع مكبوته..سيدنا محمد رسول الله..

مراد. وفهد سلموا على الكل..و خرجوا..

آدم مراد : من غير ما يبص ل آرين..قال.. انا هوصلكم.. وشغل العربيه..

فهد ومراد ركبوا.. وودعوا العيله..

آرين : شاورت لابوها..وبتمسح دموعها..ودعت ليه من قلبها..

آدم مراد : ساق بسرعه..وخرج من الفيلا..

آرين : بعياط. أنا هطلع بعد اذنكم..

آدم : حاوطها من كتفها وضمها لقلبه وقال.. مفيش طلوع وحفيدتي بتعيط..
حفيدتي هتطلع تنام وهي في قمة سعادتها.. تمام.؟

آرين : بحزن.. أنا زعلانه جدا يابابا آدم..!!

آدم : أبتسم بحب.. الزعل مسيره يختفي ياحبيبة جدك.

------------------بقلمي مريم نصار.

في مستشفى النور..

تيم : دخل مكتب مريم..وقال ميرو..الساعه تسعه..يلا ياحبيبتى علشان نرجع ع البيت..عايزين نبارك لتالين..

ميرو : قامت بتعب..وقالت يلا يا حبيبي..لو تعرف أنا انهردا اشتغلت كتير جدا..

تيم : أبتسم..قولتلك وقت الغدا.. اروحك بس أنتي صممتي تكملي..

ميرو : حبيبي انا مبسوطه.. وخصوصاً إني بشتغل وأنت جمبي..المهم طمني اخبار كامليا إيه؟

تيم : ضحكته اختفت..وقال بخنقه..زي ما هي الحروق من الدرجة التانيه..وخلايا في وشها ادمرت حرفياً..
ولازم ليها عمليه.. بعد أسبوعين..هبدأ فيها..

ميرو : أبتسمت..ربنا يجازيك كل خير.. وأنك ترجع إبتسامة إنسان من جديد..ثوابها عظيم عند ربنا..

تيم : مسح ع شعرو.. وأبتسم بغيظ..وقال نروح؟

ميرو : ضحكت من قلبها..وقالت نروح يادكتور عصبي..

تيم : ضحك..طيب هاتي شنطتك ويلا بينا..

ميرو : بفرحه.. أكيد..يلا بينا..

------------------بقلمي مريم نصار.

في مكتب الدكتور محمد..

ماجده خبطت ودخلت..وقالت بتعجرف..خير يا دكتور.. الممرض قالي أنك طلبتني..

محمد : هز راسه ليها بهدوء..وقال أيوه.. أتفضلي استريحي..!!

ماجده : قعدت وحطت رجل على رجل..وقالت اتفضل سمعاك..!!!

محمد : بص ليها..ولطريقتها المتعجرفه.. لكن قال بهدوء..
زمان جدا. كان في حادثه حصلت..لحد يخصني من عيلتي.. شخص خطف أعز الناس لقلبي..
تعرفي انا عملت ايه؟

ماجده : بعدم اهتمام..وحضرتك جايبني هنا علشان تحكيلي قصة حياتك؟

محمد : أبتسم بسخريه..وقال لأ طبعاً.. انا كنت هقولك نبذة مختصرة عن نهاية إللي يمس حد من حريمنا.. لكن واضح إني هضيع وقت معاكي..
وطلع أوراق.. حطها قدامها وقال اتفضلي أمضي.!!

ماجده : بغيظ دفين.. أمضي على إيه؟

محمد : بجدية..دي تكاليف خسارة الاوضة إللي اتحرقت..وكمان مصاريف علاج بنت حضرتك.. ولا هي هتتعالج ببلاش..!!!

ماجده : بتعجرف.. أنا مايهمنيش الفلوس.. قد ما يهمني سلامة بنتي..

محمد : مط شفايفه اممم تمام اتفضلي الورق..وامضي..

ماجده : بسخريه.. أمضي كدا من غير ما أعرف همضي على إيه؟

محمد : ابتسم بتمثيل.. الورق معاكي.. اقريه على مهلك..وامضيه.. ويومين ويكون عندي.. ووقتك خلص أتفضلي..

ماجده : بصوت جهوري.. إيه ده يا استاذ أنت.. أنت بتطردني..مفيش زوق خالص..!!

محمد : خبط ع المكتب بغضب واضح..وقال بتوعد.. كلمة زياده أقسم بالله.. هحولك للمسأله القانونيه..

وأوعي تكوني فاكره إن كنت ساكت ده ضعف مني؟ لأ...
أنا ساكت بس عشان خاطر ولادي..لكن غير كدا..انا عندي استعداد ادفنك انتي وبنتك بالحيا يوم ماتفكرو انكوا تقربوا لأي حد من عيلتي..ومش هاخد فيكوا يوم واحد..
واعملي حسابك إنك هتدفعي تمن كل حاجه عملتها بنتك.. انتي فاااهمه..

وزعق.. اتفضلي بررره..!!!

ماجده : صكت ع أسنانها بغيظ وخافت من تهديد محمد.. وأخدت الأوراق وخرجت...

محمد : قعد بنرفزه..وقال. إيه ده؟ هو في ناس كدا؟

------------------بقلمي مريم نصار.

فيلا العدوي.

آدم مراد : داخل الفيلا بالعربيه..ولمح آرين واقفه عند البيسين.. وركن العربيه ونزل منها..!!

آرين : واقفه قدام البيسين.. وبتكلم مع نفسها.وقالت بلوم..
شوفتي يا آرين..شوفتي آدم انهردا لما زعلني ماهنش عليه حتى يكلمني ويعتذر..
بس هيعتذر إزاي؟ ده مصاص دماء..ومرعب يعني معندوش قلب يحس بيه.
إيه يعني يحرجني ويحرجني..ولا همه زعلي.. إنسان بارد جدا بجد..
أنا خلاص فكرت وأخدت قراري إن آدم المرعب ده مش هتكلم معاه تاني..!!

آدم مراد : من وراها..قرار غلط يا آرين..!!

آرين : فتحت عينيها بدهشه.. وقلبها دق بقوه..وهمست.. آدم..!!!

آدم مراد : وقف قدامها..وقال بشبح ابتسامه.. لأ المرعب..!!!

آرين : بزعل حقيقي وجديه..لو سمحت متتكلمش معايا.. أنت آدم لنفسك ومرعب لنفسك..!!

آدم مراد : بتنهيدة.. زعلانه..!!

آرين : عينيها لمعت..وقالت..وتفرق؟ بعد إللي أنت عملته معايا بتهيألي زعلي ما يفرقش معاك؟

آدم مراد : ده من وجهة نظرك..لكن لو زعلك مايفرقش معايا مكنتش واقف قدامك دلوقتي..

آرين : بدموع..لفت ضهرها ليه.. وقالت بصوت مخنوق.. أنت عايز ايه يا آدم..!!!

آدم مراد : بخنقه لصوتها.. أولا مش عايزك تعيطي وده أنا حظرتك منه قبل كده..
ثانياً.. اقعدي علشان أقولك أنا عايز إيه؟

آرين : هزت راسها برفض..وقالت.. لأ.. أنا مش هقعد..ولا هسمعك. أنت ديما تتعصب عليا بسبب ومن غير سبب.

آدم مراد : مسح وشه بأيديه ونفخ بنفاذ صبر.. وشد الكرسي بنرفزه..وقال بتمثيل الهدوء.. اقعدي يا آرين..

آرين : اتخضت..وبلعت ريقها بتوتر.. وقعدت من سُكات..

آدم مراد : شد الكرسي التاني..وقعد قدامها.. وقال.. ممكن تهدي بقى ونتكلم جد شويه..

آرين : بنرفزه..هو أنت عمرك هزرت أصلا علشان عايز تتكلم جد.؟ وعموماً..نعم عايز ايه مني بقى؟

آدم مراد : بص ل عينيها..وقال عايزك تعرفي إني لايمكن في يوم اقلل منك.. أو إني اهين كرامتك..!! أنتي مقامك عالي وكرامتك من كرامتي..

آرين : بصت ل آدم وتنحت.. وقالت جواها..
مين اللي بيتكلم ده؟ المرعب؟
لأ لأ أكيد حد خبطة على دماغه.. أو ممكن حد عمله غسيل مخ.. المرعب بيقولي كرامتي من كرامته..
وااااو الواد اتجنن. يال الهول..

آدم مراد : غمض عينيه وهز راسه بيأس.. وقال. آرين أنا بكلمك..

آرين انتبهت..ها..اء..اه ايوه انا سمعاك..
وبعدها قالت بزعل.. ولما كرامتي من كرامتك.؟ ممكن أعرف ايه اللي أنت عملته معايا ده؟

آدم مراد : بصلها بغيره..وقال. لكل فعل رد فعل.. وأنا منبه عليكي قبل كده ماتجريش في الجنينه أو في أي مكان..تقومي تجري قدام آريان وكريم؟

آرين : بتذمر..هو أنا يعني كنت بجري بتنطط.؟
منا بجري عادي.. وبعدين كنت فرحانه لداده زينب.. أنت معندكش أي روح رياضية.. أنت بجد لا تطاق. أنت.....!!! واتخضت..

آدم مراد : خبط ع التربيزه..وقال بغيظ .انا إيه؟

آرين : عاااااا..في إيه بقى.. أنت جاي تصلح ولا تزود الطين بلة..ماترحمني بقى.

آدم مراد : بدهشه.. طين؟ طيب يا آرين. خلاصة الكلام والحوار ده.. أنا جاي علشان أقولك متزعليش.. لكن...!!!

آرين : بتقلدو.. وقالت بهمس..
لكن لو شوفتك بتجري تاني قدام حد أو في الجنينة..صدقيني هتشوفي مرعب تاني خالص غير دراكولا إللي قدامك دلوقتي..!!

آدم مراد : مسح وشه وغصب عنه أبتسم.. وبعدها هز راسه وأبتسم أكتر..
وبعدها ضحك.. ضحك بصوت عالى..ومن قلبه..

آرين : تنحت وفتحت عينيها على الآخر.. وشهقت بعدم تصديق..
معقول آدم بيضحك ومن قلبه كمان..!!
وكملت بدقة قلب وتنهيدة حب.. ضحكتك تجنن بجد..

آدم مراد : مسح ع شعرو..وبصلها..وشبك أيديه تحت دقنه..وقال. بابتسامه جميله.. قولتلك قبل كدا انا مش عارف انا بيكي رايح ع فين يا آري..!!

آرين : غصب عنها أبتسمت بحرج.. وقالت بتوتر.. مش هتزعقلي تاني يا آدم..!!

آدم مراد : بحنان..عمري ما اعملها تاني ياضي آدم..!!

آرين : بصت ف الأرض وسكتت....!! وقلبها بيدق بسرعه..

آدم مراد : أبتسم لبرائتها..وقال..عندي ليكي مفاجآه..

آرين : رفعت عينيها ليه وقالت واو هديه اكيد مش كدا؟

آدم مراد : هز راسه مش بالظبط..لكن حاجه زي كدا

آرين : بتكشيره..ازاي بقى؟

آدم مراد : بكره أنا وأنتي هنروح الجامعه..واجيب ليكي النتيجة..
ومتأكد إن تقديرك كويس جدا.. وعشان كده..هنفذ وعدي ليكي..

آرين : كشرت عينيها بعدم فهم..وعد إيه يا آدم..!!!

آدم مراد : ربع أيديه على التربيزه..وقال بدقة قلب.. رحلة سفاري لسيوه لكل العيله أسبوع كامل..

آرين : فتحت بوقها بزهول..

آدم مراد : بضحكه.. ودي هديتي ليكي يا آري..

آرين : بسعاده.. أنت لسه فاكر رحلة السفاري؟ أنت بتتكلم بجد يا آدم؟

آدم مراد : بتنهيدة حب ايوه يا ضي آدم..!!!

بعد شويه.. آرين رجعت ليها الضحكه الحلوه من تاني.. ودخلت الفيلا في قمة سعادتها..

وآدم مراد .. دخل بعدها وقعد معاهم وبيضحك..
و آركان رجع من عند جدو طارق.. و زود البهجه للعيله..

وآدم بص لاميرته..وشافها مبسوطه..بسعادة أحفادها..

-------------يتبع




موعد الحلقة الجديدة الساعة  8 م  يوميا ان شاء الله .

هنا تنتهى احداث رواية جريمة عشق 5 الفصل 42 ، يمكنكم اكمال باقى احداث رواية جريمة عشق الجزء الخامس الفصل 43 أوقراءة المزيد من الروايات المكتملة فى قسم روايات كاملة .

نأمل أن تكونوا قد استمتعتم بـ رواية جريمة عشق الجزء الخامس ، والى اللقاء فى حلقة قادمة بإذن الله ، لمزيد من الروايات يمكنكم متابعتنا على الموقع أو فيس بوك ، كما يمكنكم طلب رواياتكم المفضلة وسنقوم بوضعها كاملة على المدونة .
تعليقات



حجم الخط
+
16
-
تباعد السطور
+
2
-