البارت السابع عشر من رواية "مودة ورحمة" بقلم مروة مصطفي.
مودة ورحمة الفصل السابع عشر
البارت السابع عشر 🌹
فور وقوع دنيا أرضا جري الكل عليها وحملها بهاء ووضعها على الأريكه الموضوعة بالحديقة وظل يربت على وجهها بخفة حتى افاقت ووجدت الكل يقف حاولت الاعتدال ولكن منعها بهاء
- خليكي مرتاحة يا دنيا قوليلي حاسة بأيه
- ولا حاجة والله انا بس فجاءه حسيت الدنيا لفت بيا قوي يظهر بس من الضغط ماتقلقوش انا كويسة والله ونظرت فوجدت باهر ينظر لها وعيونه تترقرق بالدموع ففتحت يدها له و ابتسمت له تعال يا باهر فجري عليها وارتمي في احضانها متعلقاً برقبتها بيده السليمة ودموعه تسقط ببطء وهو يهمس في رقبتها
- دودو باهر حبك قوي فأحتضنته دنيا بقوة وهي تقبله
- ودودو بتحبك قوي يا بوبو انا كويسة حبيبي ماتخاقش يالا انزل روح اتفرج على الكارتون مع حسين وأمل حبيبي
- ماشي دودو
هبط باهر من على قدم دنيا وذهب مع حسين وأمل لمشاهدة التلفاز واعتدلت دنيا ونظرت لهم
- اقعدوا بقى علشان اقولكم كنت ح اقول ايه فنظر لها حسين واقترب مقبلاً رأسها
- دنيا حبيبتي المهم طمنيني عليكي الأول
- ماتقلقش يابابا انا زي الفل المهم اقعدوا بقى
جلسوا جميعا وقبل ان تتحدث دنيا هاجمت أمير إحدى نوبات انسحاب المخدر فوقع أرضا و ظل جسده يرتعش فجري عليه حسين واحتضنه بقوه وصرخ ببهاء
- هات الدواء اللي في الشنطة دي بسرعة يا بهاء
وبالفعل احضر بهاء الدواء واعطاه لحسين الذي وضعه في فم أمير وظل يمسد على رأسه وهو يقرء له بعض آيات من الذكر الحكيم وكانت دنيا تضع يدها على فمها من هول المنظر اما يمني فانهارت بجواره تبكي وهي تراه ينتفض كالمريض بالصرع وحاول أمير التماسك وحرك رأسه جهتها وهمس بصوت ضعيف وهو يرفع يده بوهن ليمسح دموعها
- ماتعيطيش انا مستهلش دموعك دي حبيبتي ده ذنبك يا مونيتي
- ماتقولش كده ح تبقى كويس يا أمير ح تبقى كويس وربنا ح ينتقم من اللي عملت فينا كده
- ان شاء الله حبيبتي
بعد مرور اقل من ساعة استعاد أمير توازنه قليلاً ونظر لهم
- اسف على كل ده سامحوني
فأقتربت منه هناء ووضعت يدها على رأسه
- ماتقولش كده حبيبي ان شاء الله تبقى زي الفل وحياتكم ترجع احسن من الاول المهم انت تماسك واوع تضعف فاهم
- ماتخافيش يا امي تسمحي اقولك امي فأحتضنته هناء تقبل راسه
- انا امك غصب عنك ياواد ثم رفعت نظرها ونظرت لهم ورفعت حاجبها وصاحت بهم يالهوي يعني انا ابقى ام الاربع شحوطة دول لا كده عيب والله الراجل يطفش ويقولي عجزتي ويدور على عروسة تانية وانا لسه عروسة جديدة
ضحك الجميع حتى كادوا يبكون واقترب منها حسين واوقفها أمامه ونظر لها وهو يبتسم لها بحب
- اوعي تقولي كده حتى لو كنتي ام لعشرة زي دول انتي في نظري أجمل وارق واحن هنونة في الدنيا ده انتي رجعتي لي للدنيا تاني يا هنونتي
ابتسم الكل وعادوا للجلوس مرة اخرى وجلست يمني بجوار أمير وهي تمسك بيده بحنان وجلس بهاء بجوار دنيا وكذلك حسين بجوار هناء ونظرت لهم دنيا بحب
- بصوا بقي دلوقتي يمني كانت قاعدة في شقة نانا تحت ومعظم الوقت بتبقى معانا فوق الشقة دي كلكم عارفين انها مش مستخدمة مافيش غير الجزء الصغير اللي فصلناه عنها علشان يبقى تبع الحضانة بتاعتنا وضبوها ولو مش عاجبكم الفرش اللي فيها هاتوا غيره وخليكم معانا هنا كده تبقى كلنا مع بعض وممكن كمان مع الوقت نبني دور فوق البيت لسه له يبني دورين كمان خلونا متجمعين سوا بلاش نفترق ممكن عايزة احس ان ليا اهل كتير اب وام واخوات ابقى خالة اوعمه بلاش تحرمني ده وكمان ولادي يبقى معاهم ولاد اخواتي يلعبوا معاهم ويكبروا سوا
نظر الكل لها وهم في حالة صمت ثم قامت يمني وارتمت في أحضان دنيا تبكي
- انتي كده ازاي نفسي افهم ازاي عندك قدرة اصلا تتعايشي معانا بعد اللي حصل معاكي احتضنتها دنيا وقبلتها
- يمني انتي وبابا مالكوش دعوة باللي حصل وبعدين بابا كان في ضهري طول الوقت واديكي شفتي عمل ايه علشان خاطري وانتي كمان طول عمرك اختي وقلبك عليا يبقى انتم مالكم بقى نظرت لها يمني
- طيب يا دنيا متزعليش مني ونظرت لبهاء بس بهاء ممكن يضايق
نظر لها باستغراب ورفع حاجبه ينظر لها
- وبهاء ح يضايق ليه يا ست يمني قاعدة بتاكلي وبتمسحي في هدومي ضحكوا جميعا ونظرت له يمني
- يابهاء خلينا نتكلم بالعقل وبالراحة دلوقتي انا وبابا على طلب دنيا ح نعيش هنا طيب مش ممكن يجي وقت وياسر يحب يجي يشوف بابا او يشوفني
وجمت دنيا فهي لم تفكر في ياسر نهائي وكذلك وضع حسين وجهه أرضاً فتنهد بهاء بهدوء ونظر لهم
- يمني احنا كبار وعاقلين وفاهمين كويس الوضع دنيا مراتي وأم ولادي وياسر طليقها واللي حصل بينهم يخلي دنيا تكره ياسر كره العمى لكن لما سألتها بتكرهيه ردت رد رائع قالت لي لو كرهته يبقى لسه في مشاعر ناحيته الكره والحب مشاعر لكن هو بالنسبة لي بقى مش موجود بقى هوا وبعدين انا واثق في مراتي كويس قوي هو عايز يجي لكم اهلا وسهلا بيه في شقتك او شقة بابا صح كلامي يا دنيا
ابتسمت دنيا وهي تنظر له نظرة عرفان ورضا بكلامه
- طبعا يابهاء كلامك صح مليون في الميه خلاص كده اتفقنا على كل حاجة بس انت يا أمير ح تعمل ايه في شغلك
- ولا حاجة اسبوع بس اقعد اعوض شوية من افتقادي ليمني والأولاد وبعدها ح اسافر وح أبلغ خالد رئيسي اني راجع انهي كله واخلص كل حاجة وارجع على طول بس يمني عايزك تيجي معايا ممكن
- مافيش داعي يا أمير روح انت وخلص كل حاجة وارجع حرام نتشحطط كلنا علشان كام يوم وتكلفة مالهاش داعي
- طيب خلاص انا ح اكلم خالد واعمله توكيل هنا وابعته له هو يخلص كل حاجة واسافر بس يوم امضي على نهاية العمل واستلم مستحقاتي وارجع انا مش ح اقدر ابعد عنك تاني ولا يوم واحد
فجاءه وجدت دنيا باهر يأتي لها
- دودو انا جعان قوي وكمان حسين وأمل بس مش قالوا
- حالا ياقلب دودو احنا اتاخرنا قوي في الغداء في اليوم الغريب ده ونظرت لبهاء يالهوي بهاء مروحتش الشغل
ضحك بهاء ونظر لها
- ولا يهمك ياستي لو كان في حاجة كانوا كلموني يالا تعالوا نطلع علشان نتغدى كلنا سوا
🌺🌺🌺🌺🌺🌺🌺🌺🌺🌺🌺🌺🌺🌺🌺🌺
تجلس الهام مع رانيا وهم لا يعرفون ماذا يفعلون مع ياسر الذي أصبح يتجنبهم تماما ولا يجلس معهم ولا حتى يأكل معهم ونظرت رانيا لالهام
- وبعدين ح نعمل ايه ح نفضل كده ياسر محرج على اي واحدة فينا تقرب منه انا تعبت يا طنط
- كله من الزفتة اللي اسمها دنيا تقولي عاملة له سحر حاجة تقرف
- بيحبها يا طنط بيحبها انا كنت بحس ساعات وهو معايا كأنه سرحان فيها انا زهقت من العيشة دي كنت فاكرة انه ح يحبني زي ما كان بيحبها انا اتجوزته علشان حبه لها كنت عايزة اعيش الحب ده بس للاسف كله ضاع
- اتلهي ياهبلة بكرة لما تخلفي ابنه او بنته ينسوه الدنيا ومافيها ويبقى انتم وبس
- ياريت اللي بتقوليه ده يطلع صح
- ان شاء الله
- طيب يا طنط انا تعبانة وح ادخل انام
تركتها رانيا ودخلت غرفتها بعيدا عن غرفة ياسر وظلت الهام تنظر لها وهي تحرك شفتيها بتأفف
- ياختي بلا نيلة اتجوزنا وخلفنا وكنا زي القرود مش دي اللي من ساعة ما حملت تعبانة تعبانة ونايمة وحاجة تقرف عقبال ما تولد ح تكون طلعت عنينا حكم
يجلس ياسر في عمله فهو يخرج كل ما بداخله في عمله فقط ويظل به حتى يستهلك اكثر الوقت ويعود فقط منه للبيت حتى ينام ويقوم بالاتصال بأبيه واخته للاطمئنان عليهم والسؤال عنهم ولا يجرؤ ان يسأل عن دنيا رغم شوقه ولهفته لمعرفة أخبارها
🌺🌺🌺🌺🌺🌺🌺🌺🌺🌺🌺🌺🌺🌺🌺🌺
يجلسون جميعا يتناولون الشاي والقهوة وباهر يجلس في أحضان دنيا وهي تمسد على شعره وتقبل يده المصابة كل قليل وكان بهاء ينظر لها وهو مبتسم لرؤيته لها كيف تعامل باهر ورحيق وفجاءه استمعت لأمير ينادي عليها
- دنيا كنت عايز استأذنك في حاجة فنظرت له دنيا
- خير يا أمير في ايه
- كنت عايز اروح اقابل اخو يمني فأستغربت دنيا ونظرت له
- طيب انا مالي يا أمير تقابله او لا يخصني في ايه
- كنت عايز اعرف لو سأل عليكي اقول ايه اسف يا بهاء على سؤالي بس علشان ماعكش الدنيا
فأبتسم بهاء بود ووضع يده على ساقه وتحدث هو
- بص يا أمير لو سأل على دنيا قوله انها كويسة جدا وعايشة حياتها بتشتغل و بتعمل كل اللي نفسها فيه بس كده وانه يستحسن يعيش حياته ويبطل يسأل عليها
- يعني بلاش اقول انكم اتجوزتم
- لا يا أمير مايخصوش ده وبعدين دنيا لها وجهه نظر وانا محترمها ومقدرها هي مش عايزاه يعرف عنها أي حاجة
- حقها يا بهاء اكيد انا عموما بكره ح اروح له الشركة اقابله هناك لاني مش عايز لا احتك بحماتي ولا بأي حد ح تيجي معايا يا يمني نظرت له يمني وعادت بنظرها لدنيا
- دنيا بكره رايحة مع بهاء الشغل ولا هنا
- لا حبيبتي هنا معلش يابهاء انا ح اخلص اي شغل من هنا لغاية باهر مايخف خالص، وبعدها انزل
نظر لها بهاء وابتسم
- وماله مافيش اي مشكلة خليكي براحتك زي ماتحبي
عادت يمني تنظر لأمير
- خلاص ح اروح معاك منها اشوفه ومنها ماتخرجش لوحدك بالحالة اللي بتحصلك دي وبعدين لازم نروح لدكتور يا أمير
- ان شاء الله حبيبتي
امضوا السهرة معاً وبعدها حمل أمير ابنته التي نامت وهبط هو وزوجته وابنه للأسفل وكذلك دخل حسين وهناء شقتهم وأدخلت دنيا باهر في فراشه ودثرته جيدا وخرجت وجدت بهاء يداعب رحيق ويناغشها وهي تنام جواره على الاريكة فاقتربت دنيا وجلست بجوار رحيق من الجهة الأخرى ولاحظ بهاء ان رحيق تعافر حتى تنظر إلى دنيا وعندما لما تستطع بكت فحملتها دنيا وهي تلاعبها فضحكت وأخذت تحرك يدها وساقها بسعادة فأبتسم بهاء ونظر لدنيا
- عارفة يادنيا انا متهيألي لو رحيق عايشة العيال دي كانت ح تحبك اكتر منها انتي ايه كم الحنان بتاعك ده بجد مش ممكن الاتنين متعلقين بيكي بشكل رهيب ازاي قدرتي تحسي بباهر يا دنيا
التفتت له دنيا وهي تحتضن رحيق وتهدهدها حتى تنام
- قلبي وجعني يا بهاء حسيت فجاءه بألم في قلبي وكأني كنت سامعه باهر بينادي عليا ابتسم بهاء
- عارفة ان ماما رضا بتقولي اول ما وقع نده عليكي فعلا
- حبيب قلبي ربنا يشفيه
- بتحبيهم قوي كده يادنيا
تنهدت دنيا ونظرت لبهاء واحتضنت رحيق بحنان
- بحبهم بس انا روحي فيهم يا بهاء بالاضافة انهم ولادك انت ورحيق
- ربنا يحفظك لنا كلنا يا ديدي
ضحكت دنيا وهي تنظر له
- يااااااااه لسه فاكر ياهيبو
- تفتكري حد يقدر ينسى عمره كله احنا عمرنا كله مع بعض يا دنيا
- عندك حق مافترقناش الا لما صممت رحيق تدخل حقوق وانا حصلتك على هندسة وبعدها لما اتجوزت واديني رجعت لقواعدي مرة اخري
ضحك بهاء ودنيا ونظر لها بهاء
- عودا حميدا ديدي هانم
ظل الاثنان يتحدثان معا حتى نامت رحيق فنهضت دنيا ونظرت لـ بهاء
- عايز حاجة ح اقوم بقى انام فرصة الست روكا نامت الحق انام شوية احسن البت دي طالعة عليها دماغ ايه مصفحة طالعه لك ياخويا تصبح على خير نظر لها بهاء
- وانتي من اهل الخير يا دنيا
🌺🌺🌺🌺🌺🌺🌺🌺🌺🌺🌺🌺🌺🌺🌺🌺
بالأسفل ظل أمير يعتذر لـ يمني مرة تلو المرة بعد أن نام الاولاد وكانت هي تبكي ظلوا يتعاتبون وهي تنظر له بحزن
- سامحيني يا يمني حقك عليا ياحب عمري
- لو كنت حب عمرك ماكنتش عملت فيا كده يا أمير قصرت معاك في ايه قولي حاجة واحدة بس
- ولا اي حاجة يا يمني ولا اي حاجة انا اللي غبي عرفت تضحك عليا وتوريني دنيا تانية غريبة عنا قلت اجرب مرة ايه المشكلة المرة جربت مرة وفي مرة منهم فوقت لقتني جانبها وفهمتني اني اني ضيعتها فضلت تايه كان نفسي اجري على حضنك واقولك الحقيني اعمل ايه بس مقدرتش قلت أصلح غلطي فترة وبعدين اسيبها لكن هي شيطان فضلت تخترع حاجات غريبة وجديدة وحاجة تسحب حاجة لما اتوحلت وبقيت مش عارف اخرج كأني دخلت رمله متحركة كل ما اخرج اغرز تاني بس الحمدلله لحقت نفسي في الاخر كنتي انتي والأولاد النور اللي بيشدني
نظرت له يمني بحزن والم ودموعها تتساقط
- بعد ايه لحقت نفسك بعد ايه بعد ما دمرت حياتنا وجعتني وجرحتني والله اعلم ح اعرف اخف من كل ده ولا لا
- مافيش لا يا مونيتي ح نحاول سوا ح نسند بعض زي ماطول العمر بنسند بعض
نظرت له يمني
- الألم اللي جوايا كبير قوي يا أمير
- معاكي واحدة واحدة ح نعدي منه يا يمني
- ان شاء الله يالا ادخل علشان تنام جسمك اكيد محتاج الراحة
- ح انام فين يا مونيتي نظرت له يمني
- مش ح اقدر اقولك تنام مع الاولاد او بره حسين ح يفهم ان في حاجة ح تنام معايا في الاوضة ثم رفعت اصبعها أمامه بس حسك عينك تقرب منى فاهم
وقف أمير وهو يضرب تعظيم سلام لـ يمني وهو يبتسم
- أمر مولاتي ينفذ فورا
- ماشي ياسيدي اتفضل ادامي
دخل أمير ويمني الي غرفة النوم ودخلوا الفراش وكل واحد في جهة والاثنان في حالة لا يرثي لها واغمضت يمني عيناها حتى تجبر نفسها على النوم ولكنها مستيقظة وعندما شعر امير انها نامت اقترب منها دون أن يلمسها وظل يمسد على شعرها كما كان يحب دائما وهي نائمة في أحضانه ولكنها اليوم بعيدا عن متناول يده فدمعت عينه وهو يهمس لها بعبارات السماح والاعتذار ودموعه تتساقط على شعرها وهي تبكي معه دون أن يشعر حتى نام الاثنان بعد معاناه
🌺🌺🌺🌺🌺🌺🌺🌺🌺🌺🌺🌺🌺🌺🌺🌺
في الصباح استيقظ الجميع وبعد تناولهم الإفطار سويا انصرف كلا الي عمله واخذ أمير يمني وذهب لرؤية اخوها وصديقه وعندما راءه ياسر احتضنه بقوة رغم علمه بما فعله في اخته ولكنه تؤامه وجلسوا سويا وتحدثوا وعلم ياسر كل شئ حدث مع أمير فنظر لأخته وعيونه تترقرق بالدموع
- الوجع اللي حاسة بيه مميت عارف يا يمني بس سامحي والحقي جوزك واوعى حد يأثر عليكي كفاية انا سمحت لأمك تتدخل دمرتني ودمرت حياتي ضيعت حبي الوحيد مني انا ساعدتها على كده انا غلطان زيها بس خلاص كل حاجة انتهت وخسرت دنيا للأبد ونظر لـ يمني فشعرت بوجعه والمه وهمس يمني دنيا عاملة ايه فأبتسمت يمني بحزن على المه
- انساها يا ياسر انساها دنيا انتهت من حياتك زي ما قلت للأبد وانت كمان انتهيت من حياتها سيبها حبيبي وخرجها من دماغك وقلبك وخليك في مراتك وابنك ولا بنتك اللي جاي عيش حياتك وسيبها هي كمان
ابتسم ياسر و معه أسقط من عينه دمعة
- انساها صعب يا يمني مستحيل انا عارف وواثق اني انتهيت من حياة دنيا للأبد بس هي عمرها ما ح تنتهي من حياتي ح تفضل دائما موجودة جوه قلبي
وضع أمير يده على كتفه وهو يربت عليه بحنان
- ياسر حبيبي عيش حياتك لمراتك وانسى دنيا يمكن تيجي يوم وتعيش حياتها هي كمان
تساقطت دمعة اخرى من عينه ونظر لهم
- عارف انها ممكن تبدء من جديد واتمنى لها تلاقي الراجل اللي يستحقها ويقدرها انا فعلا ماكنتش استحقها انا كسرتها كسرة وحشه قوي ربنا يقدرها وتقف منها خليكي جانبها يا يمني اوعي تسيبيها انا عارف ان بابا جانبها وفي ضهرها بس انتي حاجة تانية
- ماتخافش يا ياسر انا معاها دائما المهم انت خد بالك من نفسك وحافظ على بيتك
ابتسم ياسر بحزن
- بيتي هديته بأيدي ودلوقتي بتحمل تمن غلطتي بعيشة ماما و رانيا معايا ماما اللي كانت السبب الرئيسي في هدم بيتي بكرهها لدنيا عارفة انا بفضل قاعد في الشغل لغاية ما اتعب وبعدها اروح انام انا عايش معاهم في اوضة ماليش علاقة بيهم خالص هما في حالهم وانا في حالي حتى أكلي هنا في الشركة
شعرت يمني بالحزن وهي لا تعرف ماذا تفعل معه وكيف تساعده او تخفف عنه وطئ ماصنعه بنفسه فدنيا أصبحت زوجة لرجل اخر ولديها حياة اخرى وقفت واحتضنت أخيها بحب وهي تربت على ظهره
- حاول تبقى كويس يا ياسر وابقى تعال مش عايز تشوف ولادي وبابا وماما هناء
- نفسي يا يمني بس مش عايز اضايق دنيا او اقلب عليها المواجع
- ماتخافش دنيا مش معترضة تيجي تشوفنا احنا خلاص بقينا عايشين معاها حتى لما يرجع أمير مصممة اننا نفضل معاها في البيت عارف اننا فتحنا استضافة للأطفال وبنشتغل فيها انا ودنيا وماما هناء عارفين انا واثقة ان دنيا عملتها مخصوص علشاني لما حست ان قعدتي ممكن تطول وعارفة عزة نفسي ابتسم ياسر وهو يطلق تنهيده قوية
- دنيا دي مافيش زيها ربنا يكرمها بحق كل يوم خلتني عايش في الجنة
قامت يمني وأمير بالسلام على ياسر وانصرفوا على وعد منه بالذهاب لهم يوماً ونزلت يمني مع أمير وهي تبكي أخيها وحالته ومافعله بنفسه
"اشتركوا على قناتنا على تليجرام أو قناة واتساب ليصلكم أحدث الفصول والتنبيهات فور نشرها"
"اشتركوا على قناتنا على تليجرام أو قناة واتساب ليصلكم أحدث الفصول والتنبيهات فور نشرها"
