رواية جنة وهدان الحلقة الثالثة والعشرون 23 - روايات أم فاطمة ( شيماء سعيد )

   نقدم اليوم احداث رواية جنة وهدان الحلقة 23 من روايات أم فاطمة . والتى تندرج تحت تصنيف روايات رومانسية ، تعد الرواية  واحدة من اجمل الروايات رومانسية  والتى نالت اعجاب القراء على الموقع ، لـ قراءة احداث رواية جنة وهدان كاملة بقلم ام فاطمة من خلال اللينك السابق ، أو تنزيل رواية اصبحت اسيرته pdf كاملة  من خلال موقعنا .


رواية جنة وهدان الحلقة 23 - روايات أم فاطمة ( شيماء سعيد )




جنة وهدان الفصل الثالث والعشرون


الحلقة الثالثة والعشرون

.............

🌹 بسم الله والصلاة والسلام على رسول الله 🌹

قال رسول الله -صلى الله عليه وسلم-: (مَن نَفَّسَ عن مُؤْمِنٍ كُرْبَةً مِن كُرَبِ الدُّنْيَا، نَفَّسَ اللَّهُ عنْه كُرْبَةً مِن كُرَبِ يَومِ القِيَامَةِ، وَمَن يَسَّرَ علَى مُعْسِرٍ، يَسَّرَ اللَّهُ عليه في الدُّنْيَا وَالآخِرَةِ، وَمَن سَتَرَ مُسْلِمًا، سَتَرَهُ اللَّهُ في الدُّنْيَا وَالآخِرَةِ، وَاللَّهُ في عَوْنِ العَبْدِ ما كانَ العَبْدُ في عَوْنِ أَخِيهِ)

ولجت تالين مع زين إلى غرفتهما بعد انقضاء ليلة عقد قران مصطفى وعائشة.
جلست تالين على طرف الفراش ورسمت على وجهها إبتسامة حنونة تشع بالحب .

لاحظ زين ذلك فاقترب منها وابتسم قائلا...إيه الچميل شكله رايق يعني، وإكده الليلة هتكون فل الفل .

حمحمت تالين بحرج ثم باغتته بحديث آخر حتى تلهيه عما يرمي إليه بقولها ..بس اتصور يا زينو أن عايشه ومصطفى لايقين على بعض أوي، صراحة كنت مبسوطة أوي وأنا شايفة الفرحة في عينيهم ، ربنا يسعدهم ويكملهم على خير .

زين ...يارب ، هي عايشة طيبة وتستاهل كل خير .

تالين ...أنت عارف يا زين أن ربنا سبحانه وتعالى مش بيستجيب للعبد لما يدعي وتكون فلوسه حرام .

قطب زين جبينه ثم أردف ...كيف ده ؟

تالين ...هقولك حديث عن الرسول صلى الله عليه وسلم عشان يفهمك .
بس صلي عليه الأول .

فردد زين ...صلى الله عليه وسلم .

تالين ...قال رسول الله «يا أيها الناس إن الله طيب لا يقبل إلا طيبا، وإن الله أمر المؤمنين بما أمر به
المرسلين، فقال:{يَٰٓأَيُّهَا ٱلرُّسُلُ كُلُواْ مِنَ ٱلطَّيِّبَٰتِ وَٱعْمَلُواْ صَٰلِحًا ۖ إِنِّى بِمَا تَعْمَلُونَ عَلِيمٌ}، ثم ذكر الرجل يطيل السفر أشعث أغبر يمد يديه إلى السماء، ويقول: يا رب يارب، ومطعمه حرام ومشربه حرام وملبسه حرام وغذي بالحرام فأنى يستجاب لذلك»، والله تعالى يعاقبهم على هذا المال.

فنكس زين رأسه بخزي وذل ولمعت الدموع في عينيه .
شعرت تالين أن الحديث لمس قلبه فأرادت ألا تقنطه من رحمة الله فأتبعت حديثها عن التوبة .

تالين ...بس اتصور رغم كده ربنا سبحانه وتعالى حنين أوي وبينتظر ديما من أن عبده العاصي اللي بياكل حرام وبيعمل حرام ده أنه يتوب ويرجع ليه، فيغفرله كل اللي فات مش بس كده، ده من كرم ربنا سبحانه وتعالى كمان ، أنه هيقلب كل الذنوب دي حسنات كمان .

يعنى هيكون ملياردير على كده .

فصراحة يبختهم الناس دي اللي تابت بعد الحرام .

فأجهش زين بالبكاء ، فلمعت عيناها بالدموع وأشفقت عليه وحاوطت ظهره بذراعيها قائلة ...أنت قلبك طيب أوي
يا زين ، اتأثرت أوي كده بالكلمتين دول .

أمال كمان لو وقفت قدام ربنا وجربت تصلي يااااه هتحس أنك طاير ولا السجود وأنك تحس أن ربنا سمعك وأنت بتشتكيله همك دي إحساس تاني خالص والله .

زين ...ياااه نفسي أچربه ، بس أنا صراحة معرفش إزاي
حتى أتوضا ولا أصلي ،محدش علمني للأسف .

أنا اتربيت غير الناس كلاها يا تولا أنا اتربيت في ...ثم أجهش بالبكاء .

فقامت تالين وجلست على ركبتيها على الأرض وتعانقه بحنو مردفة...قول يا حبيبي وأنا سمعاك واعتبر كأنك بتكلم نفسك بالضبط ، يعني مهما تقول أنا لا يمكن أعاتبك طول ما أنت رجعت لربنا وتوبت ولا يمكن كمان أقول أي كلمة من اللي هتقولهالى لحد .

زين بإنكسار ..أنا واثق من كده بس أنا خايف من حاجة واحدة بس مش من أي حاجة .

تالين ... إيه هي ؟

زين ...خايف أنك تسبيني لما تعرفي حچيچتي .

وأنا ممكن أموت لو سبتيني يا تالين ، أنتِ أصلا نسمة الهوا اللي بتنفسها عشان أعيش .

فابتسمت تالين ابتسامة ممزوجة بدموع حارقة وشددت على يده قائلة ...أنا سبت الدنيا كلها وجيت معاك هنا عشان أكون ليك لوحدك وده عشان بحبك أكتر من نفسي، تفتكر بعد كده أني هسيبك لمجرد نشأة مكنش ليك ذنب فيها .

فابتسم زين قائلا بمداعبة ...طيب بوسيني كده عشان أتأكد وبعد كده أحكيلك .

فنكزته تالين...لا إحكى الأول يا خفيف .

فبدأ زين في سرد قصة حياته ومن هما والداه ( منصور) ووالدته ( ياسمين ) وكيف نشأ في الجبل مع وهدان وقمر ويونس وكيف كانت طبيعة تلك الحياة من سرقة ونهب وتجارة المخدرات والآثار وفعل كل ما نهى الله عنه .
ثم ما حدث بعد ذلك من الإنتقال إلى القاهرة بعد أن غارت الشرطة على الجبل وبدأ حياة جديدة بها ولكن تحت ستار نفس الأشياء المحرمة ، وما حدث بعد ذلك حتى يومهم هذا ، ثم حدثها بحرج عن محاولة اغتياله عن طريق .....؟

ولكنه لم يستطع أن يستكمل حتى لا تشعر بالحرج أن والدها وإخواتها هم السبب وأنهم يعملون في نفس تلك الأشياء المحرمة .

فبكت تالين وقالت بنحيب ...كمل يا زين ، أنا عارفة أنّ شاكر أخويا هو السبب .

فنظر لها زين بإندهاش قائلا ...إيه ده أنتِ بچد عارفة ؟
بس إمتى وإزاي ؟

تالين بعد أن سقطت دموعها على وجنتيها ...سمعت شاكر وبابا وهما بيكلموا قبل مانتقابل عشان نحدد معاد الجواز .

زين بصدمة..يعني عرفتي حچيچتي ومع ذلك رضيتي تتچوزيني!

تالين ...أيوه عشان بحبك ومتصورتش حياتي من غيرك ، بس أنا مش عادتي أكون سلبية ، وعشان كده قررت أني لازم أقف جمبك لغاية متوصل لبر الأمان وده مش هيتحقق غير بالتوبة والندم الأول وبعدين تصفي أي مشروع أو صفقة فيها غضب ربنا ومفيش تجارة إلا في الحلال بعد كده ، عشان أنا نفسي ولادي يطلعوا أسوياء مش زعلان شاكر ورؤوف .

زين بحزن ... أو زي أبوهم مش أكده .

تالين بثقة ...أبوهم سيد الناس ، عشان هيكون عنده إرادة قوية بأنه يغير من نفسه ويكون إنسان تاني خالص وينسى أنه ابن الجبل .

فأمسك زين يدها وقبلها بحنو قائلا ...انام مش عارف فعلا من غيرك كنت عملت إيه ؟

أنا كنت ضايع وربنا وچعك في طريچي عشان تاخدي بيدي .

تالين ... ربنا بيسبب الأسباب ، ويلا مع أول درس من دروس تالين ، فوقفت وأشارات له بيديها أن يتبعها إلى المرحاض لتعلمه الوضوء ثم الصلاة .

ولكنه استوقفها بقوله ...يا ميس يا ميس .

فضحكت تالين قائلة ...نعم يا زينو يا شطور .

زين غامزا لها...طيب ممكن بعد أول حصة دي ، نطلع فسحة ، نسافر فيها أنا وأنتِ لعالم تاني، عالم يخصنا إحنا بس ، فيه الكلمة الأولى لسلطان الحب .

فاحمرت وجنتي تتاليت خجلا ولم تنبس بكلمة واحدة واكتفت بإيماءة رأسها .

فضحك زين قائلا ...يارتني كنت توبت من زمااااااان .

...........

اتصل حسام بقمر فابتسمت عندما رأت اسمه يتلألأ على شاشة هاتفها .

قمر ...ألووو

حسام ...القمر بتاعي عامل إيه النهاردة ؟

قمر ...الحمد لله أحسن كتير چوي .

حسام ...طيب تسمحي ليا بزيارة أنا وأمي لأن أمي عايزة تتعرف عليكِ.

قمر بحرج ...بس يعني كيف أمك تيچىدي وتشوف اللي عيحبها ابنها بطنها قصادها شبرين ؟؟

حسام...إيه المشكلة ، أنا قولت لماما كل حاجة وهي فاهمة ومقدرة ده ،يمكن بابا بس اللي عامل مشكلة ،بس أنا متاكد بإذن الله مع الوقت هيتقبل الموضوع .

ابتسمت قمر قائلة ...بدال إكده ماشي ،تشرفوا وتنوروا .

أما عزام فكان يقبع وحيدا في منزله المتسع ينظر حوله
في الأركان ، فكل ركن يحمل ذكرى سعيدة مرت عليه مرور الكرام ، لم يعشها بكل جوارحه ، فكان ينظر دوما إلى الجزء المفقود في حياته وهو حب لفتاة لم يقدر الله له الزواج منها وهذا ما جعله لا يستشعر بمن بين يديه من نعم من زوجة صالحة حاولت بأقصى جهدها أن تسعده وتربي ولدها على الأخلاق والدين .

فشعر عزام بالوحشة بمفرده واشتاق لزوجته رقية .

عزام ...مش عارف ليه بفكر فيها كده وحاسس أنها وحشتني ، معقول بعد السنين دي كلها أكون كنت بحبها ومش واخد بالي عشان مركز في الماضى وبس .

ياااااه ده أنا كنت مغفل بصحيح ، هي عمرها مقصرت
في حقي وكانت بتستحمل غضبي وكانت ست بيت بصحيح .
ثم تذكر طفولة حسام وتشجيعه له منذ الصغر حتى أصبح طبيبا ماهرا .

عزام ..وأنت كمان يا ابني وحشتني، أنا مش عارف ليه عملت كده وخدتك بذنب مش ذنبك .

ده نصيب وقدر ، لاااا أنا فعلا مش هقدر أعيش من غيركم، طيب بس وموضوع قمر ؟

أمري لله هوافق يمكن فعلا دي اللي تسعده مهو مش بالشهادات ومش ذنبها أنها متوفقتش فى جوازة
قبل كده ،هي في الآخر إنسانة برده .

فخليه يجرب وهو هيتحمل نتيجة اختياره، أنا لازم أتصل بيه حالا ، بس أتصل برقية الأول .
لمعت عيني رقية بالحب عندما رأت اسم عزام شريك العمر ، فمهما قسى عليها إلا أنها تحبه .

رقية....السلام عليكم.

عزام ...وعليكم السلام.
وحشتيني يا رقية بجد وصراحة مش عارف عملت كده إزاي ؟ بس كل اللي أعرفه دلوقتي أني بحبك وعايزك ترجعي البيت أنا مقدرش أستغنى عنك وأنا رديتك لعصمتي .

فبكت رقية من الفرحة ولكنها قالت ...أخيرا يا عزام حسيت أنك بتحبني بعد العمر ده كله .
كنت فين من زمان ؟؟

عزام ...كنت مغيب وأناني وجشع ومعرفتش قيمتك غير لما سبتيني .

رقية ...هقول إيه ؟
بس وحسام ،أنا مش هرجع من غير ابني .

عزام ...طبعا وحسام أنا هتصل بيه وأقوله أني موافق
على جوازته من قمر .

تهلل وجه رقية ...حسام معايا وسمعك ومن كتر الفرحة بيبكي .

عزام ...سامحوني وارجعولي ،أنا محتاجكم أوي .

رقية...مسافة السكة هنكون عندك .

...........

مرت عدة أسابيع ذبل به وجه وردة من الحزن ، بينما زاد وجه جميلة إشراقا وإزادا حب وهدان لها بعد أن قامت بزيارة ربيع مرة أخرى وأعطاها عملا آخر يشربه يجعله مفتون بها أكثر وأكثر وقدمت له الأموال التي أخذتها من وهدان الذي أصبح لا يرفض لها أي طلب .

جميلة ...أنت متأكد يا سيدنا أن العمل ده هيخليه زي العچينة في إيدي ، وأقوله يمين يمين شمال شمال .

ربيع ...أنا چولتلك چبل سابج حاچة وطلعت غلط؟ .

جميلة ....لا صراحة أنت هتعمل عظمة والعمل بتاعك ميخرش المية .

ربيع ...يلا كله لله ، عشان نسعد الناس ، المهم چبتي
اللي چولتلك عليه .

چميلة ...أيوه ، اتفضل الفين چنيه .
تستاهل يا وش السعد أنت .

ربيع ...خدي أهو ومتنسيش تحطيله نچطة وحدة في الشاي ساعة العصرية إكده .

هيشربه من إهنه وهتلاچيه بچا زي الإنسان الآلي تحركيه زي ما أنتِ عايزة .

جميلة بضحك ...بركاتك يا سيدنا، تمام .

طيب أچعد بالعافية عشان متأخرش على الدوار أكتر من إكده .
ربيع ...مع السلامة .

خرجت جميلة من عند ربيع ، متلفتة حولها حتى تتأكد أن لا أحد يراها .
ولكن لمحتها بهية بالصدفة من بعيد .

فصاحت ...أيوه إكده فهمت ، يا بت الچنية .
أنا بردك چولت إكده ، أكيد عملاله عمل ،عملك أسود
يا بعيده .

وخسارة فيكِ صراحة هو وأنا كنت نصحتك بالعقل تميليه ليكِ إزاي ؟

مش تعملي عمل تخليه ميشوفش ستك وتاچ راسك وردة، منك لله يا شيخة .

ويا عيني عليكِ يا ست وردة ،أنتِ متستهليش والله إكده .

وشوف هي عملت معاكِ إيه وأنتِ عملتي إيه!؟ .
فعلا محدش بيطمر فيه حاچة واصل .

بس أنا مش هسكت هروح أبلغ الست بدور تصرف وتچبله شيخ يبطل العمل عشان يرچع كيف الأول يحب الست وردة .

وصلت جميلة قبلها إلى البيت وتعطرت وتزينت استعدادا لقدوم وهدان إليها .

وأثناء وقوفها أمام المرآة تمشط شعرها ، شعرت ببعض الدوار فأمسكت برأسها قائلة ...إيه الدوخة دي ؟
أكيد وردة حسداني على حب وهدان ليه ،منا عرفاها عينيها كيف الحچر .

ثم تساءلت ... إيه ريحة البطيخ دي اللي هتهفف عليه .
لما أنادي على البت بهية تچبلي شقين كده .

ثم فجأة ابتسمت مردفة بصوت عالي ...يوه معچول يكون اللي في بالي.
ثم...مش معچول ليه ؟ ده معجدول ومعچول .

ويارب يكون ولد عشان يچش كل العز ده وأكون أنا أم العمدة بعد إكده .

والله هنيالك يا جميلة من بعد عيشة الديابة لبيت العمدة .

والله لأچوم أبخر نفسي عشان الحسد وفرصة أدلع أكتر
على حبيب چلبي وهدان وأغيظ وردة .

وقامت بالفعل بإشعال البخور في الغرفة مردفة وهي تدور به فوق رأسها ...رچيتك واسترچيتك من كل عين شفتك ومصلتش على النبي.

ثم وضعت البخور على المنضدة قائلة ...يلا وآدي جومة ، لما أروح أدلع چصادها هي وأمه اللي مهعتبرنيش وتسأل على وردة بس ولا تسأل فيا .

فخرجت من غرفتها واتجهت لغرفة وردة التي كانت تجالسها بدور لتخفف عنها وطأة بعد وهدان عنها فطرقت الباب واصطنعت التعب .

فتحت لها بدور فامتعضت ولكنها رحبت بها على مضض ...أهلا يا بتي كيفك ؟

جميلة بتصنع...والله يمه تعبانة شوي وچتلك يمكن تعرفي
أنا فيا إيه ؟

ثم نظرت الى وردة قائلة ...إيه مش عتچوليلي اتفضلي ولا مش عايزاني أدخل حداكِ.

تنهدت وردة بغصة مريرة وحاولت امتلاك غيظها فرددت ...لا طبعا اتفضلي يا جميلة .

فولجت جميلة وجلست على طرف الفراش قائلة ...والله مش عارفة نفسي غمة عليه ودوخة إكده ونفسي هفاني
على بطيخ .

وشكلي إكده والله أعلم حاااااامل .

اتسعت عيني وردة ورددت بصدمة ...حاااااامل .

أما بدور فرددت ...ألف بركة يا بتي مبروك ،ربنا يتممه
على خير .

ثم نظرت لوردة بشفقة قائلة ...عچبالك يا ست الستات .
فلمعت عيني وردة بالدموع قائلة ...كله بأمر الله .

ثم وجهت حديثها إلى جميلة ...مبروك يا جميلة .

جميلة ...الله يبارك فيكِ ، ثم قامت بتثاقل ووضعت يدها خلف ظهرها كهيئة سير الحوامل قائلة ... طيب فوتكم بالعافية لما أروح عشان أفرح چوزي حبيبي وهدان، وأچوله خلاص هيچيلك الولد من مرتك حبيبتك چميلة مش من حد تاني .

ثم خرجت الحية بعد أن نفثت سمومها .

وما أن خرجت حتى أچهشت وردة بالبكاء قائلة بنحيب ...اللهم لا إعتراض على حكمك ولكن الصبر
من عندك .

ثم تابعت أنا كده خلاص انتهيت لـ وهدان ، ومعدش ليا مكان إهنه ولازمن أمشي لحالي چبل ما يمشيني هو .

بدور بعتاب ....إيه اللي عتچوليه ده يا بتي ، يستحيل طبعا تمشي ،ده بيتك چبل ما يكون بيتها .
ووهدان عيحبك .

وردة بسخرية ...عيحبني ده كان زمان ،دلوك جميلة هي اللي في چلبه وبكرة هتكون أم ولده .

وأنا مليش عازة خلاص ، يبچا أمشي بكرامتي أحسن .

بدور ...يا بتي مش إكده وإن كان على الخلفة دي حاچة بتاعة ربنا وعليكِ بالصبر والدعاء .

وديما چولي ...اللهم لا تذرني فردا وأنت خير الوارثين .

رفعت وردة بصرها للسماء مرددة ...يااارب .
ثم طرقت الباب بهية فأذنت لها وردة .

بهية ...العوافي عليكم .

بدور ...الله يعافيكي ، خير يا بهية .

بهية ...مش خير واصل يا ست بدور .

وردة ....ليه حوصل إيه بس تاني؟

بهية وقد حركت شفتيها يمينا ويسارا ...جميلة يا ست وردة .

وردة ...ملها ،مكانت إهنه لسه عاد ، الله يسهلها .

بهية ...والله أنتِ طيبة چوي يا ست وردة وليه حق وهدان بيه يحبك چوي .

وردة ...يحبني ،ما خلاص عاد .

بهية ....لا مخلصش ، هو عيحبك بس هيعمل إكده غصب عنه .

وردة بإندهاش ...كيف غصبا عنه ؟؟

بدور...والله أنا چلبي كان حاسس إن فيه حاچة ،حتى لما كلمته عشانك ،كان سرحان إكده وكأنه مسحور ومدنيش عچاد نافع وچعد يچول زي العيال ، أنا بحب چميلة ، بحب جميلة ويكررها إكده وده مش كلام واحد عاچل أبداً .

بهية ...فعلا يا ست بدور ...مسحور وجميلة السبب ، أنا شفتها طلعة بعينيا التنين دول من عند ربيع الدچال ، ربنا ياخده مفرچ الچماعات ده ،،منه لله .

وردة ...لا حول ولا قوة إلا بالله ، ليه تعمل أكده ؟.
ده يبچا چزاتي في اللي عملته وياها ،تضرني !!

وعايزة تاخده ليها وحدها وأنا اللي كنت عتحايل عليه يطل بس فى وشها .

أستغفر الله العظيم وأتوب إليه
ليه بس الأذى ليه ؟

بدور ...نفسها خسيسة متعرفش ربنا يا بتي، وأنتِ غلطانة
من الأساس أنك چوزتيه وحدة متعرفش ربنا .

وردة ...كانت صعبانة عليا چوي عشان عشچته ومطيلهوش .

بدور ...وأديكِ شوفتي آخرة الطيبة .

چولتلك محدش زيي أنا وست سامية الله يرحمها .
چليل يا بتي الست اللي تستحمل راچلها يكون مع وحدة غيرها .

وردة ...والعمل دلوك

كيف يرچع لطبيعته ؟؟

بدور ...نچيب الشيخ صلاح يا بتي، يقرء عليه الرقية الشرعية والشفا بإذن الله .

وردة ...خايفة والله عليه ،ألا يضره العمل ده في چسمه كمان .

بدور ...الله الحافظ ونستعين بالله .

ثم أشارت إلى بهية ..معلش يا بهية شيعي حد يچيب الشيخ صلاح وخليه يچعد تحت في المندرة وتحكيله اللي شوفتيه عشان يتصرف ، وأول متلمحي وهدان چي ، چوليله
في ضيف عايزك ضروري چوه ، ولازمن يدخل عليه ،وميطلعش حدا چميلة الأول .

بهية ...حاضر يا ست بدور .

هشيع من عينيه التنين وربنا يسترها .

وكانت جميلة في غرفتها تنتظر وهدان بفارغ الصبر لتبشره بالحمل وتسقيه العمل مرة أخرى .

وكانت تدندن بفرحة وهي تمسح على بطنها برفق

سيد الحبايب يا ضنايا أنت
وكل أملي ومنايا أنت
يا أحلى غنوة في دنيا حلوة
غنت وقالت معايا أنت
سيد الحبايب يا ضناي أنت

......

وبالفعل حضر الشيخ صلاح وقصت عليه بهية ما حدث.

صلاح ...لا حول ولا قوة إلا بالله .

الله المستعان ويارب الرقية الشرعية تچيب نتيچة وهتيلي كوباية مية يا بتي اقرء عليها القرآن عشان يشربه عشان لو العمل في بطنه يكون أكده تمام والمية دي هتغسله ولا مؤخذة هينزل معاه في الحمام .

بهية ..ياريت يا سيدنا الشيخ ده مرته وردة غلبانة چوي ومتستهلش إكده واصل .

الشيخ ...كله بأمر الله يا بتي بس أنتِ چولي يارب .

بهية ...يارب .

ثم جاء وهدان بعد فترة زمنية قصيرة وكان مسرعا للّحاق بجميلة على السلم ولكن استوقفته بهية بقولها... يا وهدان بيه .

وهدان بنفور ...نعمين ، عايزة إيه دلوك مش فضيلك ؟.

بهية محدثة نفسها ...خابرة عايز اللي تشك في معاميعها بس الصبر .

بهية...الشيخ صلاح في المندرة عايزك ضروري .

وهدان بنزق...وده عايز إيه دلوك ، هو ده وچته؟ .

ثم تطلع بنظره للأعلى قائلا ...معلش يا چميل ، ثواني وچيلك ، وهصبر الثواني دي على نار .
ثم اتجه إلى الشيخ صلاح وعندما ولج إليه ابتسم الشيخ صلاح في وجهه ليرغبه فينا سيحدث .

وهدان ...مرحبا بيك يا شيخ .
أؤمرني أي خدمة أچدر أچوم بيها ؟

الشيخ صلاح ...الأمر لله يا ابني .
أچعد بس وشكلك لسه چي من بره ، اشرب وبل ريچك عشان نعرف نتحدت .

وهدان...آه والله ريچي ناشف ، ثم مد يده وتناول كوب الماء الذي قرأ عليه الشيخ الفاتحة وبعض سور الرقية الشرعية.

شربه وهدان عن أكمله .

فابتسم الشيخ قائلا ...هنيئا مريئا ، بالشفا .

ابتسم وهدان قائلا ...الحمد لله .

كنت عايزني في إيه يا شيخ ؟

الشيخ صلاح...مش خابر بس چالي هاجس كده من عند ربنا فحسيت أنك تعبان شوية فچيت اقرء عليك كتاب الله عشان ربنا يعافيك .

وهدان ...أيون والله ، بحس ساعات بمغص إكده من وچت للتاني.

الشيخ صلاح ...تمام ، أچعد يا ابني اقرء عليك .

فاستسلم وهدان له واستمع لقراءته واغرورقت عيناه بالدموع وأحس براحة كبيرة في الإستماع لآيات الذكر الحكيم وكان منها الفاتحة وآيات متفرقة من بعض السور
{وَنُنَزِّلُ مِنَ الْقُرْآنِ مَا هُوَ شِفَاءٌ وَرَحْمَةٌ لِلْمُؤْمِنِينَ ۙ وَلَا يَزِيدُ الظَّالِمِينَ إِلَّا خَسَارًا} الإسراء: 82

وما أن انتهى الشيخ حتى بكى وهدان وقال بنحيب...چميل كتاب الله ،أنت عامل كيف وردة مرتي لما بتقرء أنا أحب أسمع صوتها چوي .

ادعيلي أچرب من ربنا كيفكم إكده .

الشيخ صلاح ...ربنا يلهمك الصواب يا ابني .

ثم أراد أن يختبره ...أنت عتحب مرتك أنهو فيهم وردة ولا جميلة أكتر .

ولكن وهدان أمسك ببطنه قائلا ...معلش يا شيخ أعذرني، هقضى حاچتي وأچيلك تاني، ما تمشيش يا بركة .

ابتسم الشيخ صلاح قائلا ...مستنيك يا ابني.

ولما رجع ....؟
برأيك هل أبطل السحر أم سيكون مثل ما كان ؟؟؟
هل سينقلب السحر على الساحر أو أن الساحر مازال فائزا؟
رأيكم في زين هل سيكمل طريقه الجديد فعلا أو سيرتد عنه؟
رأيكم بعزام وما فعله بابنه وزوجته وهل بهذه البساطة سيعود لحياتهما أو ستكون للقدر كلمة أخرى؟
كل هذا وأكثر ستعرفونه في حلقاتنا النارية بانتظار آرائكم وأترككم مع هذا الدعاء
"اللهم يا من سمحت لبعض عبادك على ممارسة السحر ولكنهم عاثوا شرًا وضروا العباد، وأنت قد احتفظت لنفسك بالإذن بالضر أعوذ بك من شر كل ذي شر ومن شر كل دابة أنت آخذ بناصيتها يا كريم، وأعوذ بك مما احتفظت به لنفسك، الله احفظنا بحفظك يا الله."



موعد البارت الجديد الساعة ( 4 م ) يوميا ان شاء الله 

هنا تنتهى احداث رواية جنة وهدان الحلقة 23 ، يمكنكم اكمال باقى احداث رواية جنة وهدان الحلقة 24  أوقراءة المزيد من الروايات المكتملة فى قسم روايات كاملة .

نأمل أن تكونوا قد استمتعتم بـ روايه نار وهدان ، والى اللقاء فى حلقة قادمة بإذن الله ، لمزيد من الروايات يمكنكم متابعتنا على الموقع أو فيس بوك ، كما يمكنكم طلب رواياتكم المفضلة وسنقوم بوضعها كاملة على الموقع .
تعليقات



حجم الخط
+
16
-
تباعد السطور
+
2
-