أبناء الصبا الفصل الثامن
الفصل الثامن
جاء اياس قائلا بغضب:يلا عشان تروحوا
اومأت له أريج ثم أخذت عائشة وتوجت خلفه باتجاه السياره
ركب السياره بغضب شديد ثم قال :واما هو بيتعرض لها من وقت كبير ليه معرفتونيش
اريج:عائشة كانت خايفه تقول لحد
إياس بغضب:وخوفها دا جاب نتيجه اهى كل الجامعه هتحكى عليها بسبب اللى حصل
بكت عائشة بشدة فضرب إياس على مقود السياره بغضب متوعدا لها
؛--------------------
وصل إياس إلى الفيلا فى وقت قياسى بسبب السرعة التى كان يقود بها فأوقف السيارة ونزلت عائشة مسرعة وتوجهت إلى غرفتها فلحقتها أريج إلى الداخل
صبا :ايه يا أريج ايه اللى حصل هى بتجري كدا ليه
أريج :هى متضايقه شوية بس انا طالعه لها
صبا:طيب استنى خدينى معاكى ايه دا إياس انت جيت بدري كدا ليه فى ايه فهمونى
إياس:مفيش يا امى انا رايح الشركه مكان اوس أنا كنت بوصلهم بس
صبا:وعائشة مالها انت عملت لها حاجه يا إياس
اياس:هعمل لها ايه يعنى انا مكنتش عندهم النهاردة اصلا سلام بقا
ذهب وتركها فى حيرتها فهو لا يريد ان يخبر أحد بما حدث يكفى الحزن الذي يسودهم بسبب عمار علم ان أمه لن تتركة حتى تعلم ما حدث لذلك تهرب منها حتى لا يضطر الى الكذب كل هذا لأجل من تلك الغيبه التى لم تخبره سابقا بذلك الوقح الذي كان يتعرض لها صبرا يا عائشة هذا ما توجه إليه عقله
صعدت أريج إلى حجرة عائشة وخلفها صبا فوجدتا عائشة تبكى
صبا:مالك يا حبيبتى فى ايه
عائشة تبكى دون أن تتفوه بشيئ
صبا:فى ايه يا أريج
أخبرتها أريج بما حدث فنظرت صبا إلى عائشة قائلة:أنا مش قلت لك قولى لاياس يا عائشة شوفتى عنادك وصلنا لفين
عائشة ببكاء:مكنتش اعرف انه هيحصل كدا والله والله ما كنت اعرف
صبا بحنان:خلاص أهدي قدر الله وما شاء فعل اهدي بس خلاص الحيوان دا خد عقابه
عائشة ببكاء:هيتكلموا عليا فى الجامعه
صبا:هو انتى عملتى ايه غلط عشان تخافى يتكلموا عليكى ولا لا انتى مغلطيش فى حاجه اللى يتكلم يتكلم كل دا عند ربنا يحبيبتى
أريج بمرح:الله عليكى يا صبا يا جامد
صبا بغرور مصطنع:دا أقل حاجه عندي يا بنتى
ابتسمت عائشة على حديثهم فقالت أريج:الله ضحكت ضحكت يعنى قلبها مال
صبا:هههههه
أريج:إلا قوليلى يا حماتشى العزيزه
صبا:نعم يا أوختشى
أريج:هو أوس مشى ولا لسه
صبا :أيوه شوف البت يا ولاه
أريج بخجل:خلاص مش عايزه أعرف
صبا:هو مشى بقاله ساعه وقبل ما توصلوا اتصلت بيه وقال انه وصل المطار
اريج:ماشى
عائشة:يارب عمار يرضى ييجى معاه
صبا:يااارب بس انا عارفه عمار ربنا يستر
عائشة: ياارب
صبا:تعالوا ناخد حفصه وننزل نقعد تحت
عائشة بخوف:لأ لأ مش عايزه انزل
صبا:متخافيش مشى
عائشة بارتباك :هو مين دا انا مش خايفه منه اصلا
صبا:ما انا عارفه يلا بقا
عائشة:عارفه لو لقيناه
صبا:ههههه مش انتى مش خايفه منه
نظرت إليها عائشة بغيظ ثم قالت:طيب استنى هغير واجى
صبا :ماشى خلصى بسرعه
عائشة :حاضر
بعد عدة ساعات وصل أوس إلى باريس وتوجه الى الشقة التى يسكن عمار بها ودق الجرس ففتح عمار قائلا :هو انت مين فيهم
أوس:أنا أوس يا أخويا وسع كدا
دلف عمار إلى الداخل فدلف أوس قائلا:هو دا اللى اتفقنا عليه
عمار:كدا أحسن لينا احنا الاتنين
اوس:وانت مرتاح كدا
عمار:اهو عايش
أوس:حفصه طول الوقت بتعيط
ألمه قلبة بشدة ود أن يذهب اليها ويأخذها فى احضانه ويواسى قلبها ويعتذر منها على كل دمعه ذرفتها عيونها وإن كانت هى السبب ولكن ماذا يفعل بقلبة الذي يعشقها أينتزعه من صدرة كل يقف نبضة ويرتاح من هذا العذاب الذي يلاحقه هو لم يطلقها ولكن ابتعد عنها فترة كى لا تتفوه بتلك الخرافات مره أخري فلم يكن من السهل علية كل ما تفوهت به هو يريد وبشدة الوقوف فى مكان خالى والصراخ بحبها
أوس:بتعذب نفسك وبتعذبها ليه انت ضغطت عليها وقلت لها انك هتخطب عشان تتكلم وتقول اللى فيها وفى الاخر بعد ما عرفت بتسافر وتبعد عنها
عمار:لازم ابعد عشان تفكر ألف مرة بعد كدا قبل ما تقول الكلام دا تانى انت عارف ان لسه الطريق ادامنا طويل وهنواجه كتير مش فى كل مره ولا فى كل مشكلة تطلب الطلاق وتعمل كدا انت عارف ان حفصه بتستسلم على طول مش كل مره هنفضل كدا
أوس :طيب كان ممكن تعاقبها وانت جنبها ليه البعد
عمار:عشان مش هقدر اقسى عليها وهى ادامى مش هقدر
أوس:طيب انت هتفضل هنا لحد امتى
عمار:لحد ما أحس انى عايز أرجع
اوس:مش عارف اقولك ايه بس فكر انها تعبانه من غيرك ومحتاجاك
عمار:أنا تعبان اكتر منها بس دا تعب لابد منه
أوس:طيب خد الورقة دي طلبت منى اديها لك انا هدخل أنام شويه عشان مصدع وانت فكر
أومأ له عمار بإيجاب ونظر إلى الورقة بلهفة حاول اخفائها ثم سرعان ما فتحها عندما دخل أوس الغرفة وأغلق الباب خلفه فوجد محتواها جملة واحده فقط ولكن بها الكثير من المعانى لم يدرك معناها سواه هو وهى فقط:قلبى مستنيك ومش بينبض غير بحبك
لا احد يشتاق لك مثلي!! ولا احد يحتاجك اكثر مني!! ولا احد ينقبض قلبه خوفا عليك كما ينقبض قلبي!! فكن بخير لأجلي..!
نظر إلى الورقة بألم قائلا:هرجع لك يا حبيبتى بس مش دلوقتى لازم أقسى عليكى شوية علشانا احنا الاتنين وانا كمان بموت من غيرك يا قلب عمار وحشتينى اوووي
مر يومين وعائشة لم تذهب الى الجامعه خوفا مما حدث وأريج تذهب برفقة حور كى لا تذهب مع إياس بمفردها وأوس حاول مع عمار كثيرا ولكن عمار يأبى الرجوع
أوس:يعنى هرجع كدا من غيرك
عمار:ايوه
أوس:حفصه هتصعب عليا
عمار:متسبهاش زعلانه
أوس:ما انت بإيدك تفرحها
عمار:خلاص بقا يا أوس ومتنساش زي ما قلت لك
أوس:اه عايزنى اجيب لك تقرير يومى عنها معرفش بتعمل فى نفسك كدا ليه دماغك دي
عمار:يلا روح يا أوس
أوس:ماشى يا صاحبى
وسلم عليه وتوجه الى المطار للعوده إلى مصر
كانت صبا جالسه مع عائشة تتحدث معها بشأن عدم ذهابها إلى الجامعه
صبا:انتى مش هتروحى النهارده بردوا
عائشة:لا
صبا:عائشة الكلية بتاعتك مش سهله
عائشة:مش هروح النهارده بس وهروح الأسبوع الجاى
صبا:عندك إياس النهارده صح
عائشة:أيوه
صبا:طب قومى البسى وروحى يلا
عائشة:لا مش هروح
جاء اياس من الخلف قائلا :مش هتروحى ليه
عائشة بتوتر:كدا مش هروح النهارده بس
اياس:هى أريج معرفتكيش ان عندك امتحان النهارده
عائشة بتوتر اكبر:لأ قالت لى
اياس:وانتى عادي عندك تنزلى عشر درجات من تقديرك
عائشة بصدمه:هو علية درجات
اياس:أيوه طبعا فى امتحانين فى الترم كل امتحان علية عشرة
عائشة:طيب خلاص هلبس واروح
صبا:استنى هو هيوديكى
نظرت إليها عائشة ففهمت صبا ما تود قوله وقالت:أنا هاجى معاكى النهاردة اصلا أوس ادامه اكتر من خمس ساعات على ما ييجى
اياس بصدمه:هتيجى الجامعه
صبا :اه انا زهقانه اصلا هتصل بمصعب اقوله مش هيقول حاجه ادام معاك
إياس :ماشى خمس دقايق وتكونوا لبستوا انا مبحبش اتأخر على محاضرات
اومأت له عائشة بخوف واخذتها صبا وذهبت إلى الأعلى
صبا:هههههه انتى بتخافى منه كدا ليه
عائشة:مش بخاف اصلا
صبا وهى تنظر إلى الخلف:مش بتقول عليك انت يا إياس
نظرت عائشة إلى الخلف بخوف شديد فضحكت صبا بشدة
نظرت إليها عائشة بغيظ قائله:اصلك مشوفتهوش وهو بيضرب الواد اللى كان بيضايقنى يا نهار أبيض ضربه ضرب لأ وفى الاخر بيقول انا كدا معملتش حاجه دا انا لو خدت كف من دول اسنانى هتتكسر
صبا:ههههه هو عمرة ما هيضربك يا هبله هو مبيضربش بنات ههههه
عائشة:لا يختى اسمع كلامة اصل يتهور وانا مش ناقصة
صبا:يا نهار أبيض البسى بسرعه أصل يتهور علينا احنا الاتنين
هرولت عائشة إلى غرفتها وارتدت ملابسها بسرعه وأيضا صبا انتهت من ارتداء ملابسها
صبا :يلا
عائشة:والله لو حد شافك ما هيصدق انك ام اصلا بعيونك دي
صبا: شبه عيونك
عائشة:ههههه بس عشان انتى لابسة نقاب مش باين إلا هى
صبا وهى تصعد إلى سيارة اياس:عقبال ما تلبسية انتى كمان
عائشة:يااارب بس للاسف أبى مش موافق
صبا:انتى عارفه انا اول ما لبست نقاب أبوكى وحتى مصعب مكانوش حابينه خالص بس بعد كدا خدوا عليا
عائشة:بس انا نفسى ألبسة اوي عارف كدا ومش بيوافق و بيقول صعب أصلا واوس و إياس معانا فى البيت
صبا:بصى هى فعلا بتبقى صعبة شويه لأنك بتضطري تقعدي فى البيت بالنقاب وكدا بس مع الوقت بتاخدي وكمان لو بتحبى النقاب مش هتبقى صعبه بالعكس هتحبى كدا
عائشة:طيب هو ينفع ألبس النقاب من غير موافقة أبى
صبا:بصى يا عائشة هسألك سؤال هو وجوب طاعة الوالدين حد من العلماء اختلف فيه
عائشة:لا
صبا:طيب حكم النقاب
عائشة :اختلفوا
صبا:طيب انا من وجهة نظري ان احنا نعمل الواجب تمام هتقولى طيب ما هو لا طاعه لمخلوق فى معصية الخالق هقولك هو مش بيأمرك تمشى بشعرك او ببنطلون ولا حتى بحجاب غير شرعى بالعكس انتى لو لبستى حاجه ضيقه او خمار قصير هيزعل منك صح
عائشة:أيوه
صبا:خلاص يبقى المفروض دلوقتى تعملى الفرض الواجب اللى هو طاعة الوالدين وبعدين تقنعى أهلك فى المختلف فى وجوبه
صبا:طب ازاى أقنعه هو مش بيقتنع هو بيقفل معايا اما أفتح معاه الموضوع اصلا مش متقبل انى أكلمه فيه اصلا
صبا: بصى اول حاجه واهم حاجه تدعى ربنا كتيير اوي
عائشة:دايما بدعى والله
صبا : طيب كمان دايما حسسيه بحبك فى النقاب احرصي على زيادة البر والاحترام خاصة ليه هو وفجر حسسية انك اد النقاب اوعى تتخانقى معاه وتتعاركى لأن دا مش هيجيب نتيجه حاولى تعريفهم فضل النقاب بطريقة غير مباشرة من غير ما تذكري النقاب اصلا اوعى تقولى له أنت بتمنعنى عن حاجه تقربنى من ربنا لا قولي له الحمد لله أن ربنا رزقني بأب زيك أحسن تربيتى وخلانى أخاف من ربنا مش بالعند لان العند مش هيجيب نتيجة
عائشة:حاضر
صبا بمرح:ويختى ان شاء الله اما تتجوزي يبقى المحروس يلبسه ليكى
ابتسمت عائشة بخجل قائله:افرضى مرضاش هو كمان
صبا بابتسامه:لأ ان شاء الله هيرضى لو بيحبك هيرضى اللى بيحب بجد بيعرف قيمة النقاب
عائشة بخجل:إن شاء الله
بعد خمسة دقائق أردف إياس قائلا:يا أمى هتقعدي فى المكتب بتاعى لحد ما أخلص
صبا:لا أنا هحضر مع عائشة
إياس:هتزهقى
صبا:لأ متخافش معايا الموبايل لو زهقت هلعب بيه
إياس:ماشى
ثم نزل من السيارة وسار أمامهم متوجها إلى مكتبة فمازال متبقيا عشر دقائق على بدأ المحاضرة فتوجهت عائشة وصبا الى قاعة المحاضرات
كانت أريج تجلس بجوارها حور وفتاة أخري تدعى حبيبة صديقة أريج وعائشة
أريج بصدمة: صبا
ابتسمت لها صبا بهدوء فقالت:ايه رأيك فى المفاجأة دي
أريج:انتى جيتى ازاى هنا وعائشة انتى مش قلتى مش هاجى
حور:ايه المفاجأة الحلوه دي هقول لماما
صبا:بلاااش اصل تقتلنى😂
حبيبه:مين القمر دي منتقبة بس مزه
ابتسمت صبا وضحكت عائشة وأريج
أريج :اقعدوا الاول بس
جلست عائشة وبجوارها صبا فقالت أريج:فهمونى بقا جيتوا ازاى
صبا:عائشة جت عشان إياس قال إن الامتحان علية درجات وانا جيت معاهم فى العربيه
حبيبة:انتى مين بقا
أريج:تخيلى كدا
حبيبة:مش عارفاها الصراحة أكيد صاحبتكوا
اريج:دي حماتشى ههههه
حبيبه بصدمة:حماة مين يا حاجه هى مش دي أدنا
اريج:والله دي أم أوس
حبيبة بصدمة:يعنى انتى ام دكتور إياس
اومأت لها صبا بابتسامه فقالت حبيبه:يا نهار أبيض اللى يشوفك يقول فى سننا عشان جسمك صغير وعينك مش باين عليكى خالص سبحان الله بس لون عيونك شبة عائشة بالضبط
أريج:وكمان فيها شبه منها لو شوفتى وشها مش هتصدقى انها أكبر مننا اصلا
حبيبة:الله انا عايزه اشوف وشك
صبا:مش هينفع عشان فى شباب هنا انتى مشوفتنيش فى خطوبة أريج
حبيبة:لأ أنا اصلا كان عندي ظروف مش بخرج الا على الامتحانات بس لسه نازله الجامعه من يومين
صبا:أيوه
ثم وجدت الهدوء الكامل فى المدرج فنظرت أمامها وجدت إياس دلف إلى القاعه فقالت بمرح:لأ ابنى مسيطر
ابتسمت الفتيات الاربع على جملتها فنظر إليها إياس وابتسم لها فسمعت صبا فتاة من الخلف تقول بهمس:يخربيت حلاوة أمك يا شيخ
نظرت صبا إلى الخلف بصدمة فقالت:عيب كدا
الفتاه بوقاحه:وانتى مالك انتى مين انتى
صبا :أنا أمه
نظرت إليها الفتاه باستحقار فهى اعتقدت انها تمزح معها
بدأ إياس فى إلقاء الاسئلة وفرق التلاميذ عن بعضهم واستدعى معيد ومعيدة لكى يساعدوه فى مراقبة الطلاب
كانت المعيدة تنظر إلى إياس بهيام حتى أن بعض الطالبات بجوارها كن تتحدثن ولم تستطيع منعهما وكانت عائشة تنظر إليها بغيظ شديد فنظرت إليها صبا وابتسمت
فقالت عائشة:انتى بتضحكى
صبا:هههه جرب نار الغيرة
عائشة:ماشى يا صبا ماشى
إياس لعائشة:انتى يا انسه ممنوع الكلام هسحب منك الورقة
عائشة :آسفة يا دكتور
ثم نظرت إلى صبا بغيظ واكملت حل الامتحان
بعد مدة انتهت عائشة وذهبت إلى إياس لكى تسلمة الورقه
اياس:خلصتى
عائشة:أيوة
اياس:راجعى لسة عشر دقائق
عائشة:راجعت
إياس:ماشى انتى حرة
بعد عشر دقائق جمع الورق من الطلاب ثم شرح بعض الأشياء فى الوقت المتبقى
بعد الانتهاء من المحاضرة خرج إياس وتوجه الى مكتبة فقالت عائشة لصبا:تعالى نروح الكافتيريا نفطر
صبا:لا مش عايزه انا فطرت مع عمك الصبح
عائشة:طيب كلى اى حاجه انتى فطرتى من بدري
صبا:لا هتغدي معاه مش هاكل من غيرة
نظرت إليها عائشة بهيام قائلة:يختى على السهوكه
صبا:يا بنتى انا زوجة عمك احترمينى
حبيبة:هما ليه بينادوكى بإسمك
اريج:مش عايزه حد يكبرها
حبيبة :ليكى حق الصراحه
عائشة:روحوا هاتوا سندوتشات وانا هقعد انا وصبا
حبيبه:لأ ما انتى عارفة
عائشة :أيوة خلاص روحى يا أريج انتى وحور
صبا لحبيبه:لية مش بتروحى
عائشة:جوزها يختى بيغير عليها ايه دا مسهوكه زيك كدا
صبا:ايه دا انتى متجوزه
حبيبة:ومخلفه كمان
صبا:بجد مش باين عليكى
حبيبة:اومال انتى ايه اللى يشوفك يقول أصغر منى اصلا هههه
صبا:هههه طيب ايه علاقة الغيرة بإنك متشتريش ساندوتشات
حبيبة:عشان اللى بيبيع بيفضل يهزر مع البنات وكدا صبا:هو عارف منين
حبيبة:هو كان فى صيدله هنا من أربع سنين واما جه يوصلنى شافه عرف انه متغيرش مش بيطيقه بقا
صبا:اممم
حبيبه:بس هو اصلا زوجى غيور جدا مكانش راضى يخلينى اصاحب بنات حتى دا عائشة وأريج وحور عشان عارف أنهم قرايب دكتور إياس وهو كان صاحبة من المسجد اصلا وقابله هنا فى المسجد بردوا
صبا:زوجك اسمه ايه
حبيبة:عبدالرحمن
صبا:أيوه دا صاحب إياس وأوس كمان جه قبل كدا عندنا شوفته
حبيبة:أيوه هو
صبا:ربنا يبارك لك فيه هو بيحفظ قرآن للصغار مع أوس وإياس صح
حبيبة:أيوه هو
صبا:ربنا يحفظه ليكى انتى متجوزه بقالك كام سنه
حبيبه:دي تالت سنه اول ما خلصت ثالثه ثانوي اتجوزنا كنا مخطوبين بقالنا سنه
صبا:ياااه من تانيه ثانوي بدري كدا
حبيبة: هو كان باباه صاحب بابا اوي وحبوا يزوجوا ولادهم عشان الصداقه وكدا واتدبسنا احنا
عائشة:اتدبسنا اه كل شويه تقول عبدالرحمن عبدالرحمن ايه يختى
حبيبه:ايه مش جوزي بحبه
عائشة:حبى يختى يتنا نيله فى حظنا
صبا:ههههه شوفتوا المعيده كانت بتبص لإياس ازاى
عائشة:اه يختى على البجاحه
صبا:ربنا يهديها
عائشة:أيوه وتتجوز وتتلم كدا بدل ما هى بتعاكس خلق الله كدا
انفجرت صبا وحبيبة بالضحك عليها
كان إياس فى مكتبه فطرق الباب عليه فأذن للطارق بالدخول
الطارق :ممكن أدخل
اياس:انت
بعد عدة ساعات عاد أوس فنظرت إلية حفصة بلهفة فنظر إليها بأسف شديد فابتسمت إليه بحزن وصعدت إلى حجرتها كانت متأكده انه لن يعود فهى تعرفه حق المعرفه ولكن كانت تأمل أن يعود تعلق نفسها بأمل حتى لو كان مستحيل فهى من جرحته وأرادت البعد فلتتحمل ما تسببت به
أما هو فكان يؤلمه قلبه بشدة فهو توقع ان أوس من المحتمل أن يكون أخبرها انه لم يأت معه يعلم أنه خيب أملها فأمسك هاتفه وبحث عن رقمها ودق عليها متلهفا لسماع صوتها هذا كل ما يريده الآن يعلم أن ما يفعله خطأ وبهذا سيضيع كل ما يفعله ولكن لن يستطيع أن يتحمل أكثر من ذلك
كانت جالسة تبكى بصمت فدق هاتفها فأمسكته فوجدت رقم غير مسجلا لديها يبدو انه لبلد غير مصر ففتحت الهاتف فظنت انها صديقتها الأمريكيه
حفصة بصوت مبحوح من البكاء:ألو
صمت بمجرد سماعه لصوتها علم من نبرته انها كانت تبكى وكيف لا يعرف وهى عشق طفولته من تربت على يديه عاش معها فى كل ما مر بحياتها
حفصة:الووو
لم تستمع إلى كلمه واحده سوي صوت أنفاسه دق قلبها بشده حينها تعرفت على صاحبها فقالت بلهفه وهى تمسح دموعها:عمار انت عمار صح؟
كان الجميع يستفسر من أوس عن عدم مجيئ عمار معه فأخبرهم بما حدث وأن عمار وعده انه سوف يأتى ولكن سيرتاح قليلا فتفهم الجميع قوله وتنهدوا
براحه اذا هو لم يبعد للأبد ولكن فتره قليله فقط
اياس:طيب الحمد لله بس حفصه طمنها أكيد هى متضايقه دلوقتى
أوس متغهما:حاضر هكلمها
إياس:اطلع لها دلوقتى
أوس:حاضر
بعد فترة أردف إياس لأحمد قائلا:عمى عايز اكلمك فى موضوع
احمد:خير
اياس:فى واحد جالى النهارده يتقدم لعائشه!!
انتهى البارت.
"اشتركوا على قناتنا على تليجرام أو قناة واتساب ليصلكم أحدث الفصول والتنبيهات فور نشرها"
"اشتركوا على قناتنا على تليجرام أو قناة واتساب ليصلكم أحدث الفصول والتنبيهات فور نشرها"
