الفصل العاشر من رواية "وبالحب اهتديت" بقلم سلمى خالد.
وبالحب اهتديت الحلقة الاولى
وبالحُبِ اهتديت
«هُدايا وهُداكِ وبينهما العشق»
سلمى خالد إبراهيم
استغفر الله العظيم وأتوب إليه 3 مرات
حسبي الله لا إله إلا هو عليه توكلت وهو رب العرش العظيم 7مرات
( قولهم مش هياخدوا وقت يا سكاكر♥)
بسم الله الرحمن الرحيم
الفصل الحادي عشر
(غصة الماضي)
ألا تعلم أن وصال القلب بيننا لن يوقفه شيء، سأبقى معاك حتى تعترف لنفسك أنك الأفضل وأن ما بك ليس بعجيبة من عجائب الحياة بل طبيعي تمامًا، أنت ستظل الأفضل على الاطلاق بأنظاري يا عزيزي.
عادت تلك الغصة بقوةٍ أكبر تقبض على صدرها بشراسة، تركت كفه سريعًا تضع يدها على صدرها بقوةٍ تحاول أن تنزع تلك الغصة ولكن لم تستطع، تهدجت أنفاسها، يرتعش باقي جسدها بالكامل، لتصبح قدماها كالهلام لم تقوَ على الوقوف، سقطت على الأرض كالمرة السابقة لا تشعر بشيء سوى الألم القابض على صدرها، ودموعها المنهمرة من شدة الألم، صوت أنفاسها التي تلتقطها بصعوبةٍ بالغة.
انتفض غفران من رؤيتها بتلك الحالة، يتقدم نحوها بقلقٍ حقيقي مردفًا:
_ مالك يا فاطمة؟
لم ترد، أصبح كل تركيزها على أن تستطيع التقاط انفاسها، لم يفهم غفران سر تلك الحالة التي تأتيها للمرة الثانية بقوةٍ أكبر، ثم انتبه لجسدها الذي تزداد رعشته دون توقف، وملامحها التي تدل على الاختناق من ضيق التنفس، فأسرع يمسك وجهها بين كفيه حتى تنظر له، يتمتم بصوتٍ رجولي واضح:
_ اتنفسي يا فاطمة... مفيش حاجة متخلكيش تتنفسي... يلا شهيق وزفير..
شعرت به قليلًا، لتبدأ بتفيذ ما قالته، وبالفعل بدأت بالتنفس شهيقًا وزفيرًا إلى أن هدأت رعشتها، مضى وقت طويل وهي لا تزال تنظم عملية تنفسها بينما ترك غفران وجهها ثم نهض من مكانه ممسكًا كفها بحنوٍ ليساعدها على النهوض، وبالفعل نهضت تسير معه كان يحاوطها بذراعه ويده الأخرى تمسك بكفها، لم تستطع فاطمة فعل شيء سوى الاستسلام له، كان الأثنان يتحركان ببطء هو لأجل عرجته وهي لأجل حالتها، وصل إلى الفراش ليبدأ غفران بمساعدتها على الجلوس والتسطح عليه، يدثرها أسفل الغطاء جيدًا، ثم نظر لوجهها المنهك يردد بهدوءٍ:
_ أحسن دلوقتي؟
منحته إماءة صغيرة، تتحاشى النظر له، بينما تأمل غفران طريقتها وردد دون ارادة منه:
_ أنتِ ايه اللي بيحصلك دا؟ ايه الحالة اللي بتجيلك؟
أدمعت عينيها بصمتٍ، ترفض الحديث معه، كيف ستخبره بحالتها التي سرعان ما تأكدت منها اليوم بعد تشخيص مبدأي من طبيبتها، أمسك غفران بكفها الذي تعتصره بالكف الأخر، حتى يستطيع لفت انتباهها، وبالفعل استطاع جذب بصرها نحوه، فأردف بنبرة هادئة تحمل الدفء:
_ مالك يا فاطمة؟ ايه اللي فيكي تعبك كده؟
حاولت سحب كفها منه تجيبه بنبرة ساخرة:
_ لحظة بس افكرك يا غفران... أنت من شوية كنت عايز تطلقني عشان اللي يخصك مسألش فيه!
نظر لها صامتًا، ولم يتفوه بكلمة، بينما أكملت هي ولا تزال عينيها متألمتان:
_ أنت قبل كده قولتلي برمي الكلام من غير ما أشوف اللي ورا الكواليس وأنت برضو بترمي سم مش كلام بس من غير ما تشوف الكواليس...
سال الدمع من عينيها وأصبح وجهها يشعّ بالحُمرة، يرتجف قلبها من برودة الألم الذي تشعر به ولا تعلم سره ولكن تركه لها يشعرها بألمٍ لا تتذكره، هذا الفراق غريب ومؤلم للغاية، استرسلت حديثها بصوتٍ محشرج من البكاء:
_ لو فاكر حياتك بس اللي مدمرة يبقى محتاج تبص للأمور من تاني.
ظل يسمعها والصمت سيد هذا الموقف، يتأمل ملامحها المنهمكة من الحزن، صوتها الحزين للغاية، لا يعلم بماذا يخبرها ولكن قلبه يحمل القدر الكافي من الحزن، ردد بغصةٍ عالقة بحلقه:
_ في مثل بيقولك ميحسش بالنار غير اللي كابشها... يعني لا أنا هعرف أحس بيكِ ولا أنتِ هتعرفي تحسي باللي فيا.
رفعت بصره تنظر له، تواجه ما تراه بعينيه من خذلان، لتحدثه برفضٍ:
_ لاء المثل دا غلط... لو محستش باللي فيك فـ ربنا خلقني ليه معاك وخلقك ليه معايا يا غفران!... ما عشان نحس باللي فينا ونساعد بعض ونكمل الدنيا سوا.
لا يعلم ما مدى تلامس كلماتها لقلبه، يتأمل حديثها وطريقتها بنظرةٍ غريبة، يشعر بأنه يريد التحرر من ظلام الذي يحيط به، منحها لأول مرة بسمة طفيفة على ثغره، يربت على كفها مرددًا:
_ طب ارتاحي دلوقتي وبعدين نكمل كلامنا.
بدأ يتخلل لها اليأس، تشعر بأن محاولتها معه فاشلة، نظرت له وهو ينهض من مكانه، يتجه نحو الشرفة ولكن قبل أن يغادر ردد بهدوءٍ:
_ اظاهر كده الشمس عايزة تشرق من جديد.
تركها يدلف للشرفة بينما بقيت هي تعيد كلماته بذهنها، تحاول فهم ما يقوله حتى شعرت بأن حديثها أصبح مؤثرًا، ابتسمت ببعض السعادة، تبتهج قليلًا بأنها ذو تأثير، نعم لا تحبه ولكن لم تصل لحد الكره، تشعر بالحيرة بمشاعرها معه، ولكن لو كان حنون معها لأصبحا الآن عاشقان، ولكن ما الذي تخبأه الأيام، هذا ما أشعرها بحيرة أكثر؟
************
:_ يقين... يا يقين.... بت... يا بنتي ما تردي عليا!
ارتسم الضجر على معالمه بعد كل هذا الهتاف، ينظر لها بغيظٍ من تركيزها الشديد بشاشة الهاتف، رفعت بصرها تنظر نحوه بتعجبٍ قائلة:
_ مالك يا جبران؟
رفع حاجبه مستنكرًا، يجيب:
_ مالك يا جبران! أنا فاضلي تاكة وأقوم أعلقك على باب البلكونة.
انتفضت من مكانها تاركة الهاتف، بينما نظر لها جبران بحنقٍ ثم امسك الجهاز الحاسوب الخاص به، ومعه باقي الأوراق قائلًا:
_ لو تكرمتي عليا تسيبي التلفون وتعمليلي قهوة خلينا أخلص من دي تقارير.
زفرت ببعض الراحة قائلة:
_ يا أخي خضتني ما تقول من الصبح.
اتسعت عين جبران، يدير رأسه فجأة لها ثم زمجرها بعصبية:
_ هو مش أنا بقالي ساعة بنادي عليكي وسيادتك مش معبرة أهلي!
رمشت بأهدابها ببراءة، تتمتم بنفيٍ:
_ محصلش يا جبجوبي.
ارتفعت شفته العلوية تنم على استنكار شديد، يعلق على حديثها:
_ جبـ.. ايه ياختي!
ابتسمت باتساع تجيبه بتكرر الكلمة:
_ جبجوبي... ايه رأيك اخترعت اسم دلع ليك.
:_ متخترعيش تاني... اخترعاتك هتجيب أجلي أنا عارف وروحي اعملي القهوة.
قالها بسخطٍ، في حين عبست ملامحها بضيقٍ تنهض، ولكنها كانت تهمهم ببعض الكلمات الغاضبة، تغلق الباب بتذمر واضح، تتحرك نحو الأسفل، ولكن قبل دلفها للمطبخ وجدت عامر يمسك بكتابٍ ما بين يده، ذهبت نحوه تردف بتعجبٍ:
_ بتعمل ايه يا عامر وماسك الكتاب لزقه في وشك كده ليه؟
ابعد الكتاب عن وجهه، ينظر له ببعض اليأس مجيبًا:
_ بتنيل أذاكر عشان ورايا شامل أحياء بكرة.
شعرت بالرهبة من كلماته، اهتز جزء بداخلها بألمٍ، ابتسمت له بحنانٍ بالغ تردد سريعًا:
_ طب محتاج حاجة! عايز احضرلك سندوتشات وكوباية قهوة؟
نظر لها قليلًا يومئ بايجابية، قائلًا بامتنان:
_ دا يبقى كتر خيرك عشان هفتان من الصبح وعم شوقي حلف بالطلاق ماهو دافع مليم تاني لبتوع الدليفري.
ابتسمت له يقين سريعًا ثم تحركت باتجاه المطبخ تعد لعامر بعض الشطائر ليتناولها مع قدح القهوة الخاص به، ولكن وسط صنائعها عادت تلك الغصة تقبض على صدرها، أخذت شهيقًا قوي لعل دموعها تنحبس كما كانت، رغم مرور السنوات ولكن ندبة الماضي ستظل مهما ظلت على قيد الحياة.
انتهت مما تصنعه وانطلقت إلى عامر تضع أمامه طبق به العديد من الشطائر وقدح القهوة، ارتفع صوت عامر المتحمس وهو يلتقط قطعة شطيرة:
_ تسلم إيدك يا مرات اخويا يا سكر.
ابتسمت له يقين ولكن بسمةٍ باهته، تتحرك نحو المطبخ مجددًا لصنع قهوة جبران الذي طال انتظاره، تفكر بمرارةٍ الماضي الذي أصبح علقم بحلقها لا تستطيع التحدث منه، لا تعلم كيف أوصلتها قدماها إلى غرفتها لتدلف كي تعطي لجبران قدحه ولكن قبل أن تخطو ردد جبران بضيق:
_ كل دا يا يقين بقالك ساعة إلا عشر دقايق تحت عشان كوباية قهوة.
حركت رأسها بنفي، تبرر تأخيرها:
_ لا أنا شوفت عامر قاعد بيذاكر وعملتله سندوتشات سريعة كده وكوباية قهوة.
حدق بها في ذهول، يرمش بأهدابها بعدم تصديق، يردد بهدوءٍ الذي سبق العاصفة:
_ عملتي لعامر سندوتشات وقهوة صح؟
حركت رأسها بإشارة نعم، ليسترسل جبران حديثه وهو ينهض ليقترب منها:
_ وأنا قاعد بتذل زي الكلب عشان تعمليلي كوباية قهوة واحدة صح.
اومأت مرة اخرى بإيجابية، ليمسكها جبران من ملابسها عند لياقة التي- شيرت يغمغم بغيظٍ:
_ آه لما تئويكِ... أنتِ في ايه النهاردة بظبط؟
كان يحرك يمينًا ويسارًا، لتضع يدها فوق كفه القابض على ملابسها قائلة:
_ سيب التي شيرت... سيب التي شيرت هيكرمش.
عض على شفته السفلى بغيظٍ، يردد بحنقٍ:
_ دا كل اللي همك يكرمش... دا أنا هكرمشك أنتِ شخصيًا لو مبطلتيش هطل يا يقين وركزتي في حياتك شوية.
تركها يستدير ليعود مكانه، بينما امسكت يقين بالـ (تي-شيرت) الخاص بها تهندمه بعد ما فعله به جبران، تحدق به مغتاظة من طريقته، ثم عادت تجلس مجددًا تمسك الهاتف لترى وجبة جديدة، فالغد يوم مميز لها وله طقوس خاص تمنت فعلها.
***********
نظرت للساعة بصدمةٍ بعدما وجدتها تدق السابعة والنصف صباحًا، انتفضت من الفراش بقلقٍ لترى غفران نائمًا بعمقٍ ولم يستيقظ، تحركت سريعًا تغتسل وترتدي ملابس مناسبة للجلوس بالأسفل، فاليوم خاص بهم وجميعهم موجودون، تحركت للأسفل تنطلق باتجاه المطبخ ولكنها وجدت شقيقتها تقف على الموقد ترى ما بالاناء، دلفت لها قائلة بحرجٍ:
_ أنا آسفة يا يقين راحت عليا نومة بجد!
رمقتها يقين بنظرةٍ غاضبة قائلة:
_ سيباني في المطبخ لوحدي وأنتِ عارفة أن النهاردة هنعمل فطار لينا كلنا.
تقدمت نحوها فاطمة تقبل خدها قائلة باعتذار:
_ حقك عليا بقى يا ارنوبتي.
لم تستطع كبح بسمتها وأشراق على ثغرها، لتهتف بهدوءٍ:
_ طب خرجي اللبن والجبنة من التلاجة وأمري العيش على ما أخلص البليلة واحمر البطاطس.
اومأت فاطمة بجديةٍ ثم كادت أن تنطلق ولكن توقفت فجأة قائلة ببسمة تتسع شيئًا فشيء:
_ بقيتي ست بيت شاطرة يا يقين... أنا بجد فخورة بيكِ أوي ونفسي ماما تشوفك.
ابتسمت لها يقين ببعض السعادة تشعر بالفخر من نفسها، تنظر لشقيقتها بامتنان قائلة:
_ أنتِ الوحيدة اللي وثقتي فيا زمان وخلتني عايشة للفرحة بتاعت النهاردة.
بادلتها نفس الابتسامة المحبة، ثم انطلقت للبراد حتى يعدّوا طعام الافطار ويصبح جاهزًا بالساعة التاسعة، كلتاهما يتحركان بخفةٍ بالمطبخ حتى انتهوا من اعداد الطعام ووضعه بالطاولة في الردهة، تحركت كلا الفتاتان إلى الأعلى كي تيقظ كلًا منهما زوجها وتولت فاطمة مهمة ايقاظ ملك بينما يقين ستيقظ عامر.
:_ جبجوبي قوم يالا عشان الفطار.
ظلت تدفعه بكفها كي يستيقظ، بينما شعر جبران بالضجر من نعتها له بهذا اللقب ليغمغم ببعض الضيق:
_ ما بلاش اللقب اللي يبوظ الهيبة دا.
حركت رأسها نافية، تمسك بذراعه تسحبه ليعتدل بجلسته، متمتمة بدلال طفولي:
_ تؤ تؤ تؤ هقولك جبجوبي براحتي.
رفع حاجبه باستنكار، متمتمًا:
_ ولما ألزقك قفا يخلي لسانك دا يتعدل يبقى ايه.
اتسعت ابتسامتها قائلة وهي تشير باتجاه قلبه:
_ مش هتقدر عشان دا مش هيزعلني صح!
نظر لها قليلًا تزحف بسمةً متمردة لشفتيه، مرددًا بمكرٍ:
_ دا عايز يقول حاجات كتير بس كلمة جبجوبي منعاه.
ازاحت يدها سريعًا، تبتسم بخجلٍ له، تتجه نحو الخزانة تسحب منها زي مناسب لتناول الفطور والذهاب إلى الجامع لقضاء صلاة الجمعة، صمت جبران مبتسمًا ولم يرغب بالاكثار من اخجالها ثم أخذ منها ملابسه وانطلق نحو المرحاض بينما غادرت هي الغرفة تنطلق نحو غرفة عامر ولكنها وجدت الباب مفتوح طرقت بخفة فلم يستجب ولكن سمعته يكبر بالصلاة، نظر للداخل فوجدته يجلس لقول التحية وما أن انتهى حتى هتفت يقين ببسمة راضية:
_ تقبل الله يا عامر... كنت بتصلي ايه؟
طوى سجادة الصلاة، يبادلها الابتسامة قائلًا:
_ منا ومنكم... كنت بصلي الصبح وركعتين لله عشان ينقذني من الثانوية دي بمجموع كبير يدخلني طب.
منحته نظرةً متألمة، تبتسم له بحنوٍ بالغ، تردف بصوتٍ حنون للغاية:
_ متقلقش يا عامر بإذن الله هتبقى دكتور اد الدنيا ويمكن صاحب مستشفى كمان.. تعالى يلا عشان أنا حضرتلك شوية بليلة وفطار يشد حيلك شوية.
ضرب كف بالأخر، يهتف بحماسٍ:
_ ايوة بقى يا مدلعني.
تحرك الأثنان للأسفل ولم ترَ نظرات جبران الواقف بنهاية الطرقة من الجهة الأخرى يرى ويسمع ما تفعله، زفر مختنقًا من طريقتها وهبط للأسفل بصمتٍ يحاول أن يزيح هذا الأمر من رأسه وأنها تتعامل مع شقيقه بطريقة عادية.
***********
:_ مش هفطر تحت يا فاطمة.
قالها بنبرةٍ رافضة قاطعة ينطلق نحو الشرفة، فهذا كهفه ويخشى الخروج منه، ظل به طيلة اربع سنوات يأبى الخروج، تحركت خلفه سريعًا تحاول اقناعه بنبرة مستعطفة:
_ ليه بس دا ملك تحت وعامر وجبران ويقين مفضلش غيرنا... تعالى نتجمع دا يوم الجمعة والجماعة حلوة يا غفران أنت متعرفش قيمة الجماعة؟
نظر لها بجانب عينيه، يردف بكلماتٍ تحمل رفض تام:
_ وأنا قولت لاء يا فاطمة... عارف قيمة الأكل الجماعة أنه بيزود البركة في البيت وليه فايدة للجسم وللحياة بشكل عام بس أنا مش نازل برضو.
تخلل اليأس بداخلها، تنظر لحدقتيه اللتان تنم على رفضه القاطع، زفرت بتعبٍ من محاولتها البائسة، لتتمتم في محاولة اخيرة:
_ أنت سبتني اروح السوق لوحدي يا غفران وكنت حاسه فعلا بالوحدة... ماشية لا عارفة اتكلم ولا أسأل عن حاجة لأني اتحرجت اسأل جبران كفاية يقين عليه حسيت احساس وحش أوي... والنهاردة برضو هتسبني أنزل لوحدي لو في حاجة حلوة عملتها حلوة عشانك ممكن تنزل معايا!
لم يوافق ولم يرفض ظل صامتًا دون النظر لها، بينما تأملت فاطمة صمته بيأسٍ من أن ينهض معها، لتتحرك نحو الباب تاركة إياه، تشعر بالاختناق من رفضه للجلوس معهم بالأسفل، أغلقت الباب تهبط من أعلى الدرج تراهم ينتظرونهما كي يهبطا سويًا، ازداد شعورها بالحرج ولم تعد تعلم بماذا تخبرهم أتخبرهم بالرفض!
وصلت للطاولة وجلست في مقعدها بصمتٍ، تتمتم ببسمةٍ تحاول اخفاء حرجها خلفها:
_ كلوا يا جماعة بلاش نستنى.
نظرت لها يقين بعدم فهم متسائلة:
_ طب وغفران مش هنستناه؟
ألمتع الحزن بعينيها، تشعر بالحزن من تركه لها للمرة الثانية، ولكن قبل أن تجيب كان غفران يجيبهم بعدما وصل لنهاية الدرج:
_ لا خلاص وصلت أهوه بس فاطمة اتحرجت تقول إني بغير فوق.
نظرت له فاطمة بصدمةٍ، بينما ابتسمت له يقين وبدأت بتناول الطعام، بينما شعر جبران بالسعادة من طريقة غفران واستجابته لأفعال فاطمة، تحرك غفران إلى أن جلس بجوار فاطمة التي أخذت عكازه تضعه جانبها كي لا يؤرق تناولهم للطعام، وعندما استدارت مرة اخرى لتصبح جالسة باعتدال مال عليها غفران يهمس بأذنها:
_ نسيت اقولك أن الذاكرة عندي بتقف لما بشوفك ولما مشيتِ افتكرت كده كام حاجة حلوة ليكِ.
نظرت له فاطمة بأعينٍ متسعة من كلماته الأولى التي ارسلت بسمة ماكرة لغفران يعلم تأثير كلمته ثم أضاف سريعًا بمكرٍ:
_ أصلها بتضعف قدامك.
عضت على شفتيها تكبح بسمتها، تشعر بالسعادة من كلماته التي استلذ قلبها من سماعها، بينما عاد غفران يعتدل بجلسته ليبدأ بتناول الفطور ببطءٍ، ولكن مدت فاطمة يدها صانعة سندوتش صغير تضع قطعة من الفلافل عليه جبن كريمي وقامت بتقسيمه لنصفين ومد كفها لغفران قائلة ببسمةٍ:
_ دوق كده أنا بحب المكس دا أوي.
نظر لكفها الممدود له، ثم تذكر طريقة ابنة خاله التي تنتظر دائمًا الاهتمام منه دون تقديم به، مد كفه يمسك بالتلك القطعة وبدأ بتناولها، والغريب أنه شعر بالسعادة منها، تناول بنهمٍ واضح وما أن انتهى حتى نظر لها مجددًا يردف ببسمةٍ هادئة:
_ عايز واحد تاني.
دُهشت فاطمة من طلبه مجددًا ولكنها اومأت تبتسم بحبورٍ وبدأت بصنع واحد أخر ومد كفها به ولكن تلك المرة قسمه بينهما يمد كفه بالشق منه مرددًا:
_ كده متعادلين.
ضحكت على طريقته وأخذته منه قائلة وهي تستعد لقضمه:
_ المرة الجاية أنت اللي هتعمله.
لم يلاحظا الأثنان جبران الذي التمعت عينيه بحزنٍ من رؤية اهمال يقين له، نظر لها فوجدها تتحدث معه عامر حول أمور الدراسة وتتبدل الضحك معه، تنهد بضيقٍ ثم نهض من مكانه تاركًا الطاولة، بينما تعجب جميع الجالسين من نهوض جبران، نظرت فاطمة نحو شقيقتها ورددت بجدية:
_ قومي شوفي جبران قام ليه يا يقين؟
نظرت لها بدهشةٍ، تردف بتبرير:
_ ما يمكن شبع!
رفعت فاطمة حاجبها باستنكارٍ، تردف ببعض الحدة:
_ يقين بطلي استهبال واتكالية وقومي شوفيه يلا باين أوي أنه قايم زعلان.
زفرت يقين بصوتٍ مسموع وتحركت تصعد نحو غرفتهما، بينما انتهى عامر من تناول الطعام ليردف بهدوءٍ عكس هذا الجنون الموجود به:
_ هطلع اذاكر لحد صلاة الجمعة.
ابتسم غفران له، يردد بكلماتٍ ايجابية:
_ ربنا معاك يا دكتور.
اتسعت ابتسامة عامر بسعادة من كلمات غفران، ليتحرك بحماسٍ نحو غرفته، بينما نهض غفران يردف بهدوءٍ:
_ شكرًا يا فاطمة.
اومأت ببسمةٍ ارتسمت على شفتيها، تنهض من الطاولة قائلة:
_ شوية وهجبلك قهوتك.
لا يوجد علاج للجروح الخفي سوى الحنـان، تحرك غفران بعدما اعطاها موافقته للموضوع، بينما نظرت فاطمة إلى ملك التي لا تزال جالسة ثم قالت ببسمة حنونة:
_ عاملة ايه يا ملك؟
حركت ملك رأسها بنصف دورة ثم اجابتها:
_ كويسة.
اكملت فاطمة مبتسمة بسؤالٍ اخر:
_ مستعدة للدراسة خلاص بكرة؟
فركت كفيها ببعضهما، تنظر لها ثم تبعد بصرها عنها، تردف ببعض الخوف:
_ خايفة... خايفة مش يحبوني.
انحنت فاطمة حتى يصبح رأسها بمستوى ملك، تردف بحبٍ وحماس:
_ مش هقولك مش ضروري يحبوكي... بس هقولك أثبتي أن ملك تتحب وقلبها حلو ويستحق يتشاف صح... اللي هيحبك هيحب ملك واللي مش بيحبك دا مش هنقوله حاجة خليه بعيد عننا.
زحفت بسمة طفيفة تكاد تُرى على شفتيها، تنهض من مكانها تصعد غرفتها، بينما أكملت فاطمة باقي ما تفعله.
***********
ادخلت رأسها فقط من خلف باب الشرفة تردف ببسمة مرحة:
_ الجميل زعل ليه؟
نظر لها بجانب عينيه ثم عاد ينظر للبيوت الموجودة حولهم بصمتٍ، رفعت حاجبيها بتعجبٍ، تدلف إلى داخل الشرفة قائلة بحيرة:
_ مالك يا جبران؟ أنا زعلتك بحاجة؟
لم يجيبها أيضًا، لتمسك يقين بكفه تتطلع له بدهشة تزداد:
_ في ايه يا جبران؟ رد عليا.
نظر لعينيها بطريقةٍ مخيفة، يجيبها بصوتٍ هامس:
_ لو اتكلمت هتزعلي مني يا يقين... فأمشي أحسن.
شعرت بالرهبة من حديثه، ولكنها أصرت على فهم سر غضبه هكذا، شدت كفه بقوةٍ أكبر متمتمة باصرارٍ:
_ لا عايزة أعرف مالك! قولي في إيه!
سحبها بعنفٍ إلى داخل الغرفة، حتى شهقت يقين بخوفٍ من سحبه لها بتلك الطريقة، وما ان دلف للغرفة حتى دفعها إلى أن سقطت على الفراش بقوةٍ، استدارت تنظر له بصدمةٍ، بينما هدر جبران بغضبٍ جامح:
_ عايزة تعرفي في ايه... في أن بحاول اديكي اهتمام وأنتِ لاء... كل ما اقرب منك تبعدي... كل ما أحاول اخلي علاقتنا احسن بدل ما أنا متزفت مجبور عليها تبوظ... في أن كل اهتمامك رايح لعامر اخويا وجوزك اللي ليه حقك بالاهتمام دا رمياه... قوليلي عملت ايه ليا يا يقين من أول جوازنا... ولا حاجة... لو حاسه إنك مش طايقني أوي كده قولي بدل طريقتك دي معايا.
استمعت لكل ما قاله بدموعٍ تسيل على وجنتيها، تنظر له بحزنٍ وألم، تشعر بأنها هي العبء الثقيل عليه، هو قدّم لها يينما هي أخذت فقط، ظلت صامتة لوقتٍ طويل كان جبران ينظم أنفاسه بعدما طفح به الكيل، نظر لدموع التي لا تزال تسيل، نظراتها الثابتة بمكانٍ واحد، ليحرك رأسه بيأسٍ متمتمًا بضيق:
_انسي يا يقين... الأفضل لينا نبعد عن بعض... لا أنتِ فهماني ولا أنا فاهمك.
كاد أن يتحرك ليبتعد إلى خارج الغرفة كعادته، ولكن اوقفه صوتها المبحوح:
_ مسألتش ليه في الوقت دا اهتميت بعامر يا جبران؟
قطب جبينه بتعجبٍ، يستدير لها بكامل جسده، بينما حركت بصره نحوه تنظر له بفيضٍ يسيل من حدقتيها، تسترسل بنبرة أشبه بجدارٍ به شروخٍ عنيفة:
_ أنت عارف عامر في سنة كام؟
تعجب أكثر من اسئلتها، ليجيبه بتريث:
_ في تالتة ثانوي.
أغمضت عينيها بألمٍ، تقاوم تلك الذكرى القاسية، ولكن هيهات قد غلبتها بكل مرة تأتي لها، فتحت حدقتيها تنظر له بألمٍ ممزوج بانكسارٍ واضح:
_ ودي نفس السنة اللي اتكسرت فيها يا جبران.
نظر لها بشكٍ، لتكمل وهي تلف ذراعيها حولها لعلها تزيل برودة جسدها:
_ خلصت تالتة اعدادي ووقتها كان المفروض أقرر ادخل ايه صنايع ولا ثانوي تجاري ولا ثانوية عامة... وعشان تفكير مجتمعنا العقيم أن الثانوية عامة أفضل من طلاب الصنايع والتجاري... ودا على أساس طلاب ثانوية عامة متفوقين واذكية وطلاب صنايع وتجارة فاشلين مع أن على فكرة طالب صنايع و تجاري دا بيتعب وبيتعب أوي وكمان الطالب اللي داخل ثانوية دا بيبقى عظيم والطالب اللي دخل ثانوي صنايع وتجاري يبقى جاب العار لأهله ويتكسف يقول إنه صنايع.. كل دا عشان نظرة مجتمعك ليك...
صمتت قليلًا تستجمع شتات نفسها، بينما تقدم جبران حتى جلس جوارها ينتظر أن تكمل باقي قصتها، وبالفعل عادت تتحدث بصوتٍ ضعيف:
_ طول عمري الكل شايفني فاشلة وغبية... أكتر لقبين كانوا بيتقالوا ليا... فقررت ادخل ثانوي عام عشان أثبت لأمي إني مش كده وأثبت لكل إني مش فاشلة وغبية زي ما بيقولوا... ودخلت أول سنة عديت بالعافية وجه وقت إني اقرر اكون علمي ولا أدبي...
اطلقت بعض الضحكات البائسة، تنظر له بدموعٍ تقطر، تردف بألمٍ:
_ وحتى دي كان برضو ليها نظرة مجتمع يا جبران... اللي يدخل أدبي يبقى غبي واللي يدخل علمي يبقى طالب ذكي وتعب اكتر من الطالب اللي دخل ادبي... ونظرة المجتمع الراجعي دا اتحكمت في كل قرارتي لحد ما خسرت نفسي...
شهقت بقوةٍ من كثرة بكائها، ليسرع جبران متمتمًا بقلق:
_ كفاية كده يا يقين.
حركت رأسها برافضٍ تسترسل حديثها لتعود تلك الندبة وتصبح جرحًا مرة أخرى:
_ دخلت علمي علوم وكملت في كل حاجة وأنا عارفة ان قدراتي مش أد كل اللي دخلته بس كملت ووقتها ماما كانت فرحانة أوي... بس مسلمتش من تريقة صحابي على أن إزاي ادخل علمي... ودخلت الامتحانات وحليت ومش هقولك إني اجيب مجموع طب بس كنت اجيب مجموع كويس يدخلني كلية... اتظلمت وقتها أوي ولقيت نفسي شايلة كيميا وفيزيا...
صمتت قليلًا تشهق بعدةٍ شهقات عنيفة، تزيد من لف ذراعيه حولها لتمنع انتشار برودة جسدها، شعر جبران بالقلق الشديد عليها ولكن ترفض التوقف عن الحديث، أكملت حديثها بآلامٍ تقطر منها:
_ مش قادرة انسى نظرة الخذلان اللي في عين ماما ولا الوجع اللي في عيون الكل وقتها... كل حاجة اتسجلت يا جبران في دماغي اللحظة دي كانت بداية لكسرة الكل ليا... دخلت دور تاني وشيلت تاني ودخلت تاني سنة جديدة على المادتين دول وشيلتهم تالت ودخلت المرة الرابعة بس كنت فقدت كل حاجة في حياتي خلاص وقتها بس نجحت فيهم لكن التنسيق في السنة دي عالي وملقتش كلية ودخلت معهد... تخيل بقى طول السنين اللي قضتهم لحد اللحظة دي بيتقالي لسه يا غبية و دخلت الثانوية عشان أعالج كسرتي من الكلمة دي فـ اتكسرت اكتر.
رفعت بصره نحوه قائلة بانكسار:
_ عارف هتلاقي أي بني آدم دخله ثانوية عامة لسه بيعاني من تروما (صدمة) منها وعمر الوجع دا ما هيتصلح جواه... عرفت ليه بهتم بعامر عشان عاد شريط كسرة مش عارفة اقوم منها يا جبران... أنا بقالي خمس سنين مش عارفة اتخطى الذكرى دي... كل ما ينزل جدول للثانوية عامة أخاف ونفسي يتخنق وكأني أنا اللي هدخل للثانوية عامة من تاني.
نظر لها قليلًا يتأمل ملامحها التي شوهه الحزن، ليمسك كفاها بحنوٍ يحاول جذب انتباهها، ثم أردف بتعجبٍ:
_ وليه محكتليش كل دا يا يقين؟
ابتسمت بألمٍ تجيبه بصوتٍ مختنق:
_ هو في حد هيحكي اتكسر إزاي؟
أومأ برأسه بايجابية ثم رفع وجهها نحوه يقبل جبينها برضا قائلًا بحنو:
_ بعد اللي حكتيه صدقيني نظرتي ليك بدل ما كنت شايفك عادية بقيت شايفك إنسانة عظيمة تستحق الكل يفتخر بيها.
ابتسمت له بارهاقٍ، ثم حاولت النهوض كي تغادر الغرفة ولكن اوقفها جبران متمتمًا بصوتٍ حاني:
_ استني يا يقين.
استدارت تنظر نحوه ببعض الحيرة ولكن يعتريها التعب، بينما تقدم جبران يمسك كفها ليتحرك بها إلى المرحاض يفتح صنبور الماء ثم بدأ بمسح وجهها بالقليل من الماء البارد، شهقت قليلًا من صدمة الماء بينما أغلق جبران الصنبور وامسك بالمنشفة وبدأ بتجفيف وجهها بلطفٍ كي لا يؤلمها، انتهى من كل ما فعله وعاد بها إلى الغرفة يترك كفها ليخرج ملابس جديد بدلًا من التي أصابها البلل، يردد بهدوءٍ:
_ خدي غيري الهدوم دي عشان اتبلت ولما تخلصي تعالي.
لم يعد لديها طاقة مرة أخرى للاستمرار بأي شيء، لا ترغب بالحديث ولا بالاشارة لأي موضوع، امسكت الملابس وانطلقت تبدلها بينما انتظر جبران انتهائها ولكن عقله وقلبه انشغالا أكثر بها، فكيف لها أن تمر بكل هذا دون أن تتحدث وأيضًا كانت تبتسم وتضحك، زفر بضيقٍ من نفسه ثم رفع بصره عن الأرض ليجدها قد ارتدت منامتها، ابتسم لها سريعًا ثم امسك كفها وذهب بها إلى الفىاش متمتمًا:
_ نامي دلوقتي شوية... وهصحكي على وقت الغدا.
قطبت جبينها برفضٍ قائلة:
_ مش هينفع فاطمة مستنياني اساعدها فيه عشان نعمل غدا جماعي.
حرك رأسه نافيًا يردد بهدوءٍ:
_ متقلقيش هتصرف في الموضوع دا... نامي بس دلوقتي.
تنهدت بارهاقٍ ثم دثرت نفسها أسفل الغطاء هي بالفعل تحتاج للنوم، بينما وقف جبران ينتظر غفوها ثم تحرك إلى خارج الغرفة ليهبط الدرج سريعًا يحمحم بخشونةٍ لتستمع له فاطمة الواقفة بالمطبخ، استدارت فاطمة تنظر له بتعجب، ليردف جبران ببهض الحرج:
_ معلش كنت عايز اتكلم معاكِ دقيقة.
اومأت برأسها ثم جففت كفها تتحرك معه نحو الخارج إلى أن وصلوا للردهة، تمتم جبران ببسمةٍ حرجة:
_ معلش يقين مش هتقدر تنزل النهاردة تحضر الغدا.
التمع القلق بحدقتيها متمتمة بخوف:
_ هي كويسة ولا فيها حاجة؟
نفى سريعًا مردفًا:
_ لالالا هي كويسة بس مرهقة شوية ونامت.
شعرت فاطمة برغبته في عدم الافصاح عن الأمور بينهما لتبتسم بهدوءٍ تتمتم بعدما استقمت لتقف:
_ خلاص مفيش مشكلة يا جبران أنا بس قلقت... هسيبك بقى عشان ألحق اكمل الغدا.
انطلقت نحو المطبخ لتكمل باقي اعمالها بينما استمع جبران لصوت المؤذن يعلن عن خطبة الجمعة، نهض سريعًا وقرر أن يغادر مع عامر إلى سبيل الله.
***********
انتهت خطبة صلاة الجمعة وتحرك كلًا من جبران وعامر إلى خارج المسجد يسيران سويًا بصمتٍ، كلاهما شارد بحياته فأحدهما يفكر بحديث يقين وما حدث معها وبدأ يعيد تفكيره بالأمر لإيجاد حل، والأخر يفكر دروس استذكاره وما الذي سيفعل به، أصبحت الحياة توزع مهام على البشر حتى لا تدع لهم وقت للاتفكير، انقطع وصال الصمت بصوت جبران المتمتم:
_ عامل ايه في دروسك يا عامر؟
نظر له بدهشةٍ من سؤاله فلم يتوقع أبدًا من جبران أنه يمكن أن يستفسر عن حياته، تعجب جبران من صمته ليردف بدهشة:
_ مالك يا بني بسألك عامل ايه في دروسك ولا مسقطها من دماغك؟
نفى برأسه عدة مرات، يجيبه بحيرة:
_ اصل دي أول مرة حد يسأل عني غير جدك وابوك... إنما أنت وغفران عمركم ما سألتم عني.
وقعت اجابته ببعض الصدمة عليه، كصخرة أُلقيت فوق رأسه لتنبه لبعض النقاط، ألا هذه الدرجة مبتعدين عنه، ظل يفكر بحياته فلم يجد بالفعل مرة يسأل بها عنه دائمًا يوبخه عن دلوفه لغرفته ولمس اغراضه ويصبح منشغل بالعمل مع جده أو بحياته ووسواسه القهري، تنهد بحزنٍ يبدو حقًا أن هناك بعض الأفعال العائلية قد نسوها فأصبح الفتور بينهما أكبر، ابتسم له قائلًا:
_ لا ما الدكتور عامر ان شاء الله هـ يتسئل عليه بعد كده!
غيم القلق على وجهه، يشعر بخوفٍ مما هو قادم، ليسرع جبران بالحديث عندما وجده صامتًا والخوف يقطر من عينيه:
_ مالك يا عامر فيك ايه؟
ازدرد لعابه بصعوبة يجيبه بتعبٍ يعتريه الحزن:
_ هو أنا شيلت المسؤولية كده امتى؟ حاسس الموضوع أكبر مني ومش هقدر أكمل؟ عايز اهرب من كل دا وارجع عامر اللي بيهزر ويضحك مش قاعد شارد وبفكر هو أنا ممكن انجح!
لم يتخيل جبران أن عامر يضمر بقلبه كل تلك المخاوف، يرى شعور شقيقه بأزمةٍ وخوف مما هو قادم، زفر ببطءٍ ثم ردد بهدوءٍ يحمل حنوًا:
_ مع الزمن يا عامر كلنا بنشيل مسؤولية... خليك عارف حاجة مهمة أن سنك دا أكتر سن مميز عارف ليه؟ عشان هتقدر تجرب وتقع وتقوم تاني من غير ما حد يلومك وحتى لو لامك فمش هيبقى اوي ... لكن لو ضيعت السن دا في الخوف من التجربة وأنك تحاول تشيل المسؤولية لما تبقى ابن عشرين وقتها هتشيل المسؤولية غصب عنك ولو غلطت اللوم عليك هيبقى أضعاف... جرب واغلط وصلح من دلوقتي واحنا معاك يا عامر هنكون فخورين أن عندنا اخ اسمه عامر سواء عمل أو لاء حبنا ليك عشان أنت أخونا.
ربما تلك الجرعة التي كان يريدها، لم يطالب بها ولكن شاء الله أن يرسلها له بعدما اهتدى لطريقه، فربما لو لم تهتم يقين ويتشاجر جبران لاستمرت الحياة فاترة هكذا، ابتسم عامر له ثم قال بامتنان:
_ شكرًا يا جبران.
ضرب على كتفه بمرحٍ قائلًا:
_ عيب ياض أنت أخويا.
لم يكمل كلماته وكانت قدمه قد غرست ببركة صغيرة من الماء وبها طين، اتسعت عين جبران بصدمةٍ، بينما نظر عامر لما حدث ومسح على وجهه قائلًا بنفذ صبر:
_ يلا يا جبران نجري عشان تغيّر.
لم ينتظر دقيقة واحدة بل ركض سريعًا ليبدل تلك الملابس بينما ركض خلفه عامر ولكن لم يلاحظ بروز صخرة من الأرض ليتعثر بها ويسقط على الأرض بقوةٍ جعلته يصرخ ألمًا، ظل على الأرض قليلًا يرفع رأسه نحو جبران فوجده لايزال يركض، ليهتف بألمٍ ممزوج بغيظ:
_ هتروح من ربنا فين وأنت فيك كل العِبر.
***********
انقضى يوم الجمعة بعدما جهزت فاطمة طعام الغداء تستقر الأمور بينها وبين غفران، في حين قرر جبران ألا يتحدث مع يقين بما حدث لها، بينما عاد عامر يستذكر دروسه مجددًا واخبر ملك بأن تستعد لبداية يوم دراسي جديد.
***********
( عشان خاطري يا بابا خلينا اكلمهم في التلفون... بناتي مش هيعرفوا يتصرفوا لوحدهم ومقدرش على بُعدهم كده)
تلك الكلمات المتقطعة التى صدرت بعد شهقات طويلة من بكاء حاد، تُتمتِم بها عبر الهاتف، في حين احتدت نبرة جبران الأكبر ليردف بطريقةٍ صارمة:
_ أنا قولت كلام في الموضوع دا مش هيتكرر يا ناهد... رجوع للبنات مش هيحصل أبدًا غير لما أقول... واقفلي دلوقتي عشان ورايا شغل ولو عرفت إنك كلمتيهم يا ناهد هتتحرمي من انك تشوفيهم لأخر العمر.
أغلق هذه المكالمة بغضبٍ، بينما ظلت تشهق بقوةٍ ينتفض جسدها لفراقها الذي لا تطيقه عن بناتها، تشعر بأن هناك من يسلب روحها، نظر لها خليل بيأسٍ يقف على اعتاب غرفتها يرى ما تفعله ثم قال بهمسٍ لم تسمعه:
_ اظاهر إن مشوارنا هيطول معاكِ يا ناهد.
***********
وقفت أمام المدرسة تنظر نحو عامر ويقين اللذان أصرا على توصيلها إلى المدرسة، فقالت بنبرةٍ تحمل الضيق:
_ متتأخروش... مش عايزة اروح وحدي.
أومأ عامر سريعًا، يبتسم بحنوٍ لها قائلًا:
_ عيب يا ملوكة... عامر هيجي جري لملك وهتروح معاه، بس عايز ملك متخفش من حاجة وتبقى شاطرة عشان يبقى فخور بيها.
زحف طيف بسمتها لثغرها، ثم استدارت تدلف إلى المدرسة بعدما وضعت السماعات تنظر للساعة بحرصٍ لتعلم وقت رنين الجرس لبدأ طابور المدرسة، تنظر للجميع ببعض الرهبة ولكن حديث عامر لها جعلها تقاوم هذه المشاعر.
تحرك عامر مع يقين إلى الشارع الخاص بالسوق بعدما طلبت منهما فاطمة أن يحضرا بعض الأشياء، لتردف يقين بصوتٍ أشبه بباكي:
_ ابوس ايدك روحني يا عامر وروح أنت أنا مش عايزة ادخل المكان دا تاني.
نظر لها عامر بشجاعة قائلًا دون أن يعلم ما الذي سيلقاه:
_ عيب عليكي دا أنتِ معاكِ عامر الشبح.
**********
هبط من الدرج يبحث عن فاطمة، فقط هبطت منذ الصباح ولم يعود للغرفة مجددًا، يعترف لنفسه بأن اهتمامها البسيط لتفاصيل بحياته جعله يرفض غيابها عنه، تحرك نحو المطبخ فلم يجدها أيضًا، فقرر الخروج إلى الحديقة المنزل ينظر بعينيه يمينًا ويسارًا إلى أن وجدها تقف مع سيدتان يحملان الحليب والجبن، يبدو أنها تشتري منهما، كاد أن يقترب منها ولكن استمع لصوت احدى تلك السيدات تقول:
_ اسم الله عليكي يا فاطنة جمال وأدب وألف من يتمناكِ بس إيه يا حبيبتي اللي خلاكي تشيلي مسؤولية كبيرة كده... دا أنتِ عايزة اللي يحافظ عليكي مش يمرمطك.
قطبت فاطمة جبينها بتعجب، تتسائل بحيرة:
_ هو مين اللي ممرمطني؟
اجابتها تلك السيدة بحرجٍ زائف:
_ سامحيني ياختي بس الصراحة إيه اللي يخليكي تستحملي واحد زي استاذ غفران كده دا عصبي واسلوبه وحش... وأنتِ كتير عليه مفكيش غلطة.
كان يعلم أنه سيستمع لتلك الكلمات إن غادر غرفته، ولكن شعوره بالألم في تلك اللحظة لم يكن عادي بل كان مخيفًا يقبض على صدره بقوةٍ، يخنق أنفاسه بشدةٍ!
رواية وبالحب اهتديت الفصل الثانى عشر
(غصة الماضي 2)
سأعود يومًا لأفضل مما كنت عليه ولكن لا تتركيني!
وقعت تلك الكلمات كنصلٍ قاتل على المتخفي خلف شجرة، بينما كالصخرة عليها، تنظر لتلك السيدة بذهولٍ لنطقها مثل تلك الكلمات، تغيّرت معالم وجهها لأخر حازمة جادة، ترد بكلماتٍ منمقة:
_ مع أن الكلام دا يخصني أنا وغفران بس ومحدش له حق يدخل في حياتنا لكن هرد على حضرتك وهقولك إن غفران لا يعيبه شيء... احنا الاتنين تقبّلنا بعض بعيوب بعض... هو في نظري كامل ولو جه صف رجاله قدامي وهو معاهم عيني مش بتشوف غيره... هو قدر يخليني أشوفه وأحبه... عصبي شوية طب حضرتك متعرفيش أنا فيا عيب ايه وهو مستحمله... غفران لو لفيت الدنيا بحالها مش هلاقي زيه لأن ببساطة هو الراجل المثالي بنسبة ليا ولو رجعت بالزمن تاني هختار غفران.
شعرت تلك السيدة بالحرج تنظر لصديقتها الواقفة جوارها ترسل لها نظرات عتاب، بينما الصدمة تعتري ملامح غفران خلف تلك الشجرة، اردفت تلك السيدة بحرجٍ:
_ مقصدش يا حبيبتي أنا بس من حبي ليكِ يعني وكده واكمن خطيبته سابته بعد اعاقته فقولنا أنه يعني مفيش واحدة تستحمله.
اشتعلت نيران الغضب داخلها ولكن حاولت السيطرة عليها حتى لا تفقد الموقف وتصبح ذات خُلق سيئة:
_ زي ما قولتلك غفران مفهوش شيء يكسف أو يخليني اتحرج منه لا هو بيشرب مخدرات ولا تاجر سلاح ولا انسان فاشل وضايع... دا مثقف وفخورة كوني مراته وهو جوزي واختلافه مع خطيبته دا شيء عادي هو مش أول واحد يخطب ويسيب خطيبته أو خطيبته تسيبه.
ابتسمت لها تلك بحبورٍ، تربت على كفها برضا قائلة:
_ ربنا يهدي سرك يا بنتي ويكون لك ذرية صالحة... ونعمة الزوجة والتربية... ومتأخذنيش في الكلام فوتك بعافية.
اومأت لها فاطمة مبتسمة، تراه تغادر من المنزل تتحدث مع صديقتها في حين كان يقف خلف الشجرة يشعر بصدمةٍ وراحةٍ من حديثها، لم يتوقع رؤيتها له بتلك الطريقة، لم تشعر بالحرج كخطيبته، وضع يده على صدره يشعر بأن جدار ثقته بنفسه الذي هُدم رممته بحديثها، استدار ينظر لها فوجدها تحمل حقائب الحليب والبيض وتدلف بها إلى المطبخ من الجهة الخلفية، ليعود هو مكانه يسير بخطواتٍ متمهلة ولكن عقله لا يفكر سوى بحديثها الذي يتكرر مرارًا فترتسم البهجة على شفتيه دون وعي منه، يدرك تفكيره الخطأ بها، صعد غرفته ثم انطلق نحو الخزانة يخرج منها حقيبة التي تحوي اوراق الخاصة بأبحاث قديمة، يهتف بجدية:
_ خلاص كده لزمًا تظهر للنور وأبدأ اشتغل من تاني.
***********
عبست ملامحها منذ رفضه لأن تختبئ هي ويذهب هو لاحضار ما تريده فاطمة، نظر لها عامر بجانب عينيه ثم قال بنبرة ساخطة:
_ ماشي مع بنت اختي عشان موافقتش ادخل السوق لوحدي؟
لم ترد عليه متجاهلة حديثه، بينما زفر عامر بتذمر واضح لطريقتها، يردد بهدوءٍ زائف:
_ خلاص يا يقين بقى دا أنتِ يا قادرة حلفتي ما تقفي على بياع وتشتري وهتخلينا أعمل كل حاجة وكمان مش عايزة تيجي الإفترى له ناسه بصحيح.
رفعت حاجبها باستنكار لحديثه، بينما تراجع عامر قبل أن يسترسل بسخطه:
_خلاص يا مرات اخويا... عايز اسألك على حاجة كده؟
تنهدت يقين قليلًا تردف بعبوسٍ:
_ عايز ايه؟
مسح على وجهه يعد إلى الرقم خمسة، ثم قال بجدية واضحة:
_ هي علاقتكم بملك عاملة إزاي؟
نظرت له بدهشةٍ من طبيعة السؤال، ولكن تذكرت حياتهم المفككة تمامًا، بُعد المسافات بينهم بالرغم من جلوسهم في منزل واحد، الفاصل بينهما حائط فقط ولكن بين وصال قلوبهم جبال ضخمة، رددت ببسمةٍ حزينة:
_ حياتنا غريبة أوي... فاطمة هادية أوي وبعيدة عن الكل بس حنينة ولما تلاقي حد في مشكلة بتساعده بس طبيعتها بتبقى في دراستها وعشان هي شاطرة في الدراسة كانت معتزلة شوية... أما بنسبة ليا فكانت ماما شيفاني غبية ومينفعش اتعامل مع حد حتى ملك وعشان كده كل ما اقرب منها تبعدني وتقولي
“ابعدي عنها أنتِ غبية ومش هتعرفي تتعاملي معاها وهي عايزة معاملة خاصة"
فكنت بضايق وأبعد عنها، وطبعًا ماما كانت شديدة مع ملك أوي وأغلب يوم ملك يا في المدرسة أو في مركز العلاج بتاعها.
استمع لحديثها باهتمامٍ شديد، ثم فهم سر رسمة ملك للتفكك الأسري، شعر بمعاناتها ووحدتها التي اقتصرت على المركز العلاج فقط، ابتسم بحزنٍ عليها عندما أتت لم تستجب في البداية ولكن مع مرور الوقت بدأت تستجيب له قليلًا وبدأ بالتحسن عليها، تنهد عامر بصوتٍ مسموع، ثم قال بشكرٍ:
_ شكرًا يا يقين.
نظرت له بفضولٍ شديد متسائلة:
_ طب قولي بقى بتسأل ليه؟
نظر لها قليلًا يفكر هل يخبرها أم يخفي هذا السر، ولكن لابُد من أن يعود الوصال بينهم، ردد عامر بزفيرٍ:
_ من مدة كده ملك ورتني لوح رسمتها كان فيها معنى لجملة كانت " من لم يجد الآمان وسط أسرته سيظل يرتجف إلى الأبد...!" وقتها عرفت إنها بتعاني من حاجة بس مرضتش تقول وعشان كده سألتك ودلوقتي فهمت ليه ملك حاسه بالخوف منكم.
شعرت يقين بغصةٍ تقبض صدرها، هذا أيضًا شعورها، لقد أفقدتهم والدتهما شعورهما بالأمان، أدمعت عين يقين بصمتٍ تحاول أن تصمد أمام عامر حتى تعود للمنزل، بينما لاحظ عامر صمتها وظن أنها تلوم نفسها ليسرع بالحديث في لطف:
_ متزعليش يا يقين... بصي أنتوا ارجعوا اتكلموا معها تاني وهي هتحس بالأمان واهتموا بيها، أنا لما جبران سأل عليا وعلى دروسي فرحت أوي بسؤاله ونسيت اهماله ليا وبُعده عني.
قطبت يقين جبينها، تنظر نحو عامر بتعجب قائلة:
_ هو جبران مكنش بيسأل عليك؟
حرك رأسه بنفيٍ، يجيب بحزنٍ:
_ لاء مكنش بيسأل خالص ولا هو ولا غفران...
ثم لانت ملامحه لأخرى هادئة، تحمل طفيف السعادة بنبرته:
_ بس يوم الفطار الجماعي غفران قالي جملة مُشجعة وجبران سأل عليا واحنا راجعين من الصلاة وبقى يشجعني عشان أكمل.
زحفت بسمة صغيرة لثغرها، يرفرف قلبها سعادة بعد سماع حديث عامر، أحقًا جبران يحبها؟، قد ذهب لعامر ليهتم به كما اهتمت بعد حديثهما، يفعل ما يريح قلبها ولا يتعبها، أنه أماني هذه الجملة الوحيدة التي رغبة بقولها له، أتت صورته بذهنها لتزداد بسمتها اتساعًا تنظر نحو عامر قائلة بحماسٍ:
_ لسه فاضل كتير على السوق عايزة اروح بسرعة!
حرك رأسه بنفي يشير نحو الشارع، نظرت يقين للشارع ثم تذكرت الدجاجة لتزداد لعابها بتوترٍ بعدما تبخر الحماس وحل الخوف مكانه، تقدم الأثنان نحو الطريق السوق ثم وقفت يقين خلف عامر قائلة ببسمة متوترة:
_طب معلش عدي كده وادخل الأول كده.
نظرلها متعجبًا ثم تحرك إلى داخل هذا الطريق وما أن وقف حتى استدار ينظر إلى يقين قائلًا:
_ اهوه ماله؟
ضيقت عينيها قليلًا ثم شعرت بالشك من دلوفها، ولكن قررت السير ببطء وما أن خطت بقدمها خطوة واحدة حتى انطلقت دجاجة على وجه عامر مما جعله يصرخ بصوتٍ عالي قائلًا:
_ ألحقوني... ألحقوني... حد يشيل فرخة جاكي شان.
أسرع هذا الصبي كالمرة السابقة ثم أمسك بدجاجة عن وجه عامر الذي تأوه من أظافرها، بينما ضربت يقين كفها بالأخر لتصدر تصفيقة عالية تردد:
_ كنت عارفة أن في غدر والفرخة دي مش هتجيبها البر.
تقدمت نحو عامر الذي وضع يده على وجهه باشمئزاز تردف بنبرةٍ مواسية:
_ معلش يا عامر... بتوجع شوية وبعدها بتخف تعالى ندخل نجيب طماطم وخضرة وورق عنب وبتنجان عشان نروح.
أدمعت عين عامر قائلًا بصوتٍ يمثله كالباكي:
_ أنا صعبان عليا نفسي اللي اتهانت في السوق دي.
اومأت يقين بتفهمٍ لما مر به، تسير للداخل معه قائلة:
_ معلش يا عامر اهي جت على اد الفرخة وضوافرها بس مجتش ست متسواش بصلة وراحت شتماك في نص السوق وفضحتك اكتر.
نظر له قليلًا ثم شعر بأن حديثها صحيح، انطلق سويًا نحو بائع الطماطم ثم وقفت يقين تسأل عن سعرها لتجده يخبرها:
_ الكيلو ب30
نظرت يقين نحو عامر قائلة بهمسٍ:
_ هينفع نفاصل معه ولا إيه؟
منحها نظرة ثقة ممزوجة بغرورٍ، يضبط لياقته قائلًا:
_ اتفرجي واتعلمي مني إزاي نفاصل.
رفعت يقين حاجبها من طريقتها المغرورة، بينما هتف عامر بجدية بالغة:
_ خلاص يا كبير هناخد منك ال3 بـ100 ج.
نظر له البائع بذهولٍ من شدة غبائه، بينما اتسعت عين يقين بصدمةٍ من جملته، لتسرع بالحديث:
_ أنت بتقول ايه! التلاتة كيلو ب90 ج يا أهبل رايح تقوله هاخدهم بـ 100 ج بتديله عشرة جنية هدية غباءك يا عامر.
نظر لها قليلًا، ثم حك مؤخرة رأسه بحرجٍ يردد متراجعًا للخلف:
_ المسرح تبعك يا بشمهندس و أنا هقف في الركن اعيط على فرخة جاكي شان اللي كلت وشي و العبط اللي قولته من شوية.
تراجع عامر للزاوية بجوار محل مغلق، بينما منحته يقين نظرة غاضبة ساخطة ثم بدأت بشراء ما تريد وتعطي لعامر الأكياس ليحملها.
************
وصل كلاهما إلى البيت بعدما انتهى من عملية التسوق، يدلفان نحو المطبخ سريعًا يردف عامر بتعب واضح:
_ دا أنا طلع عيني في السوق الحاجة اهيه.
ضحكت فاطمة بخفةٍ عليه، تتفقد محتويات الحقائب إلى أن اطمئنت، ثم قالت وهي تخرج الباذنجان وورق العنب والفلفل:
_ طب يلا يا حلوين تعالوا معايا ساعدوني عشان نخلص تأوير المحشي وحشيه ولفه.
اتسعت عين يقين بصدمةٍ، بينما وضع عامر يده على رأسه ثم افترش الأرض بتعبٍ واضح قائلًا ومعالم وجهه تحمل الصدمة:
_ أنا في تالتة ثانوي يا ناس... تالتة ثانوي ارحموني شوية... انتم فاهمين الموضوع غلط...
توقف عن الحديث بعدما أتى أشعار لهاتفه، فتحه سريعًا ثم اتسعت عينيه بصدمةٍ قائلًا:
_ ايه المدرس دا قلبه مات خلاص... ستك لسه ميتة وأنت منزل الحصة عادي كده! هو في ايه؟
قطبت كلًا من يقين وفاطمة جبينها من كلمات عامر، لتردف يقين بتعجب:
_ في ايه؟
نظر لها بحسرة يغلق الهاتف، ثم نهض من الأرض يجيبه بصوتٍ مغتاظ:
_ المستر جدته لسه ميتة الصبح خلاص... لقيناه رفع المحاضرة اللي علينا عادي وفي شامل عليها... دا جلط نص الدفعة بعملته دي عشان كلنا مخلصناش المتراكم علينا وورانا شامل.
ابتسمت له فاطمة بحبورٍ تتمتم بتضرعٍ:
_ ربنا يجبر بخاطرك يارب يا عامر وتنجح بالمجموع اللي نفسك فيه... خلاص اطلع أنت.
ابتسم لها عامر بامتنان لتلك الدعوات، ثم قال وهو يلقي الهاتف بعيدًا على أحد المقاعد:
_ لالالا دي قاعدة نسوان واوعى الفسق بقى... أنا راشق معاكم بس هحشي البتنجان عشان مش حافظ غير لفة الحشيش.
اتسعت عين يقين من حديثه، تنظر له بغضبٍ بعدما منحته فاطمة موافقة ماكرة:
_ طب يلا يا عامر أنت ويقين غيروا هدومكم واغسلوا ايديكم وتعالوا.
أسرع نحو غرفته بحماسٍ، بينما انطلقت فاطمة تكمل باقي ما تفعله، اندفع عامر نحو غرفته، بينما دلفت يقين للغرفة وما أن أغلقت الباب ودلفت إلى الداخل حتى رأت حقيبة سفر صغيرة، رفعت حاجبيها بتعجبٍ منها، ولكن اختفى تعجبها وهي ترى جبران يأتي من الشرفة بعدما أنهى مكالمته، لتشير نحو الحقيبة متسائلة:
_ هي الشنطة دي لمين؟
اجابها مبتسمًا:
_ ليا، هسافر لجدي عشان الشغل بتاعه واسلمه الأوراق خاصة بالحسابات.
ألتمع الحزن بعينيها تنظر نحو بضيقٍ، ثم تمتم بحزنٍ:
_ هو لزمًا تسافر؟ مينفعش حد ياخد الورق مكانك؟
ضيق عينيه قليلًا من نبرتها الحزينة، أهي تحزن لمغادرته! زفر قليلًا يسخر على حاله وتلك الأوهام، ثم قال ببسمةٍ زائفة:
_ مش هينفع يا وجه الأرنب عشان جدي طلبني كمان وأهو ترتاحي من واحد زي منكد عليكي.
اندفعت يقين نحو تحتضنه سريعًا، تبكي بصوتٍ مسموع قائلة:
_ لاء متسبنيش.
تجمد جسد جبران بصدمةٍ غزت جسده بالكامل، ولكن زيادة تشبثها به جعله يفيق من تلك الصدمة يرفع ذراعيه يربت على ظهرها بحنوٍ قائلًا:
_ صدقيني لو عليا هختارك أنتِ بس أوقات الظروف بتحكم علينا بحاجات نعملها عشان نوصل لشط الأمان.
لم تجيب على حديث بل ظلت تشهق بنحيبٍ، بينما أبعدها جبران عنه ينظر لوجهها الباكي، والذي بدأ بالأحمرار بقوةٍ، يردد بصوتٍ حنون:
_ يا يقين هما يومين وهاجي علطول مش هتأخر عليكي.
رفعت ظهر يدها لتزيل دموعها، تنظر له قليلًا، ثم قالت بين شهقاتها:
_ يو.. يومين بس صح!
اومأ برأسه سريعًا كي تتوقف، بينما استرسلت يقين بحزنٍ واضح:
_ يومين يا جبران بس لو بقوا يومين وساعة هتتعب أوي عشان نتصالح.
اتسعت ابتسامته من طريقتها، وشعر بالسعادة من تعلقها به، ليندفع بالسؤال يملأه مشاعر مشوشة:
_ هو أنتِ اتعلقتي بيا؟
حدقت به قليلًا بعدما استمعت لسؤاله، تشعر بأنها لو اخطأت سوف يحدث كالمرة السابقة، ابتسمت بحياءٍ تهبط ببصرها للأسفل قائلة:
_ يعني.. شكلي كده اتعلقت بيك.
لم يشعر بذاته وهو يسحبها ليعود لضمها مرة أخرى ولكن تلك المرة بسعادةٍ بالغة منه، شهقت يقين مما حدث بلحظة ثم ولكن استمعت لحديث يردد:
_ أوعى تبعدي قلبك عن قلبي عشان هو عايش بنبضاتك.
زحفت بسمة خجولة لشفتيها بعدما لمس دفيء كلماته قلبها، فأزاح بعض من برودته المكنونة بداخله، أغمضت عينيها تتمنى لو يظل قلبها يتعافي هكذا ويرتاح مما رأه منذ طفولته.
**********
:_ هتمسك المقوار كده وتدخل بطرفه أول مرة لحد ربعه كده، وبعدها تخرجه وتكمل بقيت النص دايرة دي وتدخل وتلف وتخرج... تدخل وتلف وتخرج يا عامر وأوعى تخرم الباتجان فاهم كل خرم عليه ضريبة.
تحدثت بتلك الكلمات الموضحة لما يفعله وكذلك تحمل تهديد صريح إذا اخطأ، تحرك عامر ليمسك عنها الأداة ثم أمسك بالباذنجان وبدأ بفعل ما قالته، ألقت فاطمة نظرة رضا ثم تحرك كي تبدأ بوضع ورق العنب في المياه الساخنة بعدما قطفت الأعواد منها، ولكن قبل أن تضع الأوراق بالمياه ارتفع صوت عامر متمتمًا:
_ فاطمة أنا خرمت بتنجانه اعمل إيه؟
أغمضت فاطمة عينيها بارهاقٍ ثم قالت تنظر له بأعينٍ تحمل الصبر:
_ كمل يا عامر وخلي بالك دا بتنجان مش واحد صاحبك هتغزه.
اومأ عامر مرة أخرى وأمسك بالباذنجان الأخرى وبدأ يكمل ما تعلمه حتى نجح وانتهى منها، زفرت فاطمة بارتياح واستدارت لتكمل ما بدأت وتنتهي كي تلف الأوراق وتصبح جاهزة عند حضور ملك ولكن ارتفع صوت عامر مجددًا يردف ببلاهةٍ:
_ فاطمة أنا خرمت باتجانة اعمل إيه!
صكت على اسنانها بغضبٍ، تحاول السيطرة على انفعالاتها، تردف بصعوبةٍ بعدما حاولت السيطرة على تلك النوبة الغاضبة:
_ سيبها يا عامر وادخل على اللي بعدها ورجاءًا يا عامر خلي بالك.
اومأ مرة أخرى وتركها وبدأ بغيرها، تنظر له بجدية لترى ماذا يفعل، ولكن انتهى عامر منها بسلام، زفرت براحةٍ ثم استدارت لتضع ورق العنب وتنتهي من تلك المهمة ولكن قبل أن يمس الماء الساخن ارتفع صوت عامر بتلك البلاهة:
_ فاطمة أنا خرمت بتنجان تاني!
تركت فاطمة الأوراق تمسح على وجهها بغضبٍ جامح، تشعر أنها على وشك قتله، تهمس بنفسها:
_ شكلك عايزني استخدام اسلوب ماما يا عامر كل خرم عليه خرطوم.
استدرات له بأعين تنفذ نارًا لينتفض عامر من مكانه بخوفٍ، غمغمت بنبرةٍ محتدة:
_عــــامر لو قولتلي تاني أن في بتنجان اتخرم صدقني همشي معاك بسياسة هتكرها أوي.
ازدرد لعابه بذعرٍ، بينما أكملت فاطمة بشرٍ:
_ هجيب الخرطوم وألسوعك بيه.
اتسعت عين عامر برعبٍ، يحرك رأسه بنفيٍ سريع، ثم انطلق لمقعده يبدأ بالانتهاء من الباذنجان، بينما استدارت فاطمة لتكمل باقي ما تفعله حتى انضمت لها يقين التي رأت عامر يركز كامل بصره على ما يفعله دون الالتفات يمينًا أو يسارًا، همهمت يقين بتعجبٍ ولا يزال بصره يسقط على عامر:
_ أنـا جيت يا فاطمة اعمل إيه؟
:_ اغسلي الخضرة يلا وقطعيها عشان نحطها على الرز ونحشي.
اومأت برأسها بايجابية، ولكن لم تسيطر على فضولها لتتمتم سريعًا:
_ هو عامر عامل كده ليه؟
استدارت لها تنظر لها بأعينٍ يملأها الشر، تجيبها بتهديدٍ صريح:
_ عشان قولتله لو خرم بتنجان تاني هجيب الخرطوم واضربه بيه يا يقين سامعة!
شعرت أن التهديد موجه لها أيضًا لتفر من أمامها هاربة تمسك بالخضرة كي تغسلها ثم تبدأ بتقطيعها، ليندمج جميعهم بالعمل دون أن يقاطعهم أحد حتى انتهوا جميعًا من عملية حشي الخضروات، نظر لهم عامر بارهاقٍ ثم قال وهو ينهض من مكانه:
_ آآه يا غضاريفي ياما... آآآه جسمي كله نمل فجأة... دي قاعدة تكفير ذنوب مش الفسق اللي في دماغي.
ضحكت كلًا من فاطمة ويقين عليه، لينهضا سويًا ويكملان باقي مهمتهما، بينما تحرك عامر نحو الخارج يتأوه كثيرًا حتى وصل لغرفته وبدل ثيابه وانطلق ليحضر ملك من أول يوم دراسي.
**********
( منها لله ربنا ينتقم منها على اللي عملته فيك يا عاصم)
كلماتٌ انطلقت من فمها بعدما احترق قلبه خوفًا على ابنها، بينما أغلق عاصم حقيبة سفره قائلًا ببسمةٍ حزينة:
_ عادي يا أمي خدي على دا هي عشان ليها أبوها ليه اسمه في البلد ومكتفاش أنه ينقلني من القضية لاء وكمان نقلني من المديرية كلها.
تقدمت منه السيدة ( نادية) تمسك بكفه والدموع لا تزال تفيض من حدقتيها تردد بقهرٍ:
_ كل دا عشان حققت في القضية وعرفت الحقيقة وأنها هي اللي قتلت مش صحبتها.
زفر عاصم بضيقٍ من تذكر كلمات ذلك الرجل له " سيرة بنتي لو جت في أي مكان صدقني هتندم وأول حاجة هتندم عليها والدتك... المرة دي هكتفي بقرصة ودان"، نفض تلك الكلمات من رأسه بعد ارتفع صوت شهقات والدتها، ليمسك كفها بحنوٍ مرددًا:
_ متقلقيش يا أمي دي قرصة ودن وهرجع تاني... بس قسمًا بالله لأحسره على بنته وهي في السجن.
مسحت نادية دموعها ولكن لا تزال شهقاتها موجودة، لينهض عاصم من أعلى الفراش يمسك كف والدته وينطلق بها نحو الردهة قائلًا بمرح:
_ طب يلا يا ست الكل عشان ناكل بقى لحسن أنا هفتان.
ضحكت بخفوتٍ عليه ثم جلسا على الطاولة التي تحمل اربعة مقاعد كان منها مقعد لوالده ولكن رحل كما سيرحل الجميع.
************
أبدلت ملك ملابسها بعدما احضرها عامر من المدرسة، تهبط من الدرج بهدوءٍ حتى وصلت للطاولة التي يجلس عليها الجميع، اشارت فاطمة لها قائلة:
_ يلا يا ملوكتي عشان تاكلي دا محشي وفراخ.
تحركت ملك نحو مقعدها، بينما رددت يقين ببسمةٍ حنونة:
_ عملتي ايه في أول يوم؟
نظرت ملك لما تفعله فاطمة، تضع لها الكثير من الباذنجان المحشي وقطعة من الدجاج، ثم اجابتهم قائلة:
_ مفيش حاجة... أنا قعدت في الديسك لوحدي وفي ميس اسماء حبتني وعرفت عندي ايه في المذاكرة.
أومأت فاطمة لها بايجابية تبتسم لها بحبور، ثم استدارت نحو غفران قائلة بتلك البسمة التي لا تزال تزين ثغرها:
_ تحب اغرفلك ورق عنب يا غفران؟
أومأ برأسه لها، ولكن لأول مرة يبادلها الابتسامة، لتبدأ فاطمة بوضع القليل من أصابع ورق العنب والباذنجان المحشي وقطعة دجاج، وضعت الطبق أمامه وما كادت أن تمسك بطبقها حتى أمسك غفران كفها مرددًا:
_ لا كلي معايا... مش الأكل الجماعة مفيد برضو وأنا بحب أفيدك أوي!
نظرت له قليلًا بذهول، ليبتسم لها بمكرٍ يغمز لها، كبحت ضحكتها لطريقته، وبدأت بتناول الطعام معه تشاركه الطبق، بينما وضعت يقين أصابع ورق العنب لجبران دون أن تسأله، تعجب جبران من كونها وضعت النوع المفضل له ليسألها بتعجبٍ:
_ عرفتي منين إني بحب الورق عنب اكتر؟
نظرت له بمشاكسةٍ، ثم غمزت له قائلة:
_ اللي يسأل ميتوهش ولا إيه!
ضحك عليها وغمز لها أيضًا ولكن بمكرٍ متمتمًا:
_ هقولك بقى بس لما نطلع.
اختفت بسمتها سريعًا ونظرت له بتوترٍ من طريقته وبدأت بالأكل تتحاشي النظر له، في حين التهم عامر طبقه وبدأ بتعبئة الطبق مجددًا ويتناوله بنهمٍ حتى انتهوا من الغداء وانطلقوا جميعًا إلى حيث يريدون ولكن أخذ غفران فاطمة وانطلق بها حاملًا حقيبته إلى أرض والدته، ثم جلس على الصخرة وإلى جواره فاطمة التي شد يدها كي تجلس إلى جواره ولكن التعجب يرتسم على ملامحها من صمته طيلة الطريق، قاطع هذا الهدوء صوت غفران متمتمًا:
_ دلوقتي بتسألي سؤال هو إيه اللي خلاها يجبني هنا مش كده؟
اومأت برأسها دون صوت، بينما استرسل غفران ببسمةٍ حزينة يحدق بعينيها اللتان تجهلان ما يريده:
_ في مرة سألتني ليه بأذيكي كده؟ وقولتلك عشان أذيتوني مسألتيش نفسك مين اللي أذت غفران وعملتله ايه؟
نظرت له بحرجٍ تجيبه بكلماتٍ حاذرة:
_ يعني عشان خطيبتك سابتك بعد الحادثة وبعتتلك جواب بكده؟
ابتسم لها غفران لسذاجة ما قالته، ثم انحنى يخرج بعض الأوراق من حقيبته، يمد يده لها بتلك الأوراق ثم قال بصوتٍ مختنق:
_ طب خدي دول كده شوفيهم.
قطبت جبينها بتعجبٍ، تمسك الأوراق من كفه ثم بدأت بالنظر بها ولكن سرعان ما اتسعت حدقتيها بصدمةٍ من تلك الكلمات القاسية التي تُهينه بعجز قدمه وأخرى لا يمكن لإنسان أن يتحملها، اغرورقت عينيها بالدموع وهي تتأمل كلمات تلك الأوراق، تحركها واحده تلو الأخرى إلى أن تساقط الدمع من عينيها، نظرت نحو غفران الذي ردد بنبرةٍ مبحوحة:
_ وقت الحادثة قالتلي أنا مش هكمل معاك لأنك عاجز ومنظري قدام الناس أنت هتدمره وفعلا خلعت الدبلة ومشيت وسابتني، وقتها اتصدمت أوي حسيت بأد ايه الدنيا كسرتني... تخيلي تقومي من حادثة عايزة دعم نفسي فيجي أقرب شخص ليكي أو اللي فاكراه أقرب شخص ليكي يقولك آسف بس أنت عاجز... وقتها مكنتش حاسس بحاجة غير وجع وجع مخليني ساكت وبس.
صمت قليلًا بعدما شعر بطغيان هذا الألم على صوته، يجمع شتات نفسه ليكمل باقي حديثه عن غصة بالماضي ولكن لا تزال تقبض عليه داخل أصفاد مظلمة:
_ قعدت في المستشفى كام يوم وبعدها روحت البيت وكله عرف أن بنت خالي سابتني عشان الإعاقة... وعشان والدي طيب زيادة كان فاكر إني اتعصبت عليها مع إني منطقتش وقرر يعزمها هي وخالي ويجوا يقعدوا يمكن الأمور تتصلح، وجم وأنا كنت قاعد في اوضتي، بس سمعت صوتها وحاولت اقوم من غير العكاز معرفتش فاستخدمته ونزلت عشان أشوفها جت ليه...
صمت يبتسم بسخطٍ على سذاجة تفكيره، ثم قال بنبرةٍ متألمة:
_ وعشان أنا كنت غبي فكرتها عايزة ترجع بس طلع العكس وجت تعايرني... استغلت اختفاء خالي وبابا ووقفت قدامي بتتريق على العكاز اللي بستخدمه...
****
( مش قادر تنزل من غير عكازك يا غفران... مش قولتلك أنت هتهين شكلي قدام الناس ومتنفعش تكون زوج لأن مفيش واحدة هتقبل بيك)
قالت تلك الكلمات ببرودٍ، بينما نظر لها بأعينٍ منغمسة بالألم، ثم قال يدافع عن نفسه:
_ دا تفكير ناقص منك يا هناء.
اطلقت ضحكة ساخرة على حديثه ثم فجأة ركلت بقدمها عكازه ليسقط غفران أرضًا أمام قدمها، ابتسمت هناء بشرٍ تتمتم بسخرية واضحة:
_ تؤ تؤ تؤ ايه اللي موقعك قدام رجلي يا غفران... اوعي تقولي إنك عشان عاجز ومش قادر تقف على رجلك العرجة وقعت من ضربة في العكاز.
نظرت لجسده الذي لا يزال يفترش الأرض ولكن يتكئ على كفيه محاولًا استيعاب صدمة ما حدث، نظرت له هناء ثم هبطت إلى أن وصلت لمستواه تردف بكلماتٍ قاسية:
_ الضربة دي هتاخدها من أي بني أدم في الشارع لما تخرج... من الأطفال اللي في الشارع وتقع كده زي ما واقع قدامي وتخيل بقى الناس وهي بتشفق عليك يا غفران... عايز تفهمني أن في واحدة هتقبل واحد كل يوم ناس بتبصله بشفقة عشان عاجز بعرجته!
لو كان نصل يمزق به فلن يشعل بكم هذا الألم، هذه هي مرته الأول التي تدمع عينيه حتى سقطت منه الدموع، لن يتحمل شفقة من أحد لن يتحمل حديث أحد بتلك الطريقة، تركته هناء مغادرة الردهة، بينما بقى غفران على وضعه إلى أن أتى عامر له قائلًا:
_ غفران مالك؟ ايه اللي حصل؟
كاد عامر أن يساعده في النهوض ولكن دفعه غفران بعيدًا يردد بصوتٍ صارخ:
_ مش عايز شفقة من حد.
زحف نحو الأريكة ثم تشبث بها حتى نهض من مكانه، يسير نحو عكازه ولكن يستند على أثاث المنزل، حتى وصل له أمسك عكازه وانطلق نحو غرفته يغلق على نفسه جيدًا ولكن أغلق باب غرفته وفتح جفونه لتسيل دموعه بصمتٍ، هبط ببصره نحو عكازه المسنود عليه ثم دفعه بعيدًا عنه، فنظر أمامه بكبرياءٍ مجروح ثم حاول التحرك ولكنه سقط على الأرض كما سقط بالأسفل، فتهشمت أخر ذرة كرامة له بعدما دهستها هناء ابنة خاله.
****
صوت شهقات مكتومة حاولت السيطرة عليها، بينما برزت عروق غفران بقوةٍ أثناء حديثه، ينظر نحو فاطمة التي ينتفض جسدها من رغبته في اطلاق تلك الشهقات، استرسل غفران حديثه بصوتٍ مختنق:
_ عدت أول سنة ومحدش يعرف باللي حصل بينا وهي سافرت بس كانت كل شوية تبعتلي رسالة ورق عشان تفضل معايا وفعلًا كل ورقة باخدها وبقرأها بشيلها عشان أفضل عارف أن جنس حوا مينفعش أأمانة له تاني... عيشت في الضغط دا اربع سنين لحد ما فقدت ثقتي في نفسي وكل عيلتي ومبقتش أثق في حد.
نظرت له فاطمة بفهمٍ، تحقق حديث طبيبتها هو بالفعل يخفي الكثير، أمسكت فاطمة كفه تنظر له بدفئٍ بعدما كبحت دموعها تحاول أن تثبت نظرتها به وأنه ليس بناقص كما قالت الأخرى:
_ عمري ما شوفت فيك حاجة ناقصة يا غفران... كل مشاكلي معاك طريقتك معايا وكان أول لقاء بينا مكنش أحسن حاجة ولا حتى طريقة جوازنا صدقني يا غفران ان...
قاطعها غفران قبل أن تسترسل حديثها قائلًا ببسمةٍ ولكنها باهته أثر ما رواه:
_ مصدقك يا فاطمة من غير ما تقولي... أنتِ أول واحدة أثق فيها وتبقى محل ثقتي.
نظرت له بدهشةٍ من تصديقه لها، بينما أكمل غفران ضاغطًا على كفها بحبٍ:
_ عشان شوفت ردك على بياعة اللبن.
اتسعت عينيها بصدمةٍ ما أن علمت أنه استمع لحديثهن، ربت غفران على كفها ببسمةٍ هادئة متمتمًا:
_ صحيح مكنتش عايز اسمع كلام الناس بس كلامك بنى جزء من قلبي.
ابتسمت له فاطمة بحنوٍ، ثم تذكرت أفعاله فقالت بصوتٍ مرتبك:
_ حقيقي أنا مكنتش أعرف كل دا يا غفران بس لسه خايفة شوية منك لأن أنت عارف يعني اللي حصل.
زفر غفران بصوتٍ مسموع ثم قال بنبرةٍ تأكيدية:
_ كل خوفك هيختفي يا فاطمة سبيني أصلح اللي باظ دا.
نهض غفران من مكانه يمسك بكفها، يردد بصوتٍ يحمل السعادة:
_ النهاردة محتاج وجودك جنبي قررت أخد عينة من الأرض وأعالجها وهقفل كل صفحات الماضي.
**********
لو أردنا غلق صفحات الماضي فلابد من أن تواجهها حتى لا تسقط عليك بمنتصف الطريق.
وقفت أمام الباب جوار شقيقتها وشقيقها تنظر للمنزل بتعاليٍ واضح وما أن رأت عامر يتحرك بالكتاب ولم يلاحظها حتى هتفت بصوتٍ يملؤه المكر:
_ عامر.
تجمد جسده من وقع هذا الصوت، يحرك رأسه بنفيٍ متمتمًا:
_ يارب تطلع تهيؤات الكيميا وميطلعش اللي في دماغي بجد.
:_ لا يا عامر بجد بنت خالك رجعت من السفر هوني رجعت ليكم تاني.
لطم عامر على احدى وجنتيه يستدير ليرى هناء وإلى جوارها اشقائها، ليعلم أن اليوم ستبدأ ساحة لحرب جديدة!
"اشتركوا على قناتنا على تليجرام أو قناة واتساب ليصلكم أحدث الفصول والتنبيهات فور نشرها"
"اشتركوا على قناتنا على تليجرام أو قناة واتساب ليصلكم أحدث الفصول والتنبيهات فور نشرها"
