رواية جريمة عشق الجزء الخامس الفصل الثانى والخمسون 52 | روايات مريم نصار

نقدم اليوم احداث رواية جريمة عشق الجزء الخامس مملكة ميراث العشق الفصل 52 من روايات مريم نصار . والتى تندرج تحت تصنيف روايات رومانسية ، تعد الرواية  واحدة من اجمل الروايات رومانسية  والتى نالت اعجاب القراء على الموقع ، لـ قراءة احداث رواية اسيرة العادات والتقاليد كاملة بقلم مريم نصار من خلال اللينك السابق ، أو تنزيل رواية جريمة عشق 4 pdf كاملة  من خلال موقعنا .


رواية جريمة عشق الجزء الخامس الحلقة 52 | روايات مريم نصار



 مملكة ميراث العشق الفصل الثاني والخمسون


فصل ٢٧ ج 1

رواية جريمة عشق 5

(مملكة ميراث العشق)

أجمل ما قيل عن الصبر على البلاء.

تذكّر أحوال الأشد منك بلاءً، فمن يرى بلاء غيره، يهون عليه بلاؤه. تلقى البلاء بالرضا بقضاء الله وقدره، وهذا من أعظم ما يُعين العبد على المصيبة. البلاء من قدر الله المحتوم، وقدر الله لا يأتي إلّا بخيـــر.

لا تفرح بالرخاء، ولا تغتم بالفقر والبلاء، فالذهب يجرب بالنار، والمؤمن يجرب بالبلاء.

المقصود من البلاء الفرار من الله إلى الله

================================

بسم الله نبدأ.

أسم الكاتبة الحقيقي : شريهان ابراهيم.
الإسم الحركي للكاتبة : مريم نصار.

فيلا رعد الجوهري..

رعد وهيلينا وباري..قاعدين ع السفره بيفطرو..

باري : بتعمل سندوتشات نويتلا..وبتاكل بنهم.. أممم..

رعد : هز راسه بتعجب..وقال سندوتشات نوتيلا؟ ياعالم بكره هيعملوا إيه كمان..؟

باري : بمرح..مالها بس النوتيلا يارعد باشا.. ده أحلا ساندوتش تفتح عينيك عليه.. أممم..

رعد : بسخريه..الله يرحم أبوكي..كان بيفتح عينيه على فحل بصل وطبق فول بالزيت الحار..من عم فتحي..

باري : بعدم استيعاب..وات؟ بتقول ايه يابابي؟

رعد : بضحكه.. لأ ياحبيبتي دي تعويذة الشعب المصري..
أنتي يابنتي فاتك نص عمرك..
يسلام..!! كنا نضرب أحلا فطار على عربية الفول. ونشرب كوباية شاي معكره من أيد عم سيد تلوث..
ونروح الجامعه متنحين..نحط راسنا في المحاضره ونام مأنتخين..منصحاش غير والمعيد بيقول فهمتوا...
نصحى ونرفع أيدنا ونقول الله على شرحك يادكتور تمام وفهمنا وكله زي الفل..

هيلينا : ضحكت..

باري : بإنبهار..واو عربية فول؟ بليز بليز بابي عايزه اجربها..

رعد : بس كدا؟ من عينيا ليكي عندي يوم انتي وأمك.....!!!

هيلينا : بصتله بتحذير...

رعد : قصدي انتي ومامتك..ونطلع ع عربية عم فتحي أحسن واحد يعمل فول بخيره.ههههه..

باري : بدهشه.. واو وعمو فتحي ده لسه عايش لحد دلوقتي..!!

رعد : بضحكه..طبعا وصحته زي البومب.. أصله عمره ما أكل من الفول إللي بيعمله.ههههه

كلهم ضحكوا..

فون رعد رن.. وأبتسم وقال ده سفيان باشا..

هيلينا : بلهفه..رد عليه بسرعه رعد..

رعد : حاضر ياحبيبتى..ورد عليه.وفتح الاسبيكر.. الو سفيان حبيب أبوك.. إبن حلال والله.. عامل ايه يابطل..

سفيان : بحزن مكتوم.. الحمدلله يابابا..حضرتك عامل ايه؟

رعد : كشر عينيه وقال أنا تمام يبني..بس أنت مال صوتك ياسفيان؟

هيلينا : بقلق..سفيان حبيب مامي مالك فيك إيه؟ أنت كويس سفيان؟

سفيان : بلع ريقه بغصه وقال.. أنا كويس يا أمي. حضرتك وحشتيني اوي. وبابا وباري..وا......!!!

رعد : بقلق مبهم..سيبك مننا دلوقتي يبني وقولي مالك.. متقلقنيش أنا قلبي وقع في رجلي..

سفيان : لأ لأ يابابا انا بخير حضرتك متقلقش عليا.. لكن الموضوع يخص...... أحم...يخص جدو رؤوف السلماني..!!

هيلينا : قلبها دق بقلق..وقالت داد..!!! ماله داد سفيان..!!! اتكلم بسرعه بليز..!!

سفيان : عيونه لمعت واتنهد بتعب وقال.. جدو تعب فاجأه.ونقلناه المستشفى.. وللأسف الدكتور بيأكد أنه في غيبوبة كبد..
ياريت تيجي في اسرع وقت يا أمي.. ارجوكي خليكي جمبه الفتره دي..!!

هيلينا : حطت ايدها ع قلبها وعيطت بوجع وقالت.. داد....!!!

رعد : قام بسرعه..وضم راسها لحضنه وربت ع ضهرها..بس اهدي هيلينا ياحبيبتى. إن شاء الله هيفوق ويرجع زي الأول...

باري : حطت ايدها ع بوقها وعيطت بصوت مكتوم..

رعد : بحزن حقيقي قال. لا حول ولاقوة إلا بالله.. طيب ياسفيان..خليك معانا ع إتصال.. وأنا هرتب لكل حاجه وهحجز على أول طياره.. أنا لازم ابقى معاك..

سفيان : بترجي.. وأنا في انتظاركم..لكن دلوقتي خليك جمب أمي يابابا متسبهاش.زعلانه..

رعد : هز راسه بزعل.. متقلقش عليها.. أنت خلي بالك من نفسك لحد ما اجيلك..

سفيان : بتفهم..تمام..لا إله إلا الله..

رعد : سيدنا محمد رسول الله..

------------------بقلمي مريم نصار.

Автор: Меріам Насар

في الجامعة.

زهره : بتنادي ع چود..وقالت..چود..چود لو سمحتي استني لحظه..

چود : مع مصطفى..ولفت شافتها..وقالت ثواني يامصطفى دي زهره زميلة آرين..

مصطفى : هز راسه تمام..

زهره : جت بسرعه..وقالت صباح الخير..

ردو عليها.. صباح الخير.

چود : بحزن..اذيك يا زهره..معلش مسمعتكيش.

زهره : بحزن..ولا يهمك.. أنا بس كنت عايزه اطمن على آرين..بتصل عليها كتير لكن موبيلها مقفول..وكمان معرفش عنوان المستشفى.. ارجوكي طمنيني عليها..

چود : بتنهيدة زعل..هي كويسه وبنحاول نخرجها من إللي هي فيه.لكن هي مش مستوعبه إللي جرالها..وخرجت من المستشفى الصبح..

زهره : بدموع.. ياحبيبتى يا آرين..صدقيني ياچود المدرج كله حزين وزعلان جدآ عليها.. واتفقت أنا والبنات إننا لازم نروح نطمن عليها..

چود : بصت ل مصطفى.بحيره.

مصطفى : بصي يا آنسه زهره.. انا مقدر مشاعرك تجاه آرين.بس عايز أقولك إن الوضع دلوقتي بقى حساس جدا بالنسبة ل آرين. ورافضه تتعامل معانا إحنا شخصيا..بس مسيرها هتتعود وترضى بالأمر الواقع..
لكن لو عايزه بجد تساعديها وتقفي جمبها.. ياريت تسجلي كل المحاضرات وتجيبيها لچود وهي هتوصلها ليها.

زهره : هزت راسها بتفهم..وقالت..تمام أنا مقدره موقفها...
ومن غير ماتقول حضرتك.. انا صورت ليها محاضرات أمبارح وبعتها ع الواتساب ل آرين.ولما تفتح الفون أكيد هتشوفهم..

چود : مسكت ايد زهره..وقالت ياريت متزعليش مننا يازهره..والله بجد إحنا بنمر بظروف صعبه.. لكن أوعدك اول ما تعمل العمليه وتتحسن انا ومصطفى هنوصلك لحد عندها..

زهره : بتفهم.. لأ ياحبيبتى انا عمري ما أزعل منك.. وأنا مقدره الموقف ربنا يكون في عونها.. بس ليا طلب عندك..ياريت لما تبقى مع آرين تسمعيني صوتها.. وأسلم عليها. ممكن؟

چود : أبتسمت..ممكن طبعا.

زهره : ميرسي جدا.. أنا همشي دلوقتي بعد اذنكم.. ومشيت..

چود : ضمه الكتب ف حضنها وماشيه ساكته وسرحانه..

مصطفى : إيه بقى ياچود..وحدي الله مش كدا؟

چود : بتعب..لا إله إلا الله..

مصطفى : إيه ياست الكل هتفضلي قافله كدا كتير..

چود : بزعل..يعني أنت مش عارف انا قافله ليه يامصطفى..

مصطفى : لأ عارف ياعمر مصطفى..بس عايزك تفكي كدا.. والدكتور قال إنها هترجع زي الاول وأحسن كمان..يعني الحمدلله إن الموضوع ليه حل..

چود : هزت راسها فعلا الحمدلله..بس تعرف يامصطفى..كل ما أتخيل آرين وهي ف وسط النار..نفسي يقف.. بجد الموقف مرعب وصعب جدا..

مصطفى : فعلاً ربنا يكون في عونها..ده الواحد مابيتحملش فسفوسه في صوباعه..مابالك هي بقى؟

چود : بإستغراب..فسفوسه؟

مصطفى : ايوه حاجه زي الكالو كدا..

چود : هزت راسها بنفاذ صبر..وقالت فسفوسه وكالو؟!!
هو يوم زي كالو الصوباع فعلاً..يلا ع المحاضره يامصطفى..قدامي..

مصطفى : يابت أنا عايز اضحكك..انتي قافله باب وشك من يومين..

چود : بغيظ.. الإحساس نعمه... أقسم بالله الإحساس نعمه يامصطفى..

مصطفى : مبحبش اتكلم عن نفسي كتير..

چود : طيب يلا بينا علشان بجد مش فايقه.

مصطفى : كشر عينيه وقال..مش اللي هناك دي البت لمار .؟!

چود : بصت عليها..وقالت ايوه هي زفته..مالها بقى؟

مصطفى : بصي كدا..هي ماشيه تتلفت حواليها كدا ليه؟ كأنها خايفه من حاجه؟

چود : بتعجب.. فعلاً..اله..اله. بص دي الكتب وقعت منها..دي شكلها مرعوبه مش خايفه وبس..!!

مصطفى : يكش تقع على وشها بعلبة الدوكو اللي داهنه بيها وشها دي.. يلا سيبك منها..

چود : هزت راسها..يلا بينا..ومشيوا..كام خطوه..

لمار : جريت عليهم..وقالت چود..

چود : لفت بخنقه..نعم؟

لمار : بتوتر.. أسفه اني هعطلكم..لكن كنت عايزه اطمن على آرين؟ حالتها إيه دلوقتي..

چود : نفخت بخنقه وقالت..حالتها ربنا وحدو إللي عالم بيها.. واحده اتحرقت بالنار هتكون عامله ايه يعني؟

لمار : بدموع..هو الحرق كبير..

چود : بوجع وغيظ.. كبير ولا صغير أنتي بتسألي ليه؟ عايزه تشمتي فيها مش كدا؟ لكن ده بُعدك..
شكلها مش هيأثر ع تعبها ومجهودها..وهتذاكر وهتنجح..وهتقفل الامتحان..وهتطلع من الأوائل.. وهتفرس أي حد غيران منها..

مصطفى : مسك أيدها وضغط عليها..مش كدا ياچود..

لمار : شهقت بصدمه.. انا اشمت فيها؟ دي آرين دي اختي..ليه بتقولي كدا؟

چود : بخنقه..يووووه بقولك ايه..عايزه تسألي ع حد متسألنيش أنا ماشي..؟
هنتأخر على المحاضره بعد إذنك.. ومسكت أيد مصطفى ومشيت بنرفزه..

مصطفى : بدهشه.. إيه إللي انتي عملتيه ده ياچود؟

چود : بعصبيه..معرفش ومش عايزه اعرف. البت دي أنا مبطقهاش..

مصطفى : بتعجب..البت واقفه عماله تعيط هناك..

چود : وقفت وقالت بغيره.. وهي بقى صعبانه عليك علشان بتعيط.؟!..
تحب أخدك عندها تاخدها في حضنك وتطبطب عليها؟
ولا اقولك على حاجه احسن.. روح طيب خاطرها واعزمها ع عصير يهدي أعصابها..

مصطفى : تنح..وقال يخربيت جنانك. يابنتي انا بتكلم عن اللي شوفته..بصي واقفه مكانها بتعيط إزاي؟

چود : بجنان..بقولك ايه..؟ هنمشي ع أم المحاضره ولا اروح.؟ علشان اليوم قافل معايا أصلا..

مصطفى : طيب خلاص اهدي..تولع لمار هي واللي خلفوها.. وأنا عايز حد غيرك ياتراب القمر..؟ يلا بينا ياقمري...وحط أيدها ف دراعه ومشيوا..

------------------بقلمي مريم نصار.

في الجهاز..

في مكتب فهد.ومعاه مراد.

فهد : قفل الفون وحطه ع التربيزه.وقعد ع الكنبه.
.ومسح وشه وشعرو بأيديه..

مراد : قاعد جمبه.. وقال.ها اطمنت عليهم ياحوت؟

فهد : بإحباط..مش هطمن غير لما أشوف بنتي رجعت زي الاول يامراد.!!

مراد : قفل اللاب توب.. وقال..ليه الإحباط ده بس..ما الدكتور طمنا عليها..

فهد : بتنهده.وحيره..ربنا يستر..

مراد : أنا عارف إن جواك كلام كتير جدا..وعايز تقعد في مكان هادي لوحدك..

فهد : رجع راسه لورا.. وقال بتعب..
نفسي أهرب..بس اهرب إزاي ومن إيه وليه؟ مش عارف..

مراد : أتكلم يافهد..!!!

فهد : بتنهيدة وجع.. أتكلم..؟!!! ..
أنا جوايا فعلاً كلام كتير جدا..وموجوع ومخنوق وتعبااان..
جوايا كلام فوق بعض ومش مترتب.. حروف تايهه ومتلخبطه..
وفي كلام مترتب لكن لو جيت أتكلم ألاقي نفسي مش عارف أنطق حرف واحد..
كأن الكلام نفسه موجوع وزعلان..
ولو طلع من جوايا هيتكسر أكتر..
فبيفضل انه يكون متلخبط جوايا أفضل.
وده مسبب ليا حيره وتيه كبير..مخليني عايز اهرب بعيد.
بص أنا مش عارف هتفهمني ولا لأ ؟!!

مراد : أبتسم..وقال ده أنا أكتر واحد فاهمك.
المشكله إني أنا وأنت زي بعض..بس طريقتنا مختلفه..
انا بخبي جوايا وأضحك..وانت بتخبي جواك وبتسكت..
لا بتضحك ولا بتدي رد فعل عن اللي جواك..
ومش عارف مين فينا إحساسه أصعب من التاني..
لأن ف كلتا الحالتين. هى حاجه مكلكعه ومتعبه.. بس أنا عايزك الفتره دي تفضي دماغك وتروق علشان خاطر آرين..

فهد : نفخ بتعب.وقال..
وهي دماغي فيها حد غير آرين يامراد؟
بس برضو تفكيري مشوش من كل حاجه..وهتجنن مين إللي بعت الكارت.؟!
ومين اللي عمل كدا ف بنتي؟
وهل حرف الA ده المقصود بيه آرين؟
ومين إللي حرق الشقق والعربيات..؟!!! مين اللي صاب عمي آدم..!!

أسئله كتير مالهاش اجابه..في غموض كبير.
وخايف من أنه يحصل اسؤ من كدا..
وهل كل إللي بيحصل ده ليه علاقه باللي حصل مع آرين بنتي..!!!

آدم مراد : دخل.. وقال بجدية.
لأ... حادثة آرين مالهاش علاقه بكل الغموض والالغاز دي..!!

فهد : بص ل آدم بإستفهام.......!!!

مراد : تعالى يا آدم..وقول إللي عندك..!!

آدم مراد : قعد ع الكرسي.. وقال..حادثة آرين قضاء وقدر..

فهد : غمض عينيه بوجع واستسلم للأمر الواقع.

آدم مراد : كمل..وقال..وبرضو بفعل فاعل..!!!

مراد وفهد بصوا لبعض...!!!

فهد : بغضب واضح..قال..مييين؟ مييين اللي عملها يا آدم؟

مراد : كشر عينيه بعدم فهم وقال..
إزاي بتقول قضاء وقدر وبرضه بفعل فاعل؟!! مش غريبه دي..!!

آدم مراد : بثقه..ادوني يومين بالكتير..وهخلص الحوار ده..؛!

فهد : بغضب.. تخلص ايه يا آدم؟
عندك معلومه دلوقتي قولها. وأنا هتكفل بالباقي.. أنا هخلص عليه..

آدم مراد : آسف ياخالو.. انا وعدت آرين إني هرمي إللي عمل كدا تحت رجليها في أقرب وقت..

الباب خبط..ودخل أكرم..وقال صباح الخير يا حيتان..

مراد : ضغط ع ايد فهد.. أنه يهدا وميتكلمش في حاجه.. وقال..صباح الخير يا أكرم باشا..فينك ياراجل..

اكرم : تحت النظر يصحبي..المهم بقى انا عرفت معلومه مهمه للديزل..وجيت ابشره بنفسي..

فهد : بيحاول يمتص غضبه..ومثل الثبات..

مراد : خير ياصحبي..

اكرم : هو خير طبعاً.. دلوقتي في مأمورية لمدة ٤٨ ساعه.. عن ميعاد تسليم شحنة مخدرات ع طريق الصعيد. والكميه ٢٥ كيلو..
واللي هيقوم بالمهمة دي مجموعة ضباط شرطة مكافحة المخدرات..
ولكن طالبين اتنين ضباط من المخابرات..
واتعمل قائمه مرشح فيها أكتر من إسم..
وأول إسم مرشح هو آدم مراد العدوي وخمسه غيرهم..وهيختارو منهم اتنين بس..
واللي هيطلع منهم ويخلص المأمورية دي..ليه مكافأة مالية كبيرة..وهيتكرم كمان..!!

الباب خبط ودخل واحد قال..الصقر و الحوت والديزل.. مدير الجهاز عايزكم في مكتبه..

أكرم : بغمزه.. أكيد مدير الجهاز هيخيرك مع الضباط التانيه...
أبسط ياعم آدم.. مأمورية ولا أسهل.. ربنا يوفقك ياعم.. يلا سلام أنا.. وخرج..

مراد : قام وقال.. طيب نأجل كلام في الموضوع ده لبعد الإجتماع..و يلا تعالوا نشوف المدير عايزنا في إيه؟

فهد : قام..وبص ل آدم...وسابهم ومشي..

مراد : يلا يا آدم..

آدم مراد : هز راسه تمام اتفضل أنت وأنا هحصلك..

مراد : ماشي متتأخرش..وسابه وخرج..

Автор: Меріам Насар

آدم مراد : بضيق حقيقي.. مأمورية دلوقتي.طيب وآرين.؟
وقام وقف وخارج..
لكن سمع صوت رنة موبايل..ولف وشاف فون فهد على التربيزه.. وراح عندو..وشاف رقم عمتو رينو..!!! واضطر يرد علشان قلقان..ورد الو...

رينو : بعياط فهد الحقني يافهد..

آدم مراد : بقلق..عمتو انا آدم..ف إيه؟

رينو : بعياط.. آدم..!! آرين مغمى عليها.

آدم مراد : بخوف..طيب ايه إللي حصل؟ ومين ضايقها ياعمتو..؟!

رينو : شرحت ليه كل حاجه....!!!

آركان : بيفوق آرين..وفاقت..

آرين : بعياط هستيري عايزاهم يخرجوا بره..

آركان : أخد آيان وخرج تحت ضغط من رينو..

آدم مراد : نفخ بخنقه ومسح على شعرو بخنقه لصوت عياطها..وقال بثبات انفعالي.سيبوها تقعد لوحدها..

رينو : بعياط.. إزاي بس يا آدم نسيبها لوحدها..

آدم مراد : ارجوكي يا عمتو.. اخرجي وسيبيها علشان أعرف أكلمك..

رينو : حاضر..وخرجت وقفلت الباب..وقالت.. آرين لوحدها وانا قلقانه عليها.. إزاي نسيبها لوحدها؟

آدم مراد : ياعمتو لازم آرين تاخد مساحه لوحدها علشان تعرف تفكر بهدوء..
طول ما إحنا حواليها هتفتكر إن ده ضغط عليها مننا..وده غلط هيقلب بالسلب عليها ويزيد من توترها وتعبها النفسي.
لازم تفكر وتقتنع أنها طبيعيه..
وإن حرق أو تشوه بسيط في جسم الشخص مش هيغير من مبدأه ولا أسلوب حياته..
بل بالعكس لازم يكمل مشواره وبحماس أكبر.وينجح أكتر
ووقتها هتكتشفي إن كل الناس هتشوفه بشكل تاني..بس شكل أحسن ويتمنوا أنهم يبقوا مكانه وفي نجاحه..
التشوه عمره مكان عائق أو عيب اننا ننكره ونخاف نواجه بيه العالم..

رينو : أبتسمت بحب وقالت صح.. انت عندك حق في كل كلمه..وبنتي هتعدي المحنه دي..

آدم مراد: بثقه..هنعديها أنا وآرين مع بعض ياعمتو. وهوصلها لبر الأمان..

رينو : هتصدقني لو قولتلك إن قلبي استريح دلوقتي.. و إن آرين محظوظه بيك يا آدم..!!

آدم مراد : بتفهم.. حبيبتي ياعمتو وأنا مش عايزك تخافي ولا تقلقي. عليها.. المهم دلوقتي هي أكلت حاجه من الصبح؟

رينو : دي طلعت عيني الصبح علشان بس تفطر و تاخد المسكن.. واكلت حاجه بسيطه جدا..

آدم مراد : بتنهيده..طيب تمام..محدش يضغط عليها لحد ما أرجع..

رينو : حاضر..بس هو أنت رديت عليا إزاي من فون فهد؟

آدم مراد : خالو سايب الفون ف مكتبه وخرج مع بابا .انا هقفل دلوقتي لأني عندي شغل مهم..

رينو : ربنا معاكم مع السلامه..

آدم مراد : مع السلامه..وقفل وساب الفون وخرج ع مكتب المدير.

------------------بقلمي مريم نصار.

بعد لحظات..

ف مكتب المدير..

المدير : شرح نفس كلام أكرم..واختار آدم وضابط كمان..

مراد : بيحط خطه لفكرة القبض عليهم..

فهد : بيحط خطة الهجوم..

آدم مراد : بيسمع بصمت..وتفكيرو في آرين..

المدير : ها يا آدم أنت والرائد أحمد هتطلعو المأموريه دي مع ضباط الشرطة..
.وانهردا بليل هتتحركوا إن شاء الله. واتا متأكد من كفأتكم وأنكم هتقبضوا عليهم في لمح البصر..
و المكافأة والتكريم.هيكون في أقرب وقت.

آدم مراد : أخد نفس عميق وقال : اعذرني سيادتك..
أنا بتنازل عن المأمورية دي للملازم باسم..

فهد : بص ل آدم بإستغراب..!!

المدير : مط شفايفه اممم وأقدر أفهم ايه وجهة نظرك دي ياسيادة النقيب؟!

آدم مراد : بدهاء..حضرتك أنا طلعت مأموريات أشبه بحروب وبفضل الله اجتازتها..
وده سبب إن الكل في الجهاز عرف مين هو الديزل..
لكن الملازم باسم ده من دفعتي وفي نفس كافأتي لأننا كنا في نفس الدفعه ونفس التدريبات.. والمفروض أنه ياخد فرصه زي دي يثبت نفسه. وصدقني حضرتك باسم محتاجها أكتر مني..

المدير : بتفكير.امم انا معاك أنه شاب قوي وكمان أسمه من ضمن القائمة..
ولكن أنا اخترتك لانك جدير بالثقة والذكاء الفطن..

آدم مراد : بتفهم..وباسم كمان يافندم زكي..لكن ملقاش الفرصه إللي يثبت نفسه..
كل المأموريات إللي بيطلعها بيكون عميل تابع لجهه أكبر ورتبه أعلا.. وباسم بينفذ من غير ما يتدخل.
.لكن لازم نستفاد من زكائه يافندم.. وصدقني هتكون فخور بيه زي ما حضرتك فخور بيا..

المدير : ايه رايك في كلام النقيب آدم ياسيادة العقيد مراد؟

مراد : بتأكيد.. حضرتك إحنا كبرنا واتعرفنا من خلال توجيهات سيادتك.. وديما تقولنا الجيل الجديد ليه الأولوية بأغتنام الفرص لإثبات الذات وإثبات نفسه. ف أنا برجح رأي النقيب آدم. ولكن القرار النهائي في أيد معاليك..

المدير : هز راسه بتفكير... أممم. خلاص تمام..نشوف الملازم باسم..وياخد فرصته مع الرائد أحمد..
وأبتسم وقال. هذا الشبل من ذاك الاسد.. نفس الأسلوب والتضحية والتفاني.. أنت وابوك وخالك.. ماشيين على نفس المنوال.. والأخلاق الجميلة..
وشعارنا هو...إن الجميع للفرد..!!

مراد وفهد وآدم قالوا.. والفرد للجميع...!!!

Автор: Меріам Насар

بعد لحظات..

مراد وفهد وآدم خارجين من مكتب المدير..

مراد : بمكر..حلوه الحركة دي.. أنت مش عايز المدير يعرف بالظروف اللي بنمر بيها..ف زحلقت نفسك بذكاء
وانك تخلي باسم ياخد مكانك. علشان يثبت نفسه..

آدم مراد : بثبات.. هو فعلاً كدا بالظبط..لكن مننكرش إن باسم من حقه ياخد فرصه.. وكمان هو محتاج للمكافأه أكتر مني..
وكمل بجديه.. ومش من حق أي حد أنه يعرف أي حاجه تخص آرين..!!! آرين خط أحمر..

فهد : رفع عينيه ل آدم..ومن تشويش أفكاره مش عارف يقول ايه؟
لازم تفكر بهدوء يافهد لازم تقعد لوحدك وترتب أفكارك.
معقول آدم مطلعش المأمورية علشان آرين..!!!

------------------بقلمي مريم نصار.

عند فهد.

آرين قاعده ع السرير وضمها ركبها بايديها.ووشها ملفوف.. وسرحانه..
سرحانه في سنين كتير فاتوا. افتكرت شقاوتها وضحكتها إللي من القلب..ولما كانت ترخم على آركان.
وهزارها مع بنات العيله..
وافتكرت تيم..!! ودموعها نزلت في صمت.. لما افتكرت تيم فخور بيها وأنها أجمل أخت وأجمل بنت ف الدنيا..
وافتكرت آدمها.وغيرته عليها من جمالها في أي حفله وأي مناسبه.وانه شايفها فراشه كلها ألوان مختلفة وجميله وسماها الضي.. آرين ضي آدم..!!
.وصعبت عليها نفسها.. وبكت بحرقه وقلب موجوع..

رينو : سمعت صوت عياطها المكتوم والموجوع.. وقالت بدموع.. آرين ياحبيبتي.. تالين جت وعايزه تتكلم معاكي شويه قبل ما تخرج ع سنتر الدروس..

آرين : مسحت دموعها..ومش عارفه تقول إيه؟ هي بتحب تالين.. وكلامها ديما بيلمس قلبها.. لكن مردتش..

تالين : قالت أنا هحاول معاها ياعمتو.. بس بالله عليكي متعيطيش..

رينو : ربتت ع أيدها وقالت.حاولي معاها يا تالين هي بتحبك..

تالين : حاضر ياعمتو..وخبطت ع الباب..وقالت آرين ياحبيبتي. ممكن تفتحيلي.؟!

آرين : حطت أيديها على ودنها وغمضت عينيها وقالت بصوت واطي و موجوع.. سيبوني لوحدي..سيبوني في حالي بقى..حرام عليكم..

تالين : سمعت عياطها..وقالت..
آرين أنا قرأت حكمه قبل كدا. ومكنتش فاهمه معناها..وقولت هسأل تيتة مريم عليها..لكن دلوقتي فهمت معناها
.والحكمه بتقول..
لأن أعض على جمرة أو أن أقبض عليها حتّى تبرد في يدي أحب إليّ من أن أقول لشيءٍ قضاه الله: ليته لم يكن....
وثِق بحدوث الفرج من الله سبحانه، إذا رأيت أمراً لا تستطيع غيره، فاصبر وانتظر الفرج. استعن بالله والجأ إليه واطلب منه المعونة، واسأله أن يُلهمك الصبر والرضا بقضائه؛
هكذا يكون الصبر عند البلاء.

آرين :........!!!

تالين : عيونها لمعت بدموع وقالت..طيب بالله عليكي افتحي.. أهون عليكي أمشي من غير ما أشوفك.. ويعالم ممكن أخرج ومرجعش تاني.. ممكن تعتبريها آخر امنيه وانتي تحققيهالي..وا........!!!

آرين : قامت بسرعه وفتحت الباب.. ولفت ضهرها لتالين..وقالت بخنقه..ممكن تبطلي الهبل اللي انتي بتقوليه ده ياتالين؟

تالين : أبتسمت وقالت.. أنا عارفه إني مش ههون عليكي..وبعدين أنا في معية الله واللي مكتوب اكيد كله خير..

آرين : دخلت وضهرها لتالين..

تالين : بزعل حقيقي لكن قالت بثبات.. ممكن نقعد شويه..عايزه اتكلم معاكي قبل ما أنزل..

آرين : قعدت ع الكرسي بصمت..

تالين : قعدت قصادها وقالت.. عامله ايه دلوقتي ياحبيبتي..

آرين : بصت بعيد ودموعها متحجره وبتحاول تكابر إحساسها بالعجز..وقالت أنا تمام .تمام..

تالين : أبتسمت بحب وقالت..تعرفي إن شخصيتك الجد دي انا مستغرباها..

آرين : بجديه..ليه يعني؟

تالين : بتوتر..اء.. أبدا أنا بس بحب شخصيتك المرحه الجميله.. أنا بحب ضحكتك. بحب آرين بنت خالو إللي ديما بتضحك حتى لو في وش المخاطر..

آرين : بحزن..خلاص ياتالين..مفيش حاجه بتفضل على حالها..كل حاجه بتتغير مع الظروف..

تالين : أبتسمت وقالت.. انتي في امتحان مهم يا آرين.. انتي متخيلة عظمة اللي انتي فيه؟

آرين : بصت ل تالين.وقالت عظمة إللي انا فيه........!!!

تالين : أيوه..انا بتكلم جد..انتي مش مستوعبه أنتي ف إيه؟ انتي في امتحان..وعارفه مين اللي بيمتحنك؟ رب العالمين يا آرين.. ربنا بعزته وجلاله وعظمته وسلطانه..اصطفاكي انتي للامتحان ده.. فهل انتي جاهزه تنجحي بالامتحان ده؟

آرين : استشعرت كلام تالين.. وهمست أنا..!!!

تالين : بتأكيد.. أيوه أنتي.. أنتي بنوته جميله جدا وكل العيله بتشهد بأن آرين كل حاجه فيها جميله. شكلا وموضوعا..والكمال لله وحده طبعاً.. لكن أنا بتكلم عن شخصيتك.. لون عيونك. شعرك.
خفة دمك..متفوقه..طموحه.. فيكي حجات كتير جدا جدا حلوه وتاخدي عليها تسعه من عشره. ماشاء الله لاقوة إلا بالله..الكل مبهور بيكي.. وكمان مسلمه وموحده بالله.محجبه.بتصلي وتصومي وبتقراي قرآن.وماشيه على نهج سيدنا محمد صل الله عليه وسلم..
ودلوقتي ربنا عز وجل بيمتحنك..لاختبار قوة إيمانك..هل هتقدري تكملي؟ هل هتقولي أنا راضيه يارب وجاهزه للاختبار؟ ولا هتقنطي من رحمة الله؟

آرين : بنفي..حاشه لله. رحمة ربنا كبيره جدا ياتالين..
وكملت بدموع.. وأنا عشمانه في رحمته.. أنه يلهمني الصبر وأنجح في الامتحان ده..
أنا عارفه إني في ابتلاء..لكن الصدمه كانت شديده عليا..بقى عندي رهبه من كل حاجه. تعرفي ياتالين أنا بقيت بخاف من النار..بخاف من أي حاجه.. كوابيس وحشه جدا..وبصبر نفسي بالصلاه.. بس من جوايا محطمه ياتالين..محطمه بالكامل..كل ما افتكر شكلي إللي اتغير مليون درجة أحس بالعجز واني خلاص مبقتش انفع أواجه العالم بشكلي ده..

تالين : قامت وضمت راسها لحضنها..وقالت بدموع.. اصبري آرين..اصبري ع ابتلائك وهتشوفي نتيجه تفرحك صدقيني. المقصود من الابتلاء..الفرار من الله وإلى الله..

آرين : مسحت دموعها واتنهدت بتعب..وقالت بإستسلام.. الحمدلله على كل شيء..

------------------بقلمي مريم نصار.

الساعه ٤ قدام محل بيتزا..

آدم مراد : أخد الاوردر وخرج. وفتح باب العربيه..وحط الطلب جمب شنطه كبيره..وركب العربيه واتصل ع رينو..!!

رينو : ردت الو..

آدم مراد : أيوه ياعمتو.. آرين عامله ايه دلوقتى؟

رينو : بحزن.حابسه نفسها في اوضتها.. ورافضه تفتح حتى لأركان.. لكن جت تالين وقعدت معاها شويه
ونزلت معاها آيان تحت يلعب مع محمد علشان آرين متضايقش..ومش عارفه اعمل ايه تاني؟

آدم مراد : بتفهم..مفيش حد من كبار العيله كلمها؟

رينو : جدك آدم منع أي زياره هنا فوق..وكل إللي يجي يقعد معاه تحت في الفيلا..
ودلوقتي جدك أشرف وجاسر وعمتو ملك وهنا موجودين تحت..

آدم مراد : هز راسه فعلاً كدا أفضل علشانها..طيب أنا جاي وجايب أكل وهطلع عندك ع طول.. آركان عندك؟

رينو : ايوه يا حبيبي.. وكملت بترجي..آدم أنا عايزه آرين ترجع زي الاول..!!

آدم مراد : اطمني. آرين هتبقى بخير..

رينو : ربنا يسمع منك واحنا في انتظارك يا حبيبي.

آدم مراد : مع السلامه..وقفل. ونفخ بخنقه وشغل العربيه وساق رايح لضيه..

Автор: Меріам Насар

فيلا السيوفي..

طارق : اسمعي يا رنا.

رنا : نعم يا حبيبي.

طارق : إيه رأيك. لو جبنا هدية حلوه كدا للبت آرين.

رنا : بحيره..مش عارفه ياطارق..ممكن تفكر إننا بنعمل كده علشان موضوع الحادثه ده؟ أنت عارف أنها بقت حساسه زيادة عن اللزوم.

طارق : بتفكير. لأ سيبك من موضوع الحساسه ده.. أنا هتعامل معاها.. بس أنتي فكري معايا..نجبلها هدية زي إيه؟

رنا : بتفكير.. إيه رأيك في موبايل جديد..؟

طارق : لأ هي عندها موبيل موديل السنه..

رنا : أممم طيب نجبلها عروسه؟

طارق : بغيظ..ياريتني مسألتك..

رنا : بدهشه..اله.. ليه بس ياطارق.. مالها العروسه؟

طارق : عروسه لواحده في كليه يارنا؟

رنا : بتأكيد.. طبعاً طيب ده أحلا وقت تشتري فيه عروسه للبنت..

طارق : هز راسه لأ مش مقتنع..بصي إحنا نشوف حاجه أونلاين كدا ونختار مع بعض اشطا؟

رنا : ماشي فكره حلوه برضه..

طارق : طيب قومي بقى هاتي اللاب توب وتعالى نختار حاجه حلوه قبل ما نروحلها..

رنا : حاضر..

------------------بقلمي مريم نصار.

عند فهد

آركان فتح لأدم. وشاف آدم ..وشايل أوردر الغدا.. و آركان شال معاه..

آدم : دخل وسلم ع عمتو..

آركان : بحماس.والله إبن حلال.. أنا جعان مو..........!!!

آدم مراد : بصله بتحذير..

آركان : احم. طابخه ايه ياماما..!!

رينو : أبتسمت.. وقالت..لأ.. إبن أخويا قالي متعمليش أكل ياعمتو..

آركان : هرش في قفاه وقال..اه. قالك متعمليش أكل..قومتي انتي معملتيش صح؟

رينو : هزت راسها أيوه..

آركان : أممم..وبص ل آدم وقال ايه اخلع.؟! ولا لينا في الاوردر نصيب؟

آدم مراد : بثبات..محدش هياكل غير لما آرين تقعد.. غير كدا صدقني مفيش حد هياكل..

آركان : خبط ع خدو بتمثيل..وقال..ايوه يبقى هنسمع صوصوة العصافير لبكره..

آدم مراد : عمتو. ادخلي اندهي آرين. وقوليها إني منتظرها هنا..

رينو : ثواني حاضر. وربنا يهديها وتخرج..

آركان : قوليلها في بيتزا وريحة مشويات..وهتلاقيها سمعا وطاعه..

آدم مراد : من بين أسنانه..ممكن تنجر ع المطبخ وتجيب طباق وانت ساكت..!!

آركان : بلع ريقه..ورايح المطبخ.. وقال جواه..ياستار..ياستار يارب..وده هيبقى جوز أختي إزاي؟ الله يرحمها..كانت روحها حلوه..

آدم مراد : اتحرك بخفه..وفتح باب الشقه.وجاب شنطة هدايا كبيره جدا..وخباها ورا كنبة الليفنج..

آرين : من ورا الباب..رغم دقات قلبها المشتاقه للمرعب..قالت بجديه..
أنا مش طالعه لحد.. ولو سمحتي أنا هنام..

رينو : بترجي..يا آرين ياحبيبتى أنتي عارفه إن آدم عمره ما هينزل غير لما يطمن عليكي..
وبعدين ده آدم يا آرين.. آدم اللي بيحبك وانتي بتحبيه..

آرين : بعياط.. أنا مبحبش حد..مامي بالله عليكي ارحميني..

رينو : جت تتكلم.......!!!

آدم مراد : شاور ليها ووقف قدام الباب..

آرين : قالت بوجع..
خلاص يامامي أنا مبقتش آرين اللي انتوا تعرفوها.. أنا واحده تانيه خالص.. حتى مابقتش أشبه آرين في أي حاجه.. أنا....!!!

آدم مراد : من ورا الباب قال..
أنتي آرين.. ومفيش حد فعلا يشبهك..
لأنك نادره ومفيش زيك.. ولو سمحتي بقى ممكن تطلعي أنا جاي اطمن عليكي..خمس دقايق وماشي..

آرين : رفعت كف أيدها ع الباب وبتعيط بصمت..

آدم مراد : سمع همسات عياطها..وقال بوجع.. آرين خليني أشوفك قبل ما أمشي..

آرين : هزت راسها لأ لأ يا آدم لو سمحت سبني..

آدم مراد : مسح ع شعرو بخنقه..وقال بمكر..طيب يا آرين أنا طالع مأمورية..ويعالم هرجع تاني ولا لأ.. وكنت عايز أشوفك قبل ما أسافر..

آرين : بصدمه..مسافر..!!

آدم مراد : بجديه وصوت جهوري.. انا هستناكي في الليفنج..خمس دقايق ولو مخرجتيش.. أنا همشي.. وممكن متشوفنيش تاني. ومش هتسمعي صوتي أبدا..

آرين : بترجي.. أرجوك يا آدم كفايه..

آدم مراد : هز راسه لرينو يطمنها.. وقال بتجاهل.. عمتو أنا قاعد في الليفنج بعد إذنك. واتحرك..

رينو : بترجي..علشان خاطر مامي يا آرين.. شوفي آدم عايز ايه وارجعي تاني.. ارجوكي متخسريش كل حاجه..

آرين : غمضت عينيها..وحطت راسها ع الباب..وقالت بوجع حاضر يا مامي..!!

آركان : شد رينو ف المطبخ وقال بتحذير.. أنا هقعد معاهم..علشان لو قولتي قوم يا آركان.؟
مش هقوم.. أنتي عارفه أنه ماينفعش تمام؟

رينو : بتنهيدة تعب.. يابني.هو آدم عيل صغير؟ وبعدين أنت شايف أختك حالتها إزاي؟
آدم زي ما انت شايف..جايب ليها غدا وجاي كنوع من التغيير وأنه يحتويها..

آركان : كل ده جميل وزي الفل..
وأنا عارف وواثق في آدم وأختي..لكن مايرضكيش اخش اوضتي وأختي قاعده مع إبن عمتها بره؟ ولا أنتي شايفه إيه يادكتوره؟

رينو : بحيره..معاك حق..طيب سيبها ع الله..
وانا يعني استحاله هسيبهم. لكن كنت هقعد قصادهم..

آركان : مط شفايفه وقال.. أساساً آدم بجح ودي أحلا حاجه بتعجبني فيه.. يلا بينا علشان أنا جعان..
وطلعوا وقعدو مع آدم..

آدم بص ف الساعه وفاضل دقيقه واحده.. والدقيقة خلصت و آرين مخرجتش..

آدم مراد : هز راسه تمام..وقام وقف..وقال أنا نازل..ومشي كام خطوه..

آرين : بصوت مبحوح.. آدم..!!

آدم مراد : أبتسم..ولف ليها..
وكأنه شايفها لسه ملكة قلبه وضي حياته..

ايوه أصل هو بيحب روحها أسلوبها أخلاقها.. مش شكلها وبس..!!! وقال بإبتسامة حب..
لحقتي نفسك في آخر ثانيه..

آرين : لابسه فستان اسود في ورد أحمر وقعدت جمب رينو من غير ما تتكلم. ولكن قلبها رافض فكرة السفر..

رينو : ربتت ع أيدها وابتسمت ليها..

آركان : من جواه غيران..لكن كل حاجه ماشيه صح.
.هو موجود يبقى فين المشكله؟ وكمان راحة أخته عندو اهم حاجة..

آدم مراد : قعد ع الكرسي.. وقال بهدوء..عامله ايه يا آرين؟

آرين : هزت راسها بحزن..كويسه الحمدلله..

آدم مراد : آرين انا جاي اطمن عليكي..واتكلم معاكي قبل ما أمشي..

آرين : قلبها بقى حزين أكتر أنه هيسافر..وقالت بحزن. خير يا آدم..

آدم مراد : قبل أي حاجه..عايز اتغدا..

آرين : رفعت عينيها بدهشه.. نعم..!!

آدم مراد : بشبح ابتسامة.. اتغدا..وكمان أنا اللي عازمك ع الغدا..

آرين : برفض لأ ميرسي ماليش نفس..

آركان : ليييييه؟ لييييه حرام كدا.. أنا جعان وثانيه واحده هكشف كل أوراقي..
يلا يا آرين وحياة اخوكي ياشيخة..

رينو : مسدت على ضهرها وقالت بحنان.. حبيبتي.. آدم تعب نفسه علشانك..
وجاب ليكي الأكل إللي أنتي بتحبيه.

آرين : بدموع أنا مش جعانه..

آدم مراد : بص ل عينيها وقال..بس انا جعان.. وعايزك تاكلي معايا.. وكمان آركان وعمتو..

آركان : أبوه بقى..

رينو : لأ انا هستنى فهد. مش هينفع أكل من غيرو..

آدم مراد : تمام.. أمسك يا آركان كل الشنط دي وجهز السفره لينا..وغمز ل آركان..علشان آرين تاكل.

آركان : أبتسم..ماشي ياعم آدم..د وانا تحت امر آرين هانم..واخد الشنط..وبيجهز السفره..

آدم مراد : عمتو هاتي علاج آرين بعد إذنك..!!

رينو : اه علاجها في اوضتي ثواني هروح اجيبه.. وقامت..

آرين : قلبها بيدق بسرعه..

آدم مراد : بيتأمل فيها.. وابتسم ليها وقال.. كل حاجه هتعدي.. طول ما انا جمبك ومعاكي..

آرين : بوجع.. آدم.اء...انا...

آدم مراد : أنتي إيه ياضي آدم؟

آرين : بدموع.. خلاص يا آدم..الضي اتحرق وانطفى..

آدم مراد : بنفي.. أبدا..الضي إللي جوايا منك كفيل ينور عتمة كفيف..
وينور بصيرة اي عليل.. ضيك جوايا من روحك يا آرين..
عمر ضيك مكان بشكلك.. أو تفاصيل وشك..
لأ.. إللي بيختار حد.. بيختاره كله على بعضه.. وأنا عايزك كلك على بعضك..

آرين : بدموع..الكلام ده كان قبل ما اتشوه..لكن دلوقتي الأمر يختلف..

آدم مراد : اللي اتشوه تفكيرك يا آرين.. أنتي سلمتي نفسك لشيطانك إللي بيظهر ليكي عيوب مش موجوده فيكي..
طيب عايز اقولك حاجه بسيطه جدا وهو سؤال في نفس الوقت..
ولنفترض إني أنا وانتي متجوزين.. وحصلت ليا حادثه في أي مأمورية..
وارد جدآ يحصلي عاهه واقعد من شغلي..ووقتها هبقى في نظر كل العالم اني معاق..!!! لكن انتي هتشوفيني إزاي؟

آرين : بدقة قلب خايف..قالت.. أولا بعد الشر عليك.. ثانياً أنا عمري ما هشوفك كدا أبدا..لاني......!!!
وسكتت وبصت بعيد بحرج ولعنت نفسها..

آدم مراد : بمكر.. لأنك شايفه آدم بصوره واحده مش كدا؟

آرين : أيوه أيوه صح..

آدم مراد : ابتسم..وده برضو اللي كل العيله شايفاكي بيه.. آرين ليها صوره واحده وبس ثابته في عقلنا..ومش هتتغير مهمها حصل. ودلوقتي عايز منك إنك تساعديني.. إني أقف جمبك وتكملي قرص العلاج..وصدقيني انتي هتشوفي نتيجه ترضيكي أنتي..

آرين : هزت راسها بإستسلام..لكن قالت بغصه.. أنت هتسافر امتى يا آدم.؟

آدم مراد : أبتسم وقال استحاله أسافر واسيبك ياضي عتمة آدم..!!!

آرين : بدأ شعاع الأمل يتجدد جواها.

رينو : جابت العلاج..

آركان : كان واقف وسامع كل كلمة.. واستريح لأن أخته هتبدا قرص العلاج. من غير مشاكل..

آدم مراد : أخد العلاج وقال..امسكي علاجك ده قبل الغدا..

آرين : اترددت في أنها تاخد الدوا..

رينو : اخدته من آدم وقالت. بنتي هتاخد مني انا مش كدا ياحبيبتي؟

آرين : استسلمت..و أخدت العلاج..

آركان : يلا بينا الغدا جاهز.. وكمل بتمثيل..
مش عايز أقولكم قد ايه طلع عيني في المطبخ.. يلهووووي ع الفرهده..

رينو : أبتسمت وقالت معلش الجوع يعمل أكتر من كدا..
قوم يا آدم..قوم ياحبيبى اتغدا..وانتي كمان يا آرين..

آدم مراد : قام وشاور ل آرين..وقال يلا يا رينو ياصغيره..

آرين : قامت بحرج وجواها رافض الاستسلام اللي هي فيه..
لكن مش عارفه ليه مسلوبه ف عشق الادم..

آركان : شد الكرسي ل آرين وقال اتفضلي ياريبونزل هانم..

آرين : قعدت ومش حاسه بلذة الحياة..حاسه كأنها دميه بتتحرك علشان الوقت يعدي وخلاص..

آدم مراد : شد الكرسي وقعد قصادها..

آركان : بنهم.. أممم فراخ مشويه وبيتزا وشاورما سوري وسلطات والذي منه.. تسلم ايدك يا آدم باشا.

آدم مراد : هز راسه.. وقال أنا جايب البيتزا والشاورما ل آرين. وكمان ازازة كاتشب ليها راحت فين ؟

آركان : بمكر.. أممم هي دي وطلعها من ورا ضهرو..

آدم مراد : بثبات..ايوه دي ل آرين..

آركان : بغيظ مصطنع طيب وأنا؟

آدم مراد : بياكل وقال بعدم إهتمام. قوم جيب من المطبخ.. أنا مش هأكلك واصرف عليك وانت شحط..

آركان : بغيظ..يعني صارف كل ده والفيزا خلصت ع الكاتشب؟
لأ وقال ايه؟ مش هصرف عليك؟ والله.........!!! احم طيب خلاص رايح أجيب الكاتشب.. وقام..

آرين : قاعده ساكته..

آدم مراد : فتح علبة بيتزا وحطها قدامها.. وقال بخبث لو ما اكلتيش.. صدقيني هأكلك بأيدي قدام آركان..!!
وانتي عارفه إني مبخافش ولا بقول كلام وخلاص.. عايزاني اكلك بأيدي.. أنتي حره..!!

آرين : تنحت بزهول.. وبلعت ريقها بتوتر..قالت بحرج. لأ انا هاكل.. أحم..

آدم مراد : مسك قطعة بيتزا من قدامه..وقال طيب امسكي دي كليها..

آرين : بتوتر . لأ انا قدامي أهو..

آدم مراد : أبتسم..وقال حابب نقسم كل حاجه انا وأنتي مع بعض..

آرين : اتلخبطت..ورفعت أيدها بحرج واخدتها..

آركان : جه وقال اوعااا الكاتشب.. وقعد وقال بسم الله..كلي ياريبونزل..كلي يابت العزومه دي مش هتحصل غير كل كسوف للشمس..

آدم مراد : بصله وقال كل وانت ساكت..

آركان : بغيظ مكبت وقال جواه.. اومال لو مكنش في بيتنا كان عمل ايه؟

آدم مراد : آركان.. كل بسرعه علشان هاخدك مشوار مهم..

آركان : كح وقال أستر يارب...

آدم مراد : بيسرق النظر ل آرين.. وقلبه زعلان عليها. لأنه حس أنها بتاكل بشرود..
وكأنها عايشه في عالم تاني.. لكن اهتم بيها ع قد ما قدر..

رينو : بتكلم فهد في الفون وحكتله على كل حاجه من أول اغماء آرين لحد ما اكلت أخيرا بفضل الله ثم الديزل..
وفهد بيسمعها وساكت تماماً...

بعد شويه في الليفنج...!!!
-------------يتبع



موعد الحلقة الجديدة الساعة  8 م  يوميا ان شاء الله .

هنا تنتهى احداث رواية جريمة عشق 5 الفصل 52 ، يمكنكم اكمال باقى احداث رواية جريمة عشق الجزء الخامس الفصل 53 أوقراءة المزيد من الروايات المكتملة فى قسم روايات كاملة .

نأمل أن تكونوا قد استمتعتم بـ رواية جريمة عشق الجزء الخامس ، والى اللقاء فى حلقة قادمة بإذن الله ، لمزيد من الروايات يمكنكم متابعتنا على الموقع أو فيس بوك ، كما يمكنكم طلب رواياتكم المفضلة وسنقوم بوضعها كاملة على المدونة .
تعليقات



حجم الخط
+
16
-
تباعد السطور
+
2
-